ក្លិប​ហង្ស​ក្រហម​ Liverpool ទិញ​បាន​ខ្សែ​ប្រយុទ្ធ Christian Benteke ​ពី​ Aston Villa ​ផ្លូវ​ការ​ហើយ ក្នុង​តម្លៃ​៣២,៥​លាន​ផោន (ជាង​៥០​លាន​ដុល្លារ) ​​កាល​ពី​ម្សិល​មិញ ខណៈ​ដែល​ខ្សែ​បម្រើ​ Roberto Firmino ដែល​ទិញ​បាន​តាំង​ពី​ខែ​មុន​នោះ ក៏​បាន​​ចូល​រួម​ហ្វឹកហាត់​​​ដែរ បន្ទាប់​ពី​​ការ​សម្រាក​ក្រោយ​ចប់​ Copa America។

កីឡាករ​ជម្រើស​ជាតិ​បែលហ្សិក​ Benteke ​វ័យ​២៤​ឆ្នាំ ​បាន​ក្លាយ​ជា​កីឡាករ​ថ្លៃ​បំផុត​ទី​២ របស់​ហង្ស​ក្រហម និង​​ចុះ​កិច្ចសន្យា​រយៈពេល​វែង​​ជាមួយ​ក្លិប។ កីឡាករ​រូប​នេះ​ បាន​ក្លាយ​ជា​សមាជិក​ថ្មី​ទី​៧​ របស់​ Liverpool នា​រដូវ​ក្ដៅ​នេះ។

​​Benteke ស៊ុត​បញ្ចូល​ទី​បាន​ ៤២​គ្រាប់ តាំង​ពី​ឆ្នាំ​២០១២ នៅ​ Premier League ដោយ​ចាញ់​​កីឡាករ​តែ​៣​នាក់​ប៉ុណ្ណោះ​ ពោល​គឺ​ចាញ់​​ Sergio Aguero (៥៥​គ្រាប់), Luis Suarez (៥៣​គ្រាប់) និង​ Robin van Persie (៤៤​គ្រាប់)។

ចំណែក​ឯ​ខ្សែ​បម្រើ​ប្រេស៊ីល​ Firmino ​ដែល​ផ្ទេរ​ពី Hoffenheim ​នូវ​តម្លៃ​ថ្លៃ​បំផុត​ទី​៣ ក្នុង​​ប្រវត្តិសាស្ត្រ​ក្លិប​ ២៩​លាន​ផោន​ (ជាង​៤៥,៦​លាន​​ដុល្លារ) នោះ បាន​បង្ហាញ​ខ្លួន​​នៅ​ក្លិប​លើក​ដំបូង និង​បាន​ចូល​រួម​ហ្វឹកហាត់​ហើយ កាល​ពី​ម្សិល​មិញ​ដែរ។

​Benteke ​និង​ Firmino ​​នឹង​ចាប់​ដៃ​គូ​គ្នា​ នៅ​តំបន់​ប្រយុទ្ធ​ខាង​លើ​ដ៏​សំខាន់ សម្រាប់​ក្រុម​ Liverpool នៅ​រដូវ​កាល​ថ្មី​ខាង​មុខ​នេះ៕

ចុះ​ប្រិយមិត្ត​ជឿ​ថា Liverpool អាច​ទទួល​បាន​តំណែង​ Top4 ឬ​អត់​ រដូវ​កាល​ថ្មី​​ខាង​មុខ​នេះ?

-ចុចអាន៖ Liverpool ​ទៅ​ដល់​ម៉ាឡេស៊ី ត្រៀម​ប្រកួត​ចុង​ក្រោយ មុន​ត្រឡប់​ទៅ​អឺរ៉ុប​វិញ

​ប្រែ​សម្រួល៖ វិន ជីវ័ន្ត ​ប្រភព៖ dailymail