ប្រលោមលោក "Fifty Shades of Grey” វគ្គថ្មី ចេញតែ៤ថ្ងៃ លក់ដាច់១,១លានក្បាល

2015-06-23 18:23:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រលោមលោករឿង "Grey” ដែលជាវគ្គថ្មីនៃប្រលោមលោកស្រើបស្រាល "Fifty Shades of Grey” របស់អ្នកនិពន្ធអង់គ្លេស E.L. James បានលក់ដាច់អស់ចំនួន ១,១លានក្បាល គិតទាំងសៀវភៅបោះពុម្ព សៀវភៅអេឡិចត្រូនិក (ebook) និងខ្សែសំឡេង។ នេះបើតាមការអះអាងពីស្ថាប័នចេញផ្សាយកាលពីថ្ងៃចន្ទ។

"នេះគឺជាចំនួនលក់ដ៏ច្រើនលើសលប់មែនទែន សម្រាប់រយៈពេលដ៏ខ្លីបែបនេះ។ ពួកយើងមិននឹកស្មានថាតម្រូវការរបស់អ្នកគាំទ្រចំពោះរឿងនេះ មានចំនួនច្រើនដល់កម្រិតនេះទេ"។ ម្ចាស់គ្រឹះស្ថានបោះពុម្ព អ្នកស្រី Anne Messitte បាននិយាយ។ ដើម្បីឆ្លើយតបនឹងតម្រូវការរបស់អ្នកគាំទ្រ ក្រុមហ៊ុន Vintage Books បានសម្រេចចិត្តបោះពុម្ពសៀវភៅចំនួន ១លានក្បាលទៀត។

មុនចេញវគ្គថ្មីនេះ “Fifty Shades of Grey” ដែលនិយាយពីសម្ព័ន្ធស្នេហ៍ស្រើបស្រាលរវាងនិស្សិតអក្សរសាស្ត្រ Ana និងសេដ្ឋីវ័យក្មេង Christian Grey បានចេញលក់ចំនួន ៣វគ្គរួចមកហើយ ចាប់តាំងពីឆ្នាំ២០១១ ដោយ៣វគ្គនេះ បានលក់ដាច់សរុប ១២៥លានក្បាល ជុំវិញពិភពលោក និងត្រូវបានចេញផ្សាយជា ៥២ភាសា។ រឿងនេះបានក្លាយជាប្រលោមលោកអង់គ្លេសលក់ដាច់លឿនបំផុតក្នុងប្រវត្តិសាស្ត្រ។

"Fifty Shades of Grey” ត្រូវបានថតជាភាពយន្ត ដោយមានតារាសម្ដែង Jamie Dornan និង Dakota Johnson ជាតួឯក និងអាចរកចំណូលបានជាង ៥០០លានដុល្លារ ក្រោយចេញបញ្ចាំងកាលពីខែកុម្ភៈ ៕