លោក James Horner ដែល​ជា​អ្នក​និពន្ធ​​ចម្រៀង​​សម្រាប់​ភាពយន្ត​ "Titanic” និង​ភាពយន្ត​ល្បី​ៗ​របស់​ហូលីវូដ​ជា​ច្រើន​ទៀត បាន​ស្លាប់​ក្នុង​ហេតុការណ៍​ធ្លាក់​យន្តហោះ នៅ​រដ្ឋ California ក្នុង​វ័យ ៦១ឆ្នាំ។

របាយការណ៍ BBC បាន​ឲ្យ​ដឹង​ថា អ្នក​និពន្ធ​រូប​នេះ បាន​ជិះ​យន្តហោះ​តូច​សម្រាប់​មនុស្ស​ពីរ​នាក់ តែ​ម្នាក់​ឯង​ ដែល​ក្រោយ​មក​យន្តហោះ​នោះ​បាន​ធ្លាក់​នៅ​ទីក្រុង Santa Barbara នៅ​​វេលា​ម៉ោង ៩:៣០នាទី​ព្រឹក​ថ្ងៃ​ចន្ទ។​

James Horner ដែល​បាន​កើត​នៅ​ទីក្រុង Los Angeles រដ្ឋ California គឺ​ជា​អ្នក​និពន្ធ​បទ​ចម្រៀង​លេចធ្លោ​មួយ​រូប រយៈ​ពេល​ជាង ៣០ឆ្នាំ​ចុង​ក្រោយ​នេះ។ លោក​ធ្លាប់​និពន្ធ​បទ​ចម្រៀង​សម្រាប់​ភាពយន្ត​​ជាង ១០០រឿង ដែល​ភាគ​ច្រើន​ជា​រឿង​ល្បីៗ​ដូច​ជា "Titanic” , “Avatar”, “Braveheart” , “Apollo 13”, “The Amazing Spider-Man” និង "The Karate Kid” ជា​ដើម។

លោក​បាន​ឈ្នះ​ពាន​រង្វាន់ Oscars ចំនួន ២​សម្រាប់​ការ​និពន្ធ​បទ​ "My Heart Will Go On” ក្នុង​រឿង "Titanic” និង​ពាន​រង្វាន់ Grammys ចំនួន ៤ ៕

ប្រែ​សម្រួល៖ វ៉ាន់ថន ប្រភព៖ bbc