ប្រុសដូចគ្នារៀបការ ផ្ដល់ជំនូនលុយសុទ្ធជិត៣ម៉ឺនដុល្លារ និងគ្រឿងមាសមួយចំនួន
- 2015-07-12 17:41:05
- ចំនួនមតិ 0 | ចំនួនចែករំលែក 0
ប្រុសដូចគ្នារៀបការ ផ្ដល់ជំនូនលុយសុទ្ធជិត៣ម៉ឺនដុល្លារ និងគ្រឿងមាសមួយចំនួន
ចន្លោះមិនឃើញ
ការទទួលស្គាល់អាពាហ៍ពិពាហ៍ភេទដូចគ្នានៅសហរដ្ឋអាមេរិក បានធ្វើឲ្យកក្រើកដល់ក្រុមអ្នកភេទដូចគ្នានៅតាមប្រទេសនានា។ កាលពីថ្ងៃសៅរ៍ម្សិលមិញនេះ បុរសជាគូស្នេហ៍មួយគូនៅប្រទេសថៃ បានសម្រេចចិត្តដឹកដៃគ្នាចូលរោងការតាមប្រពៃណី ជូនបណ្ណាការយ៉ាងច្រើន បើទោះបីអាជ្ញាធរមិនទទួលស្គាល់ក្ដី។
អាពាហ៍ពិពាហ៍ដ៏កក្រើក បានប្រព្រឹត្តទៅនៅស្រុក Phu Pha Man ខេត្ត Khon Kaen កាលពីថ្ងៃសៅរ៍ម្សិលមិញ។ គូស្នេហ៍ដ៏ស្មោះស្ម័គ្រមួយគូនេះ ម្នាក់បុរសឈ្មោះ Choengchai Plubpiboon អាយុ ៤២ឆ្នាំ ជាម្ចាស់ក្រុមហ៊ុនផលិតដែកថែប P.B. Metal Co Ltd និងម្នាក់ទៀតមានឈ្មោះ Uthane Korasing អាយុ ៣០ឆ្នាំ ដែលជាម្ចាស់ផ្ទះប្រារព្ធពិធីជ័យមង្គល។
គ្រួសារ ព្រមទាំងញាតិមិត្តទាំងសងខាង បានចូលរួមប្រសិទ្ធពរជ័យ ដល់គូស្នេហ៍ទាំងពីរយ៉ាងច្រើនកុះករ។ បើតាមប្រភពសារព័ត៌មានថៃ Bangkok Post បានឲ្យដឹងថា លោក Choengchai ដែលជាប្រធានក្រុមហ៊ុននោះ បានផ្ដល់បណ្ណាការដល់គ្រួសារលោក Uthane ជាប្រាក់ ១លានបាត(ជិត ៣ម៉ឺនដុល្លារ) និងគ្រឿងអលង្ការមាសមួយចំនួនទៀតដែលមានតម្លៃ ២០ម៉ឺនបាត (ជិត ៦ពាន់ដុល្លារ) ។
លោក Choengchai បាននិយាយថា ស្គាល់លោក Uthane ដែលជាគូអនាគតអស់រយៈពេល ១ឆ្នាំមកហើយ និងទើបសម្រេចចិត្តទាក់ទងគ្នាប៉ុណ្ណោះ។ លោក Uthane ជាកូនកសិករមែនពិត ប៉ុន្តែកាន់សញ្ញាប័ត្រថ្នាក់អនុបណ្ឌិត និងធ្វើការនៅក្រុមហ៊ុនជំនួញគ្រឿងសំណង់មួយនៅបាងកក។
“ពេលធ្វើការជាមួយគ្នា... យើងចាប់ផ្ដើមស្គាល់គ្នាទៅវិញទៅមក ហើយក៏រកឃើញផ្នត់គំនិត និងការឲ្យតម្លៃដូចគ្នា... ក្រៅពីនេះ យើងក៏ស្រលាញ់គ្រួសារគ្នាទៅវិញទៅមកដែរ... ដូច្នេះខ្ញុំសម្រេចចិត្តនេះ ជារឿងត្រឹមត្រូវសម្រាប់ខ្លួនឯង"។ លោក Uthane និយាយ។
ចំណែកលោក Thongchai Plubpiboon ដែលជាឪពុករបស់ Choengchai វិញបានបញ្ជាក់ថា កូនរបស់លោកបានប្រាប់លោកតាំងពី ១៥ឆ្នាំថា គេជាមនុស្សស្រលាញ់ប្រុសដូចគ្នា។ “គ្រួសារយើងទទួលស្គាល់កូន បើទោះបីទៅជាអ្វីក៏ដោយ... គេប្រឹងធ្វើការណាស់ ថែមទាំងជួយបង្កើតរបររកស៊ីឲ្យគ្រួសារទៀត អ៊ីចឹងហើយបានយើងមានគ្រប់យ៉ាង... អ្វីដែលគេត្រូវការពេលនេះ គឺដៃគូជីវិតដ៏ត្រឹមត្រូវ"។ លោក Plubpiboon និយាយ។
បុរសជាឪពុករូបនេះ បានបន្តទៀតថា នៅពេលកូនប្រាប់ពីរឿងចង់រៀបការជាមួយប្រុសដូចគ្នា លោកមានអារម្មណ៍ថារន្ធត់ខ្លាំងណាស់ ប៉ុន្តែក្រោយមកក៏សប្បាយចិត្តឡើងវិញ។ កូនប្រុសរកបានគូអនាគតដ៏ត្រឹមត្រូវហើយ ដូចនេះលោកត្រូវតែរីករាយ។ យ៉ាងណាក្ដី អាពាហ៍ពិពាហ៍នេះមិនស្របតាមច្បាប់ឡើយ ព្រោះថៃនៅមិនទាន់ទទួលស្គាល់អាពាហ៍ពិពាហ៍ភេទដូចគ្នាទេ៕
ប្រែសម្រួល៖ គង់ វិសាល ប្រភព៖ bangkokpost