អាជីវកម្មចម្លង អាចប្រឈមបញ្ហាអ្វីខ្លះ?

2015-07-07 16:43:43
ចំនួនមតិ 0 | ចំនួនចែករំលែក 0

ចន្លោះមិនឃើញ

អាជីវកម្មចម្លងគ្នាក្នុងប្រទេសកម្ពុជា កំពុងមានកំណើនឡើងខ្លាំង ក្នុងមួយរយៈចុងក្រោយនេះ ជាក់ស្ដែងហាងស្លាក ២៥០០៛ និង កាហ្វេចល័តតែម្ដង។ តើការបើកអាជីវកម្មចម្លងតាមគេស្ទើរគ្រប់គ្នានេះ អាចមានផលប៉ះពាល់អ្វីខ្លះ?

គ្រាន់តែបើកភ្លាម មនុស្សសម្រុកចូលទិញភ្លូកទឹកភ្លូកដី។ នេះហាងស្លាក ២៥០០៛ពីមុន ចុះឥលូវវិញយ៉ាងម៉េចដែរ? អ្នកស្រីចិន្តា ម្ចាស់អាជីវកម្មហាង ២៥០០៛ តាមបណ្ដោយផ្លូវ ៣១០ បានលើកឡើងថា ចំណូលពីការលក់ប្រចាំថ្ងៃធ្លាក់ចុះសឹងពាក់កណ្ដាល បន្ទាប់ពីមានហាងលើកស្លាក ២៥០០៛ រីកដូចផ្សិតមក។

អាជីវកររូបនេះ សម្ដែងក្ដីបារម្ភនៃអាជីវកម្មដែលបង្កើតថ្មីស្រដៀងៗគ្នា ថាមិនយូរមិនឆាប់ បណ្ដាហាងទាំងនោះ នឹងមុជមិនជ្រៅទៅមិនឆ្ងាយ។

ចំណែកលោក យ៉ែម ឈីម ជាស្ថាបនិក និងអ្នកគ្រប់គ្រងទូទៅរបស់ Mobile Coffee បានបង្ហាញក្ដីបារម្ភដែរថា អាជីវកម្មចម្លងគេមានហានិភ័យច្រើន ដែលអាចឈានទៅរកបរាជ័យ។

លោកបន្តថា " អាជីវករអាចមានហានិភ័យលើកម្មសិទ្ធិបញ្ញា ដែលត្រូវប្រឈមមុខផ្លូវច្បាប់ និងសងម្ចាស់កម្មសិទ្ធិបញ្ញា តាមច្បាប់អាជីវកម្ម។ ការចម្លងផ្នែកភេសជ្ជ និងអាហារ បានតែសំបកក្រៅ តែរសជាតិ និងគុណភាព គឺមានភាគរយតិចណាស់ដែលដូចម្ចាស់ដើម"។

អាជីវកម្មចម្លងគេមានផលអវិជ្ជមានអ្វីខ្លះ? ស្ថាបនិក Mobile Coffee រូបនេះលើកឡើងថា ទី១ ប៉ះពាល់ដល់កិត្តិយសកេរ្តិ៍ឈ្មោះជាតិសាសន៍ខ្លួនឯង។ បើប្រទេសមួយសំបូរទៅដោយអ្នកចម្លង ប្រទេសឬអាជីវកម្មនោះ នៅតែដើរក្រោយគេ គ្មានការរីកចម្រើន ហើយបើទោះជោគជ័យ ក៏ប្រជាជននិងប្រទេសជិតខាង មិនអោយតម្លៃដែរ។ ទី២ មានហានិភ័យ នៃការបរាជ័យខ្ពស់ ដោយសារអាជីវករ គ្មានគំនិតច្នៃប្រឌិត និងគម្រោងអាជីវកម្មច្បាស់លាស់។ ទី៣ កិត្តិយសម្ចាស់អាជីវកម្ម នឹងមិនមាននៅក្នុងកែវភ្នែកប្រជាជន។

បច្ចុប្បន្នបើតាមការសង្កេត អ្នកចម្លងរបរកាហ្វេចល័ត ៩០% ហើយ ដែលមិនទទួលជោគជ័យ ដោយអ្នកខ្លះត្រូវបិទទ្វារទៅវិញ ហើយអ្នកចម្លងថ្មីក៏បង្ហាញខ្លួនទៀត ព្រោះពួកគេគ្មានគម្រោង និងជំនាញច្បាស់លាស់។ លោកយ៉ែម ឈីម ចូលរួមចែករំលែកមតិថា ដើម្បីធ្វើអាជីវកម្មមួយទៅបាន គឺអាជីវករត្រូវមានគម្រោងអាជីវកម្ម និងការវិភាគច្បាស់លាស់ ត្រូវមានចំណេះដឹងទូលំទូលាយ បទពិសោធន៍ គំនិតច្នៃប្រឌិត ដើមទុនគ្រប់គ្រាន់ និងភាពជាអ្នកដឹកនាំ។

ទាក់ទិននឹងការរកស៊ីតាមគ្នា គ្មានអ្វីប៉ះពាល់ដល់មុខមាត់ និងសេដ្ឋកិច្ចប្រទេសជាតិឡើយ ផ្ទុយទៅវិញអាជីវកម្មបែបនេះ មានតួនាទីជំរុញឱ្យវិស័យសេដ្ឋកិច្ចប្រទេស រីកចម្រើនទៅវិញទេ។ នេះជាការលើកងឡើងរបស់ លោក កែន រដ្ឋា អ្នកនាំពាក្យនៃក្រសួងពាណិជ្ជកម្ម។ ទោះយ៉ាងណាលោកព្រមានថា បើក្នុងករណីអាជីវកម្មចម្លងគ្នា មានច្រើនហួសតម្រូវការ អាចធ្វើឱ្យអ្នកជំនួញមានបទពិសោធន៍ល្មមៗដួលឬបិទទ្វារ ជាហេតុធ្វើឱ្យប៉ះពាល់ដល់សេដ្ឋកិច្ច ឬមួយទៀតអាជីវករ អាចជាប់ចោទពីបទរំលោភលើ កម្មសិទ្ធបញ្ញារបស់ម្ចាស់ដើម។

"ដូចហាងកាហ្វេសព្វថ្ងៃចឹង ឥឡូវតម្រូវការនៅមាន អ្នកបើកហាងកាហ្វេភាគច្រើន គឺគាត់ជោគជ័យ"។ លោកបញ្ជាក់ ប៉ុន្តែអ្វីដែលលោកបារម្ភផ្សេងទៀតនោះ គឺកម្មសិទ្ធិបញ្ញា។

អ្នកនាំពាក្យរូបនេះថ្លែងបន្តថា ដោយសារកម្ពុជា ជាទីផ្សារសេរី គឺរដ្ឋាភិបាលមិនហាមឃាត់ ក្នុងរបរតាមគ្នានេះឡើយ ប៉ុន្តែរដ្ឋាភិបាល សូមឱ្យអ្នកជំនួញគ្រប់រូបចេះរបៀបវិភាគ ចេះធ្វើគម្រោងអាជីវកម្ម មានគំនិតច្នៃប្រឌិត និងយល់ដឹងពីច្បាប់កម្មសិទ្ធិបញ្ញា ដើម្បីឈានទៅរកភាពជោគជ័យ៕