ប្រាក់ មុន្នីឧត្តម បានថតកុនហើយ សម្តែងជាតួឯកទៀត

2015-07-14 21:44:33
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាឆ្នើមប្រចាំក្លិបស្វាយរៀង និងជាសមាជិកជម្រើសជាតិកម្ពុជា ប្រាក់ មុន្នីឧត្តម បានចាប់ផ្តើមថតខ្សែភាពយន្តបាន១ថ្ងៃហើយ និងបានសម្តែងជាតួឯកថែមទៀតសម្រាប់ការថតកុនជាលើកដំបូងនេះ។

លោក សំ វ៉ាន់ដេត គ្រូបង្វឹកក្លិបបាល់ទាត់ស្វាយរៀងបានឲ្យដឹងថា ប្រាក់ មុន្នីឧត្តម បានចាប់ផ្តើមកុនកាលពីម្សិលមិញ ប៉ុន្តែលោកពុំបានដឹងច្បាស់ពីខ្សែភាពយន្ត និងផលិតកម្មអ្វីឡើយ។ លោកបាននិយាយថា ៖«ឧត្តមបានថតកាលពីម្សិលមិញ ខ្ញុំគ្រាន់តែដឹងថា គេថតនៅកំពង់ស្ពឺជាតួឯក តែខ្ញុំមិនដឹងថា រឿងអី ឬផលិតកម្មអ្វីឡើយ»។

លោកគ្រូបង្វឹករូបនេះបានបញ្ជាក់ថា ការថតកុនរបស់ ប្រាក់ មុន្នីឧត្តមមិនធ្វើឲ្យប៉ះពាល់ដល់អាជីពបាល់ទាត់របស់គេឡើយ ពីព្រោះសមាជិកក្លិបស្វាយរៀងរូបនេះអាចថតបាននៅពេលណាដែលរូបគេទំនេរពោលគឺទំនេរពីការហ្វឹកហាត់ និងលេងឲ្យក្លិបតែប៉ុណ្ណោះ។

ចំណែក ប្រាក់ មុន្នីឧត្តមវិញមិនអាចទាក់ទងសុំការបញ្ជាក់បានទេដោយសារទូរសព្ទចូលហើយគ្មានអ្នកលើក។

ប្រាក់ មុន្នីឧត្តមជាកីឡាករបាល់ទាត់មួយរូបដែលមានរាងសង្ហាមិនចាញ់តារាភាពយន្តឡើយ និងមានកេរ្តិ៍ឈ្មោះល្បីល្បាញក្នុងពិភពបាល់ទាត់នៅក្នុងប្រទេសកម្ពុជា។ កីឡាកររូបនេះជាខ្សែប្រយុទ្ធឆ្នើមប្រចាំក្លិបស្វាយរៀង និងជម្រើសជាតិកម្ពុជា។ រូបគេត្រូវបានផលិតកម្មភាពយន្តមួយចំនួនចាប់អារម្មណ៍ បន្ទាប់ពីលេចធ្លោខ្លាំងក្នុងព្រឹត្តិការណ៍កីឡាស៊ីហ្គេមឆ្នាំ២០១៥នេះ៕

អត្ថបទ៖ ជាន ចាន់រ៉ា