ក្ដៅៗ! ធ្លាក់យន្តហោះចំសណ្ឋាគារបណ្ដាលឲ្យមនុស្សស្លាប់ច្រើននាក់

2015-06-30 21:41:53
ចំនួនមតិ 0 | ចំនួនចែករំលែក 0

ចន្លោះមិនឃើញ

មុននេះបន្តិច យន្តហោះយោធាធុនធំមួយគ្រឿងរបស់ប្រទេសឥណ្ឌូណេស៊ី បានធ្លាក់ចំសណ្ឋាគារ និងផ្ទះប្រជាជននៅភាគខាងជើងក្រុង Medan កោះស៊ូម៉ាត្រា បណ្ដាលឲ្យមនុស្សយ៉ាងតិច ៣០នាក់ស្លាប់។ នេះបើតាមការបញ្ជាក់របស់មន្ត្រីឥណ្ឌូណេស៊ី និងចុះផ្សាយលើសារព័ត៌មាន Channelnewsasia របស់ប្រទេសសិង្ហបុរី។

“ព័ត៌មានចុងក្រោយគេ ដែលយើងទទួលបាន គឺមនុស្ស ៣០នាក់ស្លាប់... ចំនួនអ្នកស្លាប់នៅបន្តកើនឡើងទៀត"។ នេះបើតាមលោក Hisar Turnip ដែលជាអ្នកនាំពាក្យឲ្យក្រុមរុករក និងជួយសង្គ្រោះរបស់ប្រទេសឥណ្ឌូណេស៊ី និយាយប្រាប់ទីភ្នាក់ងារព័ត៌មានអង់គ្លេស Reuters។

រហូតមកដល់ពេលនេះ គេនៅមិនទាន់ដឹងច្បាស់ថា មានមនុស្សប៉ុន្មាននាក់នៅលើយន្តហោះ និងលើទីតាំងដែលយន្តហោះជួបគ្រោះថ្នាក់នៅឡើយទេ។ ទូរទស្សន៍ក្នុងស្រុក បានបង្ហាញពីតំបន់កើតហេតុមានភ្លើងឆេះសន្ធោសន្ធៅ បន្ទាប់ពីយន្តហោះម៉ាក C-130 Hercules ធ្លាក់។ អ្នកនាំពាក្យកងកម្លាំងយោធាបានបញ្ជាក់ថា នៅលើយន្តហោះនោះមានកងទ័ព ១២នាក់ កំពុងធ្វើដំណើរ។ ចំណែកអ្នកស្លាប់ជាច្រើននាក់ទៀត គឺជាជនស៊ីវិលដែលរស់នៅតំបន់កើតហេតុតែម្ដង។

យន្តហោះដែលជួបគ្រោះថ្នាក់ កំពុងធ្វើដំណើរពីមូលដ្ឋានទ័ពអាកាសនៅក្រុង Medan ទៅកាន់កោះដាច់ស្រយាល Natuna ប៉ុន្តែបានធ្លាក់បន្ទាប់ពីហោះហើរឡើងប៉ុន្មាននាទីប៉ុណ្ណោះ។ ប្រព័ន្ធផ្សព្វផ្សាយបានបញ្ជាក់ថា អាកាសយានិកបានស្នើសុំត្រលប់ក្រោយវិញ ព្រោះមានបញ្ហាបច្ចេកទេសមុនជួបគ្រោះថ្នាក់។ យ៉ាងណាក្ដី គេនៅមិនទាន់ដឹងពីមូលហេតុពិត ដែលនាំឲ្យយន្តហោះទៅធ្លាក់ចំកន្លែងមានមនុស្សច្រើនបែបនេះទេ៕