សារលិខិតបេះដូងរបស់ព្រះតេជគុណ សាន សុជា ផ្ញើជូនលោក អេ ភូថង

2015-07-15 16:30:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រះតេជគុណ សាន សុជា ដែលមានកេរ្តិ៍ឈ្មោះល្បីក្នុងវិស័យព្រះពុទ្ធសាសនាជុំវិញការសម្តែងព្រះធម៌ទេសនារបស់ព្រះអង្គបានរំភើបព្រះទ័យចំពោះទឹកចិត្តតស៊ូប្រឹងប្រែងរបស់លោក អេ ភូថង ដែលបាននាំមកនូវមុខមាត់ និងកិត្តិយសជូនជាតិ ប៉ុន្តែជីវិតរស់នៅរបស់អតីតអ្នកប្រដាល់ដ៏ល្បីរូបនេះមិនធូរធា។ ទីបំផុតព្រះតេជគុណអំពាវនាវឲ្យ អេ ភូថង មកទទួលការឧបត្ថម្ភរបស់ព្រះអង្គតាមលទ្ធភាពដែលព្រះអង្គអាចជួយបាន។

គណនី Facebook ឈ្មោះ គឹម សុវណ្ណាធា បានសរសេរថា ៖«សារលិខិតបេះដូងរបស់ព្រះគ្រូ សាន សុជា ផ្ញើជូនបងប្រុស អេ ភូថង! ក្រោយពេលស្តាប់ការរៀបរាប់របស់បងប្រុសក្នុងវីដេអូឃ្លីបនេះ ការតស៊ូរបស់បង ធ្វើឲ្យអាត្មារំភើបចិត្តណាស់។ តាមពិតអាត្មាមិនចូលចិត្តមើលការវាយតប់គ្នានោះទេ។ ម្យ៉ាងទៀតក្នុងភេទជាអ្នកបួសដូចអាត្មា រឹតតែមិនគួរពាក់ព័ន្ធនឹងរឿងនេះសោះឡើយ ប៉ុន្តែអ្វីដែលធ្វើឲ្យអាត្មារំភើបចិត្ត គឺការតស៊ូរបស់បងប្រុស ដែលយកជីវិតទៅប្តូរ ហើយបាននាំមកនូវកិត្តិយសឲ្យជាតិខ្មែរយើងមិនតិចទេ ប៉ុន្តែអ្វីដែលបងទទួលបាន មិនស័ក្ដិសមទៅនឹងការខិតខំប្រឹងប្រែងរបស់បងប្រុសទាល់តែសោះ»។

សារនេះបានបន្តថា ៖«នៅថ្ងៃទី២៧ អាត្មា រួមជាមួយក្រុមនិស្សិតអាហារូបករណ៍ សាកលវិទ្យាល័យបញ្ញាសាស្ត្រកម្ពុជា នឹងប្រារព្ធកម្មវិធីចែកអំណោយ និងសម្ដែងធម៌ដល់ប្រជាជនក្រីក្រនៅភ្នំពេញ ប្រសិនបើបងបានឃើញហើយ សូមអញ្ជើញមកជួបអាត្មាកុំខាន។ អាត្មានឹងជួយឧត្ថម្ភគ្រួសារបងតាមលទ្ធភាព (ពត៌មានលំអិត សូមទាក់ទងអ្នករៀបចំកម្មវិធីតាមទូរសព្ទលេខ ០១៦ ៥៨៣ ៥៥៣)»។

គ្រួសាររបស់លោក អេ ភូថង មានជីវភាពខ្វះខាតនៅឡើយ បើទោះជាលោកត្រូវបានគេដឹងគ្រប់គ្នាថា ជាអតីតអ្នកប្រដាល់ដ៏ល្បីឈ្មោះដែលមានខ្សែក្រវាត់លំដាប់ពិភពលោក។ មិនត្រឹមតែប៉ុណ្ណោះលោកកំពុងជួយបណ្ដុះបណ្ដាលកីឡាករប្រដាល់ជំនាន់ក្រោយ និងជួយចិញ្ចឹមក្មេងកំព្រាថែមទៀត បើទោះជាជីវភាពលំបាកក៏ដោយ ហើយលោកកំពុងរស់នៅក្នុងស្តាតចាស់ដែលមិនមែនជាផ្ទះផ្ទាល់ខ្លួនឡើយ។

ទោះជាដឹងថា លោកមានជីវភាពលំបាកយ៉ាងណាក៏ដោយ ក៏កម្រឃើញមានសប្បុរសជនណាជួយឧបត្ថម្ភគាំទ្រដល់ក្លិបកីឡាប្រដាល់អេភូថង និងជីវភាពគ្រួសាររបស់លោកណាស់។ ពេលនេះព្រះតេជគុណ សាន សុធា ងាកមកចាប់អារម្មណ៍នឹងជីវិតតស៊ូរបស់លោក៕