Man City ទិញបាន Sterling ផ្លូវការ និងឲ្យពាក់អាវលេខ៧

2015-07-15 16:26:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លិបមេឃខៀវ Manchester City បានប្រកាសទិញបានខ្សែបម្រើ Raheem Sterling ពី Liverpool នូវតម្លៃ៤៩លានផោន (ជិត៧៦លានដុល្លារ) និងចុះកុងត្រារយៈពេល៥ឆ្នាំ នៅកីឡដ្ឋាន Etihad Stadium ហើយកីឡាករវ័យ២០ឆ្នាំរូបនេះ នឹងពាក់អាវលេខ៧។

Man City បានដេញថ្លៃ Sterling ២លើកមកហើយ តែត្រូវបានហង្សក្រហមបដិសេធ ប៉ុន្តែសម្រាប់តម្លៃដេញថ្លៃលើកទី៣នេះ គឺក្លិបទាំង២បានព្រមព្រៀងគ្នា ខណៈដែលតម្លៃនេះមានន័យថា Sterling គឺជាកីឡាករអង់គ្លេស ដែលមានតម្លៃខ្លួនថ្លៃដាច់គេ និងជាកីឡាករថ្លៃជាងគេ នៅក្នុងប្រវត្តិសាស្ត្រក្លិប Man City។

ក្រោយទិញបាន Sterling អ្នកចាត់ការក្រុម Man City លោក Manuel Pellegrini បានសរសើរដល់កីឡាកររូបនេះ ជាកីឡាករល្អបំផុតម្នាក់លើលោក ដោយលោកនិយាយថា៖ "Raheem Sterling គឺជាខ្សែបម្រើប្រយុទ្ធដ៏ល្អបំផុត នៅក្នុងពិភពបាល់ទាត់ ហើយខ្ញុំនឹងរង់ចាំគាត់ ដើម្បីអាចចូលរួមក្រុមធ្វើដំណើរទៅប្រកួតមិត្តភាពនៅប្រទេសអូស្ត្រាលី ចុងសប្ដាហ៍នេះ។ គាត់ជាកីឡាករវ័យក្មេង និងមានសមត្ថភាពអស្ចារ្យ ហើយខ្ញុំជឿថាអ្នកគាំទ្រ Man City នឹងរំភើបខ្លាំង ពេលឃើញគាត់បង្ហាញខ្លួន"។

Sterling ដែលស៊ុតឲ្យ Liverpool បាន២៣គ្រាប់ ក្នុងការបង្ហាញខ្លួនសរុប១២៩ប្រកួត និងបង្ហាញខ្លួនឲ្យក្រុមជម្រើសជាតិអង់គ្លេស១៦ប្រកួត ស៊ុតបាន១គ្រាប់ នឹងទទួលបានថ្លៃឈ្នួលប្រចាំសប្ដាហ៍ ១៨០ ០០០ផោន (ជិត២៨ម៉ឺនដុល្លារ)៕