ឥឡូវឧបករណ៍ភ្លេងខ្មែរ ក៏អាចប្រគំបទអន្តរជាតិបានដែរ?

2015-07-27 17:59:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមការងារគោព្រៃស្ទូឌីយូ បានបង្ហាញឧបករណ៍តន្ត្រីខ្មែរ ៦ ប្រភេទ ដែលអាចប្រគំបញ្ចូលជាបទ " See You Again” បានពីរោះរណ្ដំ រួមមាន រនាត ខ្សែដៀវ ចាប៉ីដងវែង ខ្លុយ ទ្រខ្សែ៣ និង ស្គរយីកេ ជាដើម។

លោក ជា សត្យា(កណ្ដាល)

បទនេះត្រូវចំណាយពេល ២ ខែទើបអាចសម្រេចបានជាសាច់ភ្លេងសុទ្ធមានរយៈពេលជិត ៤ នាទី និង ប្រគំដោយតន្ត្រីករបុរាណលោក ចឹក ស៊ីណាត។ តំណាងក្រុមការងារគោព្រៃ លោក ជា សត្យា បញ្ជាក់ថា ការបង្កើតប្រធានបទនេះឡើងក្នុងគោលបំណង គឺលើកស្ទួយ និង ជំរុញបន្ថែមឱ្យប្រជាជនខ្មែរប្រើប្រាស់ភ្លេងខ្មែរអស់សក្ដានុពល ជាពិសេសជនបរទេសកាន់តែកោតស្ញប់ស្ញែងពីអ្វីដែលខ្មែរមាន។

លោក ជា សត្យា និយាយថា៖ "ខ្ញុំយល់ថា បើអាច គួរតែប្រើឧបករណ៍តន្ត្រីបុរាណក្នុងការផលិតបទចម្រៀង ឬភ្លេងរណបក្នុងសាច់រឿងកុន ជាដើម"។ លោកបន្តថា នេះក៏ជារួមចំណែកថែរក្សាលើកស្ទួយបន្តវេនឧបករណ៍តន្ត្រីបុរាណទាំងអស់ឱ្យមានជីវិតសម្រាប់យុវជនជំនាន់ក្រោយបានស្គាល់បានស្ដាប់ និងបង្ហាញពីកម្លាំងសាមគ្គីរបស់ស្ថាបនិកទាំងអស់ ដែលបានចូលរួម និង បញ្ជាក់ថា សាមគ្គីភាពជាធ្លុងមួយពិតជាអាចបង្កើតសមិទ្ធផលដ៏អស្ចារ្យបាន។

តំណាងក្រុមរូបនេះបញ្ជាក់ថា តាមរយៈសាច់ភ្លេង សមាជិកក្រុមមានបំណងស្វែងរកដៃគូសហការ ដើម្បីថតយកវីដេអូស្ដីពីតំបន់ទេសចរណ៍សំខាន់ៗនៅប្រទេសកម្ពុជា តាមរយៈសាច់ភ្លេងនេះ ដល់ភ្ញៀវជាតិ និង អន្តជាតិស្គាល់ពីកម្ពុជាកាន់តែច្រើនឡើង។ ជាមួយគ្នានោះ តំណាងក្រុមការងារគោព្រៃបានបញ្ជាក់ថា ក៏មានគម្រោងផលិតបទបទភ្លេងថ្មីជាច្រើនទៀត ដោយប្រើឧបករណ៍ភ្លេងបុរាណខ្មែររាប់សិបប្រភេទ ដែលកូនខ្មែរជំនាន់ក្រោយមិនសូវបានស្គាល់នោះទេ៕