គៀត សុវណ្ណាឡាង មិនមែន១ មិនមែន២ តែ៣រឿង

2015-07-29 17:18:32
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង ឈានចាប់អាជីពចម្រៀង គៀត សុវណ្ណាឡាង ចាប់បានតំណែងតួឯកមិនមែន១ មិនមែន២ តែដល់ទៅ៣រឿងឯណោះ បន្ទាប់ពីបានវិលមកបន្តអាជីពសម្ដែងវិញ ក្រោយខកខានអស់៤ឆ្នាំ។

ដំណើរវិលត្រឡប់លើកនេះ សាមីខ្លួនអះអាងថា តបតាមការស្នើសុំរបស់ប្រិយមិត្តជាច្រើនដែលចង់ឃើញការសម្ដែងរបស់នាងវិញ។ ម្ចាស់បទ "ល្ងង់ៗទើបមិនឈឺចាប់" រូបនេះ អះអាងបន្ថែមថា មានផលិតកម្មច្រើនបានទាក់ទងចង់បាននាងដាក់ក្នុងភាពយន្តរបស់គេ ប៉ុន្តែនាងទទួលតែ៣រឿងប៉ុណ្ណោះ មានទាំងរឿងដុំ និងភាគ។

តាមសារអេឡិចត្រូនិក សុវណ្ណាឡាង មិននិយាយអ្វីវែងឆ្ងាយឡើយចំពោះភាពយន្តទាំង៣ សូម្បីចំណងជើង។ "សុំទោស ប្រាប់អត់ទាន់បានទេ...ព្រោះគេអត់អោយប្រាប់ ទាល់តែថតចប់ ទើបអាចប្រាប់បាន"។ សុវណ្ណាឡាង។ បើទោះសាមីខ្លួនមិនប្រាប់ ប៉ុន្តែមួយរឿងក្នុងចំណោមនោះ ត្រូវបានគេដឹងថារឿង "ម៉ែដោះក្រមុំ" របស់ផលិតកម្ម LD ហើយនាងសម្ដែងជាមួយ ប៉ែន ចំរុង។

ទន្ទឹមនឹងការបង្ហើបពីការក្ដាប់បានតំណែងតួឯកដល់ទៅ៣រឿង ដែលកំពុងដំណើរថតនេះ តារាស្រីទទួលបានការចាប់អារម្មណ៍ក្នុងរឿង "ទឹកចិត្តបងស្រី" រូបនេះ ប្រាប់ថា នាងក៏បានរបូតបាត់អស់៥រឿងទៅហើយដែរ។ ប្រការនេះ ក៏ព្រោះតែនាងរង់ចាំការយល់ព្រមពីផលិតកម្មហង្សមាស ខណៈនាងគឺជាតារាចម្រៀងរបស់ផលិតកម្ម ភ្លេងរីខត បុត្រសម្ព័ន្ធមួយរបស់ផលិតកម្មខាងលើ។

“ពីមុនគាត់(ផលិតកម្ម)អត់ព្រមទេ តែក្រោយមកគាត់យល់វិញ ហើយខ្ញុំបោះបង់ចោលអស់ ៥រឿងហើយ"។ សុវណ្ណាឡាង ថ្លែង។

រឿងទាំងបីខាងលើ កំពុងដំណើរថត រឿងខ្លះក៏ត្រៀមនឹងបញ្ចប់។ តារាស្រីរូបនេះ ប្រាប់ថា ក្រោយពីបានភ្លើងខៀវពីផលិតកម្មរបស់នាង នាងនឹងទទួលថតភាពយន្តបន្តបន្ទាប់ទៀតនាពេលខាងមុខ ដើម្បីបម្រើអារម្មណ៍ប្រិយមិត្ត។

គៀត សុវណ្ណាឡាង បានឈានមកចាប់អាជីពចម្រៀងអំឡុងឆ្នាំ ២០១១ បន្ទាប់ពីបានសម្ដែងចប់រឿង "ទឹកចិត្តបងស្រី" ជាតួឈ្មោះ នាងភ័ណ្ឌ ត្រូវប្អូនស្រីរបស់ នី មល្លិកា។ ក្រោយចូលជាមួយហង្សមាស ហើយត្រូវបានគេរុញឲ្យមកក្លាយជាតារាចម្រៀងរបស់ ភ្លេងរីខត នាពេលបន្ទាប់។ សុវណ្ណាឡាង បានចេញបទផ្ទាល់ខ្លួនមួយដូចជា "ល្ងង់ទើបមិនឈឺចាប់" និងបទ "យឺតពេលហើយ" ជាដើម៕

ហេង ពិទូ ភ្ញាក់ផ្អើលនឹងឈ្មោះលោកត្រូវបានតែងតាំងជាអភិបាលរង

អត្ថបទ៖ ទារិកា