Van Gaal ចង់លក់ De Gea & Van Persie មុនថ្ងៃច័ន្ទ

2015-07-10 21:05:12
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាត់ការក្រុមបិសាចក្រហម Manchester United លោក Louis van Gaal ចង់លក់អ្នកចាំទី David de Gea និងខ្សែប្រយុទ្ធ Robin van Persie ចេញ មុនពេលដែលក្រុមរបស់លោក ចាកចេញទៅប្រកួតមិត្តភាពនៅថ្ងៃច័ន្ទ ទី១៣ ខែកក្កដានេះ។

ខ្សែប្រយុទ្ធហុល្លង់ Van Persie ជិតផ្ទេរចេញទៅក្លិបទួរគឺ Fenerbahce ហើយ ទោះបីជាមានការចាប់អារម្មណ៍ពីក្លិបអេស្ប៉ាញ Valencia និង Atletico Madrid ក៏ដោយ ប៉ុន្តែការសម្រេចចិត្តចុងក្រោយ ក៏អាចនឹងមានការផ្លាស់ប្តូរដែរ។

សេចក្ដីរាយការណ៍មួយលើកឡើងថា លោក Van Gaal យល់ថាខ្សែប្រយុទ្ធវ័យ៣១ឆ្នាំ មិនស្ថិតក្នុងគម្រោងរបស់លោក សម្រាប់រដូវកាលថ្មីទេ ខណៈដែល Fenerbahce ជឿថា ពួកគេជិតទិញអតីតខ្សែប្រយុទ្ធក្រុម Arsenal រូបនេះបានហើយ នូវតម្លៃប្រហែល១០លានផោន ដែលនឹងទៅចូលរួមជាមួយអតីតមិត្តរួមក្រុមបិសាចក្រហម Nani ផងដែរ។

រីឯ De Gea អាចនឹងចាកចេញទៅ Real Madrid បើសិនជាអ្នកចាំទី Iker Casillas ចាកចេញទៅចូលរួមជាមួយក្លិបយក្សព័រទុយហ្គាល់ Porto។ អ្នកចាំទីដៃស្អិតរបស់បិសាចក្រហម វ័យ២៤ឆ្នាំ នៅជាប់កុងត្រា១ឆ្នាំទៀត នៅកីឡដ្ឋាន Old Trafford ខណៈដែល Man Utd ចង់លក់កីឡាករជម្រើសជាតិអេស្ប៉ាញរូបនេះ នូវតម្លៃ៣៥លានផោន។

ប្រភពជិតស្និតពីអ្នកចាត់ការក្រុមបិសាចក្រហម បានបញ្ជាក់ថា លោក Van Gaal ចង់នាំតែកីឡាករណា ដែលមានក្នុងគម្រោងរបស់លោកប៉ុណ្ណោះ សម្រាប់ការធ្វើដំណើរទៅប្រកួតមិត្តភាព ដោយឡែកកីឡាករ ដែលត្រូវចាកចេញពីក្លិប លោកចង់ធ្វើវាឲ្យចប់រួចរាល់ មុនឡើងយន្តហោះទៅទឹកដីអាមេរិក នៅថ្ងៃច័ន្ទខាងមុខនេះ៕

-ចុចអាន៖ Man Utd នឹងទិញយក Schneiderlin មុនទៅប្រកួតមិត្តភាព

ប្រែសម្រួល៖ វិន ជីវ័ន្ត ប្រភព៖ mirror