ការងារ១២ប្រភេទ ស័ក្ដិសមសម្រាប់អ្នកចូលចិត្តធ្វើដំណើរ

2015-07-08 22:25:33
ចំនួនមតិ 0 | ចំនួនចែករំលែក 0

ចន្លោះមិនឃើញ

មានការងារជាច្រើនផ្នែកដែលមនុស្សចង់ធ្វើតាមចំណង់ចំណូលចិត្តរបស់ពួកគេ។ ការងារខ្លះតម្រូវឲ្យបុគ្គលិកធ្វើនៅក្នុងការិយាល័យឬចេញទៅខាងក្រៅដើម្បីបំពេញកិច្ចការការងារ។ សម្រាប់អ្នកចូលចិត្តធ្វើដំណើរទៅក្រៅ ការងារ១២ប្រភេទខាងក្រោមនេះ សក្តិសមបំផុតសម្រាប់អ្នក៖

១. អ្នកប្រឹក្សាយោបល់

ការងារជាអ្នកប្រឹក្សាយោបល់គឺជួយផ្ដល់ដំបូន្មានលើការសម្រេចចិត្តនានាដល់ក្រុមហ៊ុនដែលត្រូវការ ។ ការងារមួយនេះគឺតម្រូវការឲ្យធ្វើដំណើរទៅខាងក្រៅច្រើនដើម្បីជួយដោះស្រាយបញ្ហាផ្សេងៗលើវិស័យផ្សេងៗដែលក្រុមហ៊ុនជាច្រើនជួបប្រទះ។

២. បុគ្គលិកបម្រើការងារក្នុងវិស័យទេសចរណ៍

ប្រាកដណាស់ថាការងារក្នុងវិស័យនេះគឺសម្រាប់អ្នកដែលចូលចិត្តការធ្វើដំណើរទៅខាងក្រៅ។ អ្នកបើកយន្តហោះ បុគ្គលិកបម្រើការតាមយន្តហោះ ឬ រថយន្តក្រុងទេសចរណ៍ មគ្គុទ្ទេសក៍ទេសចរណ៍ គឺជាការងារដែលតម្រូវឲ្យធ្វើដំណើរទៅខាងក្រៅជាប្រចាំ។

៣. អ្នកជ្រើសរើសបុគ្គលិក

ជាអ្នកជ្រើសរើសបុគ្គលិកមិនប្រាកដថាអង្គុយធ្វើការក្នុងការិយាល័យតែមួយកន្លែងរហូតនោះទេ។ សម្រាប់ពេលជ្រើសរើសបុគ្គលិកគឺតម្រូវឲ្យទៅខាងក្រៅដើម្បីសម្ភាសបុគ្គលិកចំណូលថ្មី ឬនៅក្នុងកម្មវិធីសិក្ខាសាលាការងារជាច្រើនដែលក្រុមហ៊ុនតម្រូវឲ្យធ្វើ។

៤. ការងារផ្នែកលក់

ផ្នែកលក់ទំនិញគឺពាក់ព័ន្ធនឹងការធ្វើដំណើរច្រើន ក្រៅពីការលក់ទំនិញនៅក្នុងហាង។ ក្រុមហ៊ុនជាច្រើនក៏តម្រូវឲ្យយកទំនិញទៅលក់តាមតំបន់នានា ជួនកាលទៅដល់ក្រៅប្រទេសទៀតផង។

៥. គ្រូបង្រៀនភាសាអង់គ្លេស

ភាសាអង់គ្លេសជាភាសាដែលគេប្រើជាអន្តរជាតិ ដូចនេះការបង្រៀនភាសាអង់គ្លេសគឺមានតម្រូវការច្រើនពីបណ្ដាស្ថាប័នអប់រំនៅតាមបណ្ដាប្រទេសជាច្រើន។ សម្រាប់អ្នកធ្វើការងារជាគ្រូបង្រៀនភាសាអង់គ្លេសអាចធ្វើដំណើរជាច្រើនកន្លែងពីមួយឆ្នាំទៅមួយឆ្នាំតាមតម្រូវការរបស់គ្រឹះស្ថានអប់រំនានា។

៦. អ្នកសរសេរវិបសាយដំណើរកម្សាន្ត

ការងារមួយនេះគឺតម្រូវឲ្យធ្វើដំណើរទៅកន្លែងទេសចរណ៍ រមណីយដ្ឋានផ្សេងៗជាច្រើនដើម្បីផ្សព្វផ្សាយពីតំបន់ទេសចរណ៍នោះ។

៧. មន្ត្រីការទូត

ការងារជាមន្ត្រីការទូតគឺត្រូវចេញទៅក្រៅដើម្បីទំនាក់ទំនងនឹងបរទេសដែលជាញឹកញាប់គឺត្រូវធ្វើដំណើរច្រើនសម្រាប់អ្នកដែលស្រមៃធ្វើការងារមួយនេះ។

៨. អ្នកបុរាណវិទូ

ដោយផ្អែកទៅលើការងារជាបុរាណវិទូគឺត្រូវចុះទៅស្រាវជ្រាវនៅតាមទីកន្លែងប្រវត្តិសាស្ត្រជាច្រើន។ ការងារនេះគឺជាជម្រើសល្អបំផុតសម្រាប់អ្នកចូលចិត្តធ្វើដំណើរទៅក្រៅ។

៩. អ្នកសារព័ត៌មាន

ជាអ្នកសារព័ត៌មានគឺត្រូវចុះទៅទីកន្លែងនានាដើម្បីនាំយកព័ត៌មានមកផ្សព្វផ្សាយ។ ដូចនេះគឺត្រូវធ្វើដំណើរច្រើន ដោយពេលខ្លះត្រូវទៅក្រៅប្រទេសទៀតផង។

១០. សវនករ

ការងារជាសវនករ គឺត្រូវចុះទៅត្រួតពិនិត្យទៅតាមស្ថាប័នដែលពាក់ព័ន្ធផ្សេងៗជាច្រើន ដើម្បីពិនិត្យរកមើលភាពជាក់ស្ដែងដោយផ្ទាល់។ ការងារប្រភេទនេះ តម្រូវឲ្យធ្វើដំណើរច្រើន។

១១. ជាងថតរូប

ជាអ្នកថតរូបគឺមិននៅតែមួយកន្លែងនោះទេ។ អាជីពមួយនេះគឺតម្រូវឲ្យធ្វើដំណើរចេញទៅក្រៅច្រើន ដើម្បីផ្ដិតទេសភាពទៅតាមផ្នែកដែលពាក់ព័ន្ធ។

១២. ការងារស្ម័គ្រចិត្ត

ការងារស្ម័គ្រចិត្តមួយចំនួនគឺមានលក្ខណៈតំបន់ និងអន្តរជាតិ។ ទោះបីជាការងារមួយនេះពុំមានទទួលប្រាក់កម្រៃក៏ដោយតែអ្នកដែលប្រលូកក្នុងការងារនេះនឹងទទួលបានបទពិសោធន៍ ព្រមទាំងការធ្វើដំណើរទៅខាងក្រៅច្រើនផងដែរ។

ក្រៅពីការងារ១២ប្រភេទខាងលើ តើប្រិយមិត្តមានការងារអ្វីផ្សេងដើម្បីចែករំលែកដែរឬទេ?

ចុចអាន៖ តិកនិកសរសេរ Cover Letter ឲ្យគេចាប់អារម្មណ៍ឆាប់ហៅទៅសម្ភាស

ប្រែសម្រួល៖ មាន រតនា ប្រភព៖ businessinsider