ក្លិប Manchester United ​នឹង​ត្រូវ​ផ្ដល់​ប្រាក់បៀវត្សរ៍​ជាង​២១​លាន​ដុល្លារ​ក្នុង​មួយ​ឆ្នាំ​ដល់​កីឡាករ Sergio Ramos ​ប្រសិន​បើ​បិសាច​ក្រហម​ពិត​ជា​ចង់​បាន​ខ្សែ​ការពារ​រូប​នេះ​ពី Real Madrid ​មែន​នោះ។

Ramos ​មិន​សប្បាយ​ចិត្ត​ និង​ចង់​ចាកចេញ​ពី​ក្រុម Real Madrid ​ដោយសារ​តែ​រូបគេ​បាន​ទទួល​ប្រាក់​ប្រចាំ​ឆ្នាំ​តែ​៨​លាន​អឺរ៉ូ​ប៉ុណ្ណោះ ពោល​គឺ​តិច​ជាង​ខ្សែ​ការពារ​ល្បី​ៗ​ផ្សេង​ទៀត​ ដែល​សុទ្ធ​តែ​បាន​លើស​១០​លាន​អឺរ៉ូ។ ដោយ​ហេតុ​នេះ ប្រសិន​បើ​ Man Utd ​ទិញ​រូប​គេ​ពី​អធិរាជ​ស​បាន​ នោះ​ខ្សែ​ការពារ​ជម្រើស​ជាតិ​អេស្ប៉ាញ​រូប​​នេះ ត្រូវ​តែ​បាន​ប្រាក់​ប្រចាំ​ឆ្នាំ​ច្រើន​ជាង​នៅ Real ​ពោល​គឺ​អាច​ដល់​ទៅ​១៣,​៥​លាន​ផោន ​ឬ​ទទួល​បាន​ ២៦ម៉ឺន​​ផោន​ក្នុង​មួយ​សប្ដាហ៍។

យ៉ាង​ណា​មិញ នេះ​គ្រាន់​តែ​ជា​អ្វី​ដែល​ Man Utd ​នឹង​ត្រូវ​ធ្វើ​ពេល​ទិញ​បាន Ramos ​តែ​ប៉ុណ្ណោះ ប៉ុន្តែ​ពេល​នេះ​ខាង​ក្លិប​ទាំង​ពីរ​នៅ​ពិចារណា​រៀង​ខ្លួន​នៅ​ឡើយ​ទេ​ ព្រោះ​លោក Rafa Benitez ​ក៏​មិន​ចង់​ឱ្យ​ខ្សែ​ការពារ​វ័យ​២៩​ឆ្នាំ​រូប​នេះ​ចាកចេញ​ពី​ក្លិប​ដែរ ។ អតីត​កីឡាករ Sevilla ​ខាង​លើ​នេះ​ នឹង​ជួប​ភ្នាក់ងារ​ទីផ្សារ​របស់​គេ​នៅ​ថ្ងៃ​ចន្ទ​សប្ដាហ៍​ក្រោយ​នេះ ដើម្បី​សម្រេច​ពី​អនាគត​របស់​​ខ្លួន​​ឱ្យ​ពិត​ប្រាកដ​ថា​គួរ​ទៅ Man Utd ​ឬ​នៅ Real Madrid ​បន្ត៕

ចុចអាន៖ កីឡាករ​ណា​ខ្លះ​ជា​មិត្ត​ល្អ​នឹង​គ្នា​ក្នុង​ពិភព​បាល់ទាត់ ?

ប្រែ​សម្រួល៖ មុន្នី រម្យ ប្រភព៖ dailymail