តែ៣នាទីប៉ុណ្ណោះ អេនឌី អស់ប្រាក់រាប់ពាន់ដុល្លារ

2015-06-25 19:00:33
ចំនួនមតិ 0 | ចំនួនចែករំលែក 0

ចន្លោះមិនឃើញ

អេនឌី ដែលគេចាត់ជាតារាប្រុសមហាសំណាងព្រោះតែបានថតកៀកកើយជាមួយតារាស្រីស្អាតៗជាច្រើននាក់នោះ ឥឡូវនេះបែរជាជួបរឿងស៊យក្នុងរយៈពេលតែ ៣នាទីប៉ុណ្ណោះ ត្រូវបង់ប្រាក់អស់រាប់ពាន់ដុល្លារ ធ្វើឲ្យចង់អស់អារម្មណ៍ធ្វើការ។ នេះបើតាមសាមីខ្លួន។

តារាប្រុសដែលពូកែលេងម៉ូដរូបនេះប្រាប់ទៀតថា លោកក៏បានជួបរឿងស៊យដល់ទៅពីររឿងក្នុងខែតែមួយ ដែលដំបូងឡើយ ត្រូវចោរចូលលួចទ្រព្យសម្បត្តិផ្ទាល់ខ្លួនក្នុងឡានអស់មួយចំនួនកាលពីសប្ដាហ៍មុន។

អេនឌី រៀបរាប់ថា ថ្ងៃមួយកាលពីសប្ដាហ៍មុនលោកបានជូនដំណើរ Sponsor របស់លោកទៅបារាំង។ នៅតាមផ្លូវមិនទាន់ដល់ប្រលានយន្តហោះផង ដោយរាន់នោមខ្លាំងពេកលោកក៏ឈប់ឡាន ចុះទៅបត់ជើងតូចភ្លេចខ្លួនមិនបិទ(Lock) គន្លឹះទ្វារឡានតែបន្តិចប៉ុណ្ណោះ ត្រូវក្រុមចោរមិនស្គាល់មុខចូលលួចយកកាបូបលុយ និងឯកសារមួយចំនួនភ្លាមទៅបាត់តែម្តង។

“ភ្លេចខ្លួនអត់បាន Lock ទ្វារ ហើយចុះទៅតែប្រមាណ៣នាទីសោះហ្នឹងណាបង ស្រាប់ដើរមកវិញឃើញទ្វារឡានចំហ ខ្ញុំស្រងាកចិត្តបាត់ លឿនមែនទែន ខ្ញុំអត់មានឃើញអីម៉ាតិចសោះហ្មងណាស់!”។

អេនឌី ប្រាប់ថា ទឹកប្រាក់សុទ្ធក្នុងកាបូបជាង ១០០០ដុល្លារ កាបូបដៃមួយដែលលោកទិញកាលទៅសម្ដែងនៅប្រទេសបារាំងមានតម្លៃជាង១០០០ដុល្លារដែរ រួមទាំងអត្តសញ្ញាណប័ណ្ណ និងឯកសារសម្រាប់ផ្ញើទៅក្រៅប្រទេសមួយចំនួនទៀតផង ត្រូវបានបាត់បង់អស់។ “ទៅបារាំងមានសល់អី សល់តែកាបូបហ្នឹង អស់តែប៉ុណ្ណឹង...មានចង់ធ្វើអីទៀតបង អស់កម្លាំងអាលីង"។ អេនឌី បន្ថែម។

ដោយឡែករឿងស៊យទី២របស់ អេនឌី ក្នុងខែមិថុនានេះដែរ គឺគណនីហ្វេសប៊ុក ដែលធ្លាប់តែប្រើដើម្បីភ្ជាប់ទំនាក់ទំនងជាមួយអ្នកគាំទ្រ មិត្តភ័ក្ដិក្នុង និងក្រៅប្រទេស រួមទាំងបុព្វហេតុជំនួញខ្លះផងនោះ ស្រាប់តែត្រូវបានជនអនាមិកជ្រៀតចូល (Hacked) ធ្វើឲ្យលោកខកខានប្រើប្រាស់បណ្ដាញទំនើបនេះ អស់រយៈពេលជិត១ខែមកហើយ។

លោក ថ្លែងថា "ឥឡូវធ្វើអីក៏អត់កើតដែរ ធុញណាស់បង ខ្ញុំឲ្យគេអ្នកជំនាញខាងហ្នឹងជួយហើយ តែគេថា ឲ្យរង់ចាំៗ ឥឡូវជាងកន្លះខែហើយនៅតែមិនទាន់អាចប្រើបាន"។ អេនឌី លើកឡើងថា បញ្ហានេះ ប្រិយមិត្តអាចយល់ថា ជាបញ្ហាតូចមួយ ប៉ុន្តែសម្រាប់លោក មិនតូចពេកទេ ព្រោះក្រៅតែពីប្រើដើម្បីបង្ហាញសកម្មភាពសិល្បៈ ការធ្វើជំនួញ និងទំនាក់ទំនងជាមួយ Sponsor ក្រៅប្រទេសមួយចំនួនសម្រាប់ការចេញសម្ដែងក្រៅប្រទេស ពេលខ្លះ ក៏ត្រូវធ្វើតាមបណ្ដាញសង្គមនេះដែរ៕

មួយឈុត កែវ ស្រីនាង យប់មិញសិចស៊ីប្លែកភ្នែក!

ពាក្យ ១ ឃ្លា ម៉េង កែវពេជ្ជតា តែងផ្ដាំកូនទាំងពីររស់នៅអូស្ត្រាលី

អត្ថបទ៖ ទារិកា