តារាខ្មែរល្បីៗ ២-៣នាក់ រងធម៌ក្ដៅរបស់ Facebook

2015-07-23 17:44:25
ចំនួនមតិ 0 | ចំនួនចែករំលែក 0

ចន្លោះមិនឃើញ

សិល្បករ សិល្បការិនីខ្មែរបីបួននាក់ សុទ្ធជាតារាល្បីៗ បានរងគ្រោះដោយសារ Facebook លេងធម៌ក្ដៅបិទគណនីរបស់ពួកគេឲ្យលែងប្រើប្រាស់កើតជាបន្តបន្ទាប់ក្នុងរយៈប្រមាណតែ១ខែតែប៉ុណ្ណោះ។

សិល្បករ សិល្បការិនីខ្មែរទាំងនោះ បេនីយុំាង អេនឌី និងតារាចម្រៀងផលិតកម្មថោន លី អ៊ីវ៉ាធីណា។ អេនឌី គឺជាតារាទី១ដែលបានគេដឹងថា គណនីហ្វេសប៊ុករបស់លោកត្រូវបានបិទ។ "ខ្ញុំមិនដឹងថា មានរឿងអីទេ ប៉ុន្តែស្រាប់តែសុខគេបិទ ខ្ញុំអត់មានអីប្រើទំនាក់ទំនងប្រិយមិត្ត ការងារអីក៏អត់បានទំនាក់ទំនងដែរមួយរយៈមុននេះ"។ អេនឌី ថ្លែង។

យ៉ាងណា ក្រោយពីខកខានប្រើប្រាស់ប្រមាណ១ខែ គណនីហ្វេសប៊ុករបស់ អេនឌី ត្រូវបានដំណើរជាធម្មតាវិញ។ អតីតតារាចម្រៀងហង្សមាសរូបនេះ ឲ្យដឹងថា ទម្រាំបានមកវិញពិតជាពិបាកណាស់ ដោយក្នុងនោះលោកត្រូវផ្ញើអត្តសញ្ញាណប័ណ្ណទៅឲ្យមិត្តនៅអាមេរិកជួយទើបបាន។

"ទោះបានមកវិញ ប៉ុន្តែត្រូវប្ដូរឈ្មោះទៅ Leav Piseth វិញតាមអត្តសញ្ញាណប័ណ្ណ។ គេមិនចង់ឲ្យផង ព្រោះ Account ចាស់ឈ្មោះ Andyទាល់តែខ្ញុំពន្យល់ថា ខ្ញុំជាអ្នកសិល្បៈ ត្រូវប្រើ Nick Name អីចឹងទៅ ទើបគេព្រម" អេនឌី បន្ថែម។

តារាខ្មែរម្នាក់ទៀត គឺតារាស្រីកំពុងឡើងកូដ បេនីយុំាង ក៏ត្រូវបាន Facebook លេងធម៌ក្ដៅដាក់ ដោយបិទគណនីរបស់នាងលែងឲ្យដំណើរការដែរ ដែលមកដល់ឥឡូវអស់រយៈពេលជាង១ខែមកហើយ។ ដូចនឹង អេនឌី ដែល តារាស្រីរូបនេះបញ្ជាក់ថា អត់ដឹងពីមូលហេតុពិតប្រាកដនៃការបិទគណនីនាងទេ។ ទោះយ៉ាងណា នាងបានកត់សម្គាល់ផ្ទាល់ខ្លួនថា ករណីនេះ បន្ទាប់ពីមានគណនីដែលក្លែងក្លាយដែលមានឈ្មោះ និងដាក់រូបថតនាងច្រើនពេក។

បេនីយុំាង បន្ថែមថា ដោយសារតម្រូវការចាំបាច់ នាងបានបើកគណនីថ្មីមួយទៀតដាក់ឈ្មោះ Kan Ya ប៉ុន្តែបានតែ២ថ្ងៃប៉ុណ្ណោះ គណនីមួយនេះ ក៏ត្រូវបានបិទទៀត។ សាមីខ្លួនដាក់ការសន្និដ្ឋានផ្ទាល់ខ្លួនថា Facebook កំពុងម៉ត់ចត់ចំពោះអ្នកប្រើប្រាស់របស់ខ្លួន ខណៈបច្ចុប្បន្នមានអ្នកប្រើប្រាស់ក្លែងក្លាយកាន់តែច្រើននៅលើបណ្ដារបស់ពួកគេ។ តើពិតជាអីចឹងមែន?

យ៉ាងណា គិតត្រឹមថ្ងៃនេះ មិនទាន់មានរបាយការណ៍ជាក់លាក់ណាបញ្ជាក់ពីករណីនេះ ចេញដោយ Facebook ឡើយ។ ប៉ុន្តែសាស្ត្រាចារ្យផ្នែកព័ត៌មានវិទ្យានៅសាកលវិទ្យាល័យបៀលប្រាយ លោក អ៊ូ ផាណារិទ្ធ បញ្ជាក់ថា តាមការសិក្សារបស់លោក Facebook បានអនុវត្តន៍នយោបាយថ្មីៗជាច្រើន ហើយការរឹតត្បិតចំពោះគណនីក្លែងក្លាយទំនងជា មួយក្នុងចំណោមនយោបាយទាំងនោះ។

“មិនត្រឹមតែគណនីក្លែងក្លាយទេ សូម្បីតែគណនីពិតរបស់យើងក៏ដោយ តែមាន Friends ក្លែងក្លាយច្រើន គេសង្ស័យ Facebook នឹង Block យើងបណ្ដោះអាសន្ន ហើយលេងល្បែងខ្លាឃ្លោកជាមួយយើងហ្មង។ គឺគេយកគណនីបីបួនដាក់រូបដើមឈើអីចឹងទៅ ហើយសួរថា មួយនេះនរណាគេៗ បើឆ្លើយត្រូវគេបើកឲ្យវិញ បើមិនត្រូវគឺគេបិទជាអចិន្ត្រៃយ៍តែម្ដង"។ លោក អ៊ូ ផាណារិទ្ធ បន្ថែម។

ជាដំបូន្មាន សាស្ត្រាចារ្យរូបនេះ ស្នើប្រិយមិត្តអ្នកប្រើបណ្ដាញសង្គម កុំចេះតែទទួល(Accept Friends) ដោយមិនបានពិនិត្យមើលឲ្យច្បាស់លាស់ឡើយ។ យ៉ាងណា នេះគ្រាន់តែវិធីមួយប៉ុណ្ណោះ តែមិនធានាថាសុវត្ថិភាព១០០%នោះទេ៕

តែ៣នាទីប៉ុណ្ណោះ អេនឌី អស់ប្រាក់រាប់ពាន់ដុល្លារ

យ៉ាងម៉េចដែរគ្នាយើង ប្រយ័ត្នប្រយែងណា!

អត្ថបទ៖ ទារិកា