Arsenal ឡើងយន្តហោះមកសិង្ហបុរី ត្រៀមប្រកួតនៅថ្ងៃពុធ

2015-07-13 18:42:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមកាំភ្លើងធំ Arsenal បានធ្វើដំណើរមកកាន់តំបន់អាស៊ីអាគ្នេយ៍ ប្រទេសសិង្ហបុរី កាលពីម្សិលមិញ ដោយក្រុមយក្សរបស់អង់គ្លេសមួយនេះ ត្រៀមប៉ះក្រុម Singapore Select XI នៅថ្ងៃពុធ ក្នុងការប្រកួត 2015 Premier League Asia Trophy។

ក្រុមរបស់លោក Arsène Wenger បានធ្វើដំណើរតាមយន្តហោះឯកជនមួយ ដែលជាដៃគូឧបត្ថម្ភធំរបស់ក្លិប Emirates និងបានចាកចេញពីទីក្រុងឡុងដុង កាលពីថ្ងៃអាទិត្យម្សិលមិញ។ ចំណែកឯអ្នកចាំទី Petr Cech ដែលទើបតែទិញពី Chelsea ក៏បានចូលរួមជាមួយមិត្តរួមក្រុមផងដែរ ដោយសង្ឃឹមថា នឹងអាចបង្ហាញខ្លួនឲ្យក្រុមថ្មីលើកដំបូង។

ពានរង្វាន់លក្ខណៈមិត្តភាព 2015 Premier League Asia Trophy មាន៤ក្រុមចូលរួម ក្នុងនោះក្រុម២ទៀតមកពី Premier League ដែរគឺ Everton និង Stoke City ហើយនឹងត្រូវប្រកួតខ្វែងគ្នារកជើងឯក និងរកចំណាត់ថ្នាក់លេខ៣។

ម្ចាស់ជើងឯក FA Cup (Arsenal) នឹងប៉ះ Singapore Select XI នៅថ្ងៃពុធ ទី១៥ ខែកក្កដា ខណៈដែល Everton ប៉ះ Stoke City ក្នុងថ្ងៃដូចគ្នា ប៉ុន្តែគូនេះប្រកួតមុន។ រីឯ២ក្រុមដែលឈ្នះ នឹងប៉ះគ្នានៅវគ្គផ្ដាច់ព្រ័ត្រ នាថ្ងៃសៅរ៍ ទី១៨ ខែកក្កដា ខណៈដែលក្រុម២ដែលចាញ់ នឹងត្រូវប្រកួតយកលេខ៣ នៅថ្ងៃដូចគ្នា។ ការប្រកួតទាំងអស់ នឹងត្រូវធ្វើឡើងនៅកីឡដ្ឋានជាតិសិង្ហបុរី៕