នគរបាលនឹងពង្រាយកម្លាំងត្រួតពិនិត្យទ្រង់ទ្រាយធំនៅផ្លូវសំខាន់ៗចំនួន ៤

2015-07-21 23:12:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្ដម រុន រ័ត្នវាសនា ប្រធាននាយកដ្ឋាននគរបាល និង សណ្ដាប់ធ្នាប់សាធារណៈ មានប្រសាសន៍ថា ចាប់ពីខែ សីហា ខាងមុខនេះ សមត្ថកិច្ចនឹងពង្រាយកម្លាំងនៅគោលដៅ ៤ សំខាន់ ក្នុងនោះមានផ្លូវជាតិលេខ ១, ៤, ៥ និង ផ្លូវជាតិ លេខ ៦។ ការពង្រាយកម្លាំងនេះ គឺធ្វើឡើងក្នុងទ្រង់ទ្រាយធំក្នុង ១ គោលដៅមិនក្រោម ៣០ នាក់នោះទេ។

ហេតុអ្វីបានជា នគរបាលចរាចរណ៍ចាប់ផ្ដើមរឹតបន្តឹងតែផ្លូវជាតិទាំង ៤ នេះ?

- ដោយសារផ្លូវជាតិទាំង ៤ នេះ មានអត្រាគ្រោះថ្នាក់ចរាចរណ៍ខ្ពស់ជាងគេ - នេះគ្រាន់តែជាផែនការសាកល្បងប៉ុណ្ណោះ។ បន្ទាប់ពីអនុវត្តន៍សាកល្បងសមត្ថកិច្ចកិច្ចនឹងរឹតបន្តឹងផ្លូវចំនួន ៨ រាប់ចាប់ពីផ្លូវជាតិលេខ ១-៨។ ឯកឧត្ដម រុន រ័ត្នវាសនា និយាយ។

ការត្រួតពិនិត្យផ្លូវសំខាន់ៗ ទាំង ៤ នេះ គឺមិនមែនធ្វើឈប់ៗនោះទេ គឺធ្វើជាប្រចាំនៅតាមដងផ្លូវ ដើម្បីត្រួតពិនិត្យ៖

-ការបើកបរលើសល្បឿនកំណត់ -បើកបរខុសច្បាប់ផ្សេងៗ -យានជំនិះដែលពុំមានផ្លាកលេខជាដើម។

«ប្រសិនបើមានការចាំបាច់ វិធានការណ៍នេះ ក៏មិនខុសនឹងប្រទេសជឿនលឿនដែរ គឺយើងនឹងធ្វើការដេញចាប់រាល់យានជំនិះណា ដែលប្រព្រឹត្តិខុសនឹងច្បាប់ចរាចរណ៍ជើងគោក»។ នេះជាការបន្ថែមរបស់មន្ទីរទទួលបន្ទុកផ្នែកចរាចរណ៍ដដែល។

https://www.youtube.com/watch?v=2Px1V-gnpgU&feature=youtu.be

ការអនុវត្តខាងលើស្ថិតក្នុងគោលការណ៍ ៥ ចំណុចនៃអនុក្រឹត្យថ្មីដើម្បីរឹតបន្តឹងសុវត្ថិភាពចរាចរណ៍ និង ការគោរពច្បាប់ចរាចរណ៍ឲ្យមានប្រសិទ្ធភាពដោយក្នុងនោះរួមមាន៖ ១. ការអប់រំផ្សព្វផ្សាយច្បាប់ ២. ការត្រួតពិនិត្យលើដងផ្លូវជាតិ ៣. ការត្រួតពិនិត្យដើមទី(បច្ចេកទេសយានយន្ត អ្នកបើកបរ) ៤. ការត្រួតពិនិត្យសាលាបើកបរ (មានច្បាប់ ការបង្រៀនមានគុណភាព) និង ៥.ការកែច្នៃយានយន្តខុសច្បាប់៕

អាន៖ អនុក្រឹត្យថ្មី តម្លៃផាកពិន័យចរាចរណ៍កើនឡើងគុណនឹង ៥ តែស្ថិតនៅក្នុងដំណាក់កាលណែនាំ

អត្ថបទ៖ ប៊ិន ប៊ុណ្ណា