សុគន្ធ ធារ៉ាត់ សច្ចាធ្វើតែបទ Original Song ហើយធ្វើឲ្យបានលេខ១ទៀត!

2015-07-09 18:25:24
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង សុគន្ធ ធារ៉ាត់ បានតាំងចិត្តថា ចាប់ពីពេលនេះទៅ ឈប់ប៉ះហើយបទចម្រៀងចម្លងពីគេ តែនឹងធ្វើតែបទ Original Song សុទ្ធវិញ ព្រមទាំងធ្វើឲ្យល្អជាងគេថែមទៀត។

អតីតតារាចម្រៀងផលិតកម្ម Spider ប្រាប់ទៀតថា មូលហេតុដែលលោកតាំងចិត្តមុតមាំងាកមកធ្វើតែបទ Original ព្រោះតែសម្លឹងវែងឆ្ងាយទៅវេលាដែលកម្ពុជានឹងត្រូវច្របាច់បញ្ចូលក្នុងសហគមន៍អាស៊ានតែមួយ ឬហៅថា "សមាហរណកម្មអាស៊ាន" ដែលវេលានោះ លោកមានជំនឿថា បទចម្លងពីគេ នឹងលែងមានប្រជាប្រិយភាព។

ធារ៉ាត់ ថ្លែងថា "ឥឡូវហ្នឹងយើងចូលអាស៊ានស្អែកខានស្អែកហើយ អីចឹងលែងត្រូវការប្រើបទចម្រៀងចម្លងពីអីទៀតទេ។ ម្យ៉ាងពីមុនខ្មែរយើងអត់សូវគាំទ្របទ Original ទេ តែឥឡូវពួកគាត់គាំទ្រណាស់។ មិនត្រឹមតែខ្ញុំទេ ដូចបងឃើញស្រាប់ហើយ ផលិតកម្មមួយចំនួនក៏ងាកមកធ្វើបទ Original Song ច្រើនដែរ។ តាមទស្សនៈផ្ទាល់ខ្លួន ឥឡូវបទចម្លងពី ៨០% Original ២០% តែដល់សមាហរណកម្មអាស៊ាននោះ ខ្ញុំជឿថា Original ៨០% ហើយបទចម្លងពីគេ ២០%វិញហើយ"។

សមិទ្ធផលពីការតាំងចិត្តមុតមាំលើការងាកមកធ្វើតែបទចម្រៀង Original នានេះ សុគន្ធ ធារ៉ាត់ ត្រៀមនឹងបញ្ចេញ៣បទបន្តបន្ទាប់ ក្រោមកិច្ចសហការរួមគ្នាជាមួយអតីតតារាចម្រៀងផលិតកម្ម Rock លោក ចេក និងអ្នកនិពន្ធម្នាក់ឈ្មោះ មករា។ ម្ចាស់បទ "“ស្ត្រីខ្មែរស្អាតគ្រប់បែប " រូបនេះ ថ្លែងថា ប្រសិនបើមិនមានអ្វីរាំងស្ទះទេ បទ Original Song ទី១របស់លោក នឹងចេញនៅសប្ដាហ៍ក្រោយ។

"បទទី១នេះ ខ្ញុំធ្វើឲ្យ Full តែម្ដង អត់ធ្វើតែហ្គីតា អ័គ ព្យាណូ ហ្គីតាអីទេ ព្រោះខ្ញុំឃើញបងប្អូនយើងមួយចំនួន ច្រើនធ្វើតែហ្គីតា អ័គ តែបទខ្ញុំនេះ គឺមានដាក់ សាក់សូរអីទៀត ហើយសាក់សូរហ្នឹងពិបាករកអ្នកលេងណាស់បង មានតែទៅរកអ្នកលេងជើងចាស់នៅហង្សមាសអីឯណោះ ឲ្យគាត់ជួយ និយាយទៅខ្ញុំធ្វើយកល្អតែម្ដង"។

Original Song ទី១របស់ សុគន្ធ ធារ៉ាត់ ត្រៀមចេញនៅសប្ដាហ៍ក្រោយនេះមានចំណងជើងថា "សង្ឃឹមថាអូនទទួលយក" និយាយអំពីបុរសម្នាក់លួចស្រឡាញ់នារីម្នាក់តែឯង។ ធារ៉ាត់ ថ្លែងថា "គ្រាន់តែមួយបទហ្នឹង ខ្ញុំធ្វើដល់ទៅប្រមាណ២ខែឯណោះ...និយាយពីសំឡេងវិញ ថ្ងៃខ្លះ ខ្ញុំទៅថត សំឡេងអត់ល្អ ខ្ញុំមកផ្ទះវិញៗ គ្រាន់តែចំណាយពេលថតសំឡេងប្រហែល៣អាទិត្យ ថតហើយយកស្ដាប់អត់ល្អថតឡើងវិញទៀត និយាយទៅខ្ញុំចង់ឲ្យបទទី១ហ្នឹងមួយល្អបំផុតតែម្ដង"៕

អត្ថបទ៖ ទារិកា