ថៃ នរៈពិទូ មិនប្រាកដថា វិលចូលសិល្បៈវិញទេ

2015-07-17 20:41:31
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីត Freshie Boy លេខ ១ ឆ្នាំ ២០០៦ ថៃ នរៈពិទូ ដែលបានបាត់មុខពីសិល្បៈ កាលពីប្រមាណជា ពីរ បីឆ្នាំមុន ហើយសូម្បីតែកម្មវិធីអ្នករួមអាជីពក៏កម្របានឃើញគេបង្ហាញវត្តមានដែរ។ ថ្ងៃនេះ ពិទូ បានចេញមុខ និង បាននិយាយប្រាប់ Sabay ឲ្យដឹងថា "ការបាត់មុខពីសិល្បៈមួយរយៈធំនេះគឺដោយសារតែខ្ញុំជាប់រវល់នឹងការសិក្សា ហើយថ្មីៗនេះទើបនឹងបញ្ចប់វា។

តាមពិតការសិក្សានេះត្រូវចប់តាំងពីឆ្នាំមុនម្ល៉េះ តែព្រោះជាប់រវល់សិល្បៈទើបពន្យាររហូតមកដល់ពេលនេះ"។ បុរសមុខស្រស់រូបនេះបានបន្តថា៖ "ខ្ញុំរៀនផ្នែកគ្រប់គ្រង ហើយកំពុងតែស្វែងរកការងារដែលត្រូវនឹងជំនាញនេះដែរ។ ចំណែកការងារសិល្បៈវិញខ្ញុំមិនប្រាកដថាគួរចូលប្រឡូកឡើងវិញ ឬអត់ទេ តែបើទោះជាចូលវិញក៏មិនផុលផុសដូចលើកមុនដែរ”។

ចំពោះមូលហេតុវិញត្រូវបាន Freshie Boy ខាងលើប្រាប់ថា ចង់ចាប់ជំនាញឲ្យត្រូវនឹងការសិក្សាផ្នែកគ្រប់គ្រង។ ទោះជាយ៉ាងណាក៏ដោយមួយរយៈដែលគ្មានមុខនៅតាមកញ្ចក់ទូរទស្សន៍ក៏មានខាងផលិតកម្មនៅតែទាក់ទងមកជាបន្តបន្ទាប់ដែរ។ ពិទូ បន្ថែម។

ថៃ នរៈពិទូ គឺជាកូនប្រុសច្បងរបស់អ្នកស្រី ងិន ម៉ានីយ៉ា ដែលជាកវីនិពន្ធល្បីឈ្មោះរបស់ផលិតកម្មរស្មីហង្សមាស និង ឯកឧត្ដម ថែ នរៈសត្យា រដ្ឋលេខាធិការ និងជាអ្នកនាំពាក្យក្រសួងវប្បធម៌ និង វិចិត្រសិល្បៈ គឺជាឪពុករបស់ពិទូ ហើយពិទូ មានប្អូនស្រីពៅ ថៃ នារីសុជាតា ក៏ជាអតីត Freshies Girl លេខ២ ឆ្នាំ២០១០ ដូចគ្នាដែរ។ លោកបានប្រឡូកសិល្បៈពេញមុខបន្ទាប់ពីប្រឡង់ជាប់ Freshie Boy លេខ ១ កាលពីឆ្នាំ ២០០៦៕