Arsenal បំបាក់សិង្ហបុរី ៤-០ យុវជនវ័យក្មេង Akpom រកបាន Hat-trick

2015-07-16 15:48:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមកាំភ្លើងធំ Arsenal បើកការប្រកួតលើកដំបូងរបស់ខ្លួនបានយ៉ាងល្អ ដោយបានបំបាក់ក្រុមម្ចាស់ផ្ទះសិង្ហបុរី ៤-០ ក្នុងការប្រកួតពានរង្វាន់ Barclays Asia Trophy កាលពីយប់មិញ ខណៈដែលកីឡាករឈុតយុវជន Chuba Akpom រកបាន Hat-trick។

កីឡាករវ័យ១៩ឆ្នាំ Akpom ដែលបានបន្តកុងត្រាជាមួយកាំភ្លើងធំរយៈពេលវែង កាលពីខែកុម្ភៈ ធ្លាប់បង្ហាញខ្លួនឲ្យឈុតធំ Arsenal តែ៤ប្រកួតប៉ុណ្ណោះហើយដូរចូលនៅចុងម៉ោងទៀត ប៉ុន្តែសម្រាប់ការប្រកួតនៅតំបន់អាស៊ីអាគ្នេយ៍យប់មិញ ខ្សែប្រយុទ្ធវ័យក្មេងរូបនេះ ធ្វើបាន Hat-trick តែម្ដង ដោយស៊ុតចូលនៅនាទី៣០, ៧៦ (ប៉េណាល់ទី) និងតែតចូលគ្រាប់ទី៤ នៅនាទី៧៩ ខណៈដែល Jack Wilshere ជាអ្នករកបានគ្រាប់ទី៣ នៅនាទី៦០ ដោយបាល់ពិន័យប៉េណាល់ទីដែរ។

រីឯការប្រកួត១គូទៀត ក្រុម Everton បានយកឈ្នះលើ Stoke City ដោយបាល់ប៉េណាល់ទីកាត់សេចក្ដី ៥-៤ បន្ទាប់ពីស្មើគ្នា ០-០ នៅម៉ោងធម្មតា។

ដូច្នេះក្រុមរបស់លោក Arsène Wenger នឹងត្រូវប៉ះ Everton នៅវគ្គផ្ដាច់ព្រ័ត្រ នាថ្ងៃសៅរ៍ចុងសប្ដាហ៍នេះ ខណៈដែល Stoke City ត្រូវប៉ះសិង្ហបុរី ប្រកួតយកលេខ៣ នៅថ្ងៃសៅរ៍ដូចគ្នា៕