មកលេងកំពត កុំភ្លេចទាចៀន ស្រុកឈូក

2015-07-27 18:55:05
ចំនួនមតិ 0 | ចំនួនចែករំលែក 0

ចន្លោះមិនឃើញ

បើអ្នកធ្វើដំណើរពីភ្នំពេញមកខេត្តកំពត នៅជាប់នឹងថ្នល់ជាតិលេខ ៣ ចម្ងាយប្រហែល ១ គីឡូម៉ែត្រ ពីផ្សារឈូក ដែលស្ថិតក្នុងទីរួមស្រុកឈូក នៃខេត្តកំពត មានរថយន្តឈប់អែបខាងជើងថ្នល់ជាហែហូរមិនដាច់។ ទីនេះត្រូវបានគេស្គាល់ថា ជាកន្លែងលក់ទាចៀនដ៍ល្បី ដែលអ្នកដំណើរមកលេង ឫឆ្លងកាត់ខេត្តកំពត ដែលមិនសូវជាធ្វើដំណើរហួសទាចៀនស្រុកឈូកប៉ុន្មានទេ ព្រោះគេតែងល្បីថា ទាចៀននៅទីនេះមានរសជាតិឆ្ងាញ់ និង មានតម្លៃសមរម្យ ធ្វើជាគ្រឿងក្លែម ឫជាម្ហូបក៏បាន។

អ្នកស្រី ល័ក្ខណ៍ ជាម្ចាស់តូប បានប្រាប់ភ្នាក់ងារ Sabay ឲ្យដឹងថា គាត់លក់ទាចៀននេះ ជាងមួយឆ្នាំហើយដោយមានអ្នកលើកទៅលក់បន្ត មានភ្ញៀវប្រចាំ និង អ្នកដំណើរធម្មតា។ “បើថ្ងៃណាលក់ដាច់ គាត់អាចលក់អស់ ៣០០ទា អន់បំផុតក៏បាន ៣០ ទា ក្នុង១ថ្ងៃ"។

“ទាមួយថ្លៃចន្លោះពី ១២ ០០០៛ ទៅ ១៥ ០០០៛ តាមទាតូច ឫ ធំ និង ចាប់បើកលក់ពីម៉ោង ៧ ដល់ម៉ោង ៩ យប់ ជូនកាលដល់ម៉ោង ១០ ក៏មានដែរ។ មិនមែនមានតែ ទាចៀនប៉ុណ្ណោះទេ តែក៏មានលក់ កទា និង គ្រឿងក្នុងទាដែរ។ នៅតាកែវ កោះកុងក៏មានលក់ដែរ តែអ្នកដែលចូលមកទិញថា មិនសូវឆ្ងាញ់ដូចនៅទីនេះ”។ អ្នកស្រី លក្ខណ៍ ប្រាប់បន្ថែម។

បងស្រី ធីតា ជាអ្នកធ្វើដំណើរពីភ្នំពេញ ឆ្ពោះទៅកែប បានប្រាប់ឲ្យដឹងដែរថា គាត់តែងតែឈប់ទិញទាចៀននៅទីនេះមិនដែលខាន អោយតែបានកាត់តាមផ្លូវនេះ ព្រោះវាមានរសជាតិឆ្ងាញ់ និង មានតម្លៃសមរម្យ។

តើប្រិយមិត្ត Sabay បានសាករសជាតិទាចៀនឈូកហើយ ឫនៅ? បើឆ្លងកាត់កំពតកុំភ្លេចសាកល្បងទាំងអស់គ្នាណា៎!