គន្លឹះសំខាន់៦យ៉ាង ធ្វើឲ្យស្អាត មិនបាច់ប្រើម្សៅក្រែម

2014-10-14 17:44:06
ចំនួនមតិ 0 | ចំនួនចែករំលែក 0

ចន្លោះមិនឃើញ

បញ្ហាដែលសំខាន់បំផុតសម្រាប់សុភាពនារីគ្រប់រូបតែងតែយកចិត្តទុកដាក់នោះ គឺសម្រស់។ ថ្ងៃនេះ Sabay នឹងបង្ហាញពីគន្លឹះសំខាន់៦ធ្វើឲ្យសុភាពនារីមើលទៅស្រស់ស្អាតដោយមិនបាច់ប្រើម្សៅក្រែម៖

១. លាងសម្អាតមុខរៀងរាល់ពេលព្រឹក និងពេលយប់

ប្រសិនបើអ្នកចង់ស្រស់ស្អាតដោយមិនចាំបាច់ប្រើក្រែមម្សៅ អ្នកគួរតែលាងសម្អាតផ្ទៃមុខរៀងរាល់ពេលព្រឹក និងពេលយប់។ ការលាងបែបនេះអាចជួយកម្ចាត់មុនចេញពីមុខ និងធ្វើឲ្យស្បែកមើលទៅមានភាពស្រស់ថ្លា។

២. ប្រើផលិតផលដែលត្រូវនឹងប្រភេទស្បែក ដោយប្រើដៃថ្មមៗ

ការលាងសម្អាតផ្ទៃមុខខ្លាំងៗ ធ្វើឲ្យខូចកោសិកាស្បែក ធ្វើឲ្យស្បែកក្រហម និងស្ងួត ដូចនេះត្រូវលាងមុខដោយកាយវិការទន់ភ្លន់ ថ្មមៗ។ អ្វីដែលសំខាន់ដែរនោះ គឺត្រូវប្រើផលិតផលលាងសម្អាតដែលត្រូវជាមួយនឹងស្បែករបស់អ្នក។

៣. ប្រើផលិតផលផ្ដល់ជាតិសំណើម

អ្នកត្រូវការជ្រើសរើសផលិតផលដែលផ្ដល់ជាតិសំណើមបន្ទាប់ពីលាងសម្អាតមុខ ដើម្បីរក្សាស្បែកឲ្យមានសុខភាពល្អ និងក្មេងជាងវ័យ។ វាអាចជាការលំបាកក្នុងការជ្រើសរើសយកផលិតផលផ្ដល់ជាតិសំណើមត្រឹមត្រូវ ប៉ុន្តែផលិតផលផ្ដល់ជាតិសំណើម គឺជាគន្លឹះដែលជួយឲ្យស្បែកស្រស់ស្អាត។ រកមើលផលិតផលផ្ដល់ជាតិសំណើមមាន SPF ៣០ ដើម្បីការពារស្បែករបស់អ្នកពីកាំរស្មីព្រះអាទិត្យ។

៤. ប្រើប្រេងក្រមួនជំនួសម៉ាស្ការ៉ា

វាស្ដាប់មើលទៅដូចជាចម្លែក ប៉ុន្តែការប្រើប្រេងក្រមួនជំនួសម៉ាស្ការ៉ាជាវិធីល្អមើលទៅមានភាពស្រស់ស្អាតដោយមិនចាំបាច់មានការតុបតែងមុខ ដោយគ្រាន់តែយកប្រេងក្រមួនលាបលើរោមភ្នែកដើម្បីឲ្យរោមភ្នែករបស់អ្នកបញ្ចេញពន្លឺ។

៥. ប្រើប្រេងដូងជំនួសឲ្យថ្នាំលាបបបូរមាត់

សុភាពនារីទាំងអស់អាចប្រើប្រេងដូងជំនួសឲ្យថ្នាំលាបបបូរមាត់បាន។ ថ្នាំលាបបបូរមាត់ភាគច្រើនមានផ្ទុកសារធាតុគីមីដែលធ្វើឲ្យបបូរមាត់ស្ងួត។ គ្រាន់តែលាបប្រេងដូងតែបន្តិចនឹងជួយរក្សាសំណើមដល់ស្បែកបបូរមាត់ និងអាចព្យាបាលបបូរមាត់ដែលប្រះស្ងួតបានថែមទៀតផង។

៦. ទទួលទានអាហារត្រឹមត្រូវ

ប្រសិនបើស្បែកមានសុខភាពល្អហើយ អ្នកមិនចាំបាច់តុបតែង លាបប្រេងម្សៅបន្ថែមទៀតនោះទេ។ អាហារដែលអ្នកទទួលទានប្រចាំថ្ងៃ ក៏បានដើរតួនាទីយ៉ាងសំខាន់ក្នុងការថែរក្សាសុខភាពស្បែករបស់អ្នកផងដែរ ដូច្នេះត្រូវធ្វើឲ្យប្រាកដថារបបអាហារនោះ ជាអាហារដែលល្អចំពោះសុខភាព។ អាហារដែលផ្ដល់សុខភាពល្អដល់ស្បែកមានដូចជា បន្លែ និងផ្លែឈើជាដើម។

ចុចអានអត្ថបទសុខភាព និងសម្រស់ជាច្រើនទៀត

ប្រែសម្រួល៖ទ្រី រ៉ាវី

ប្រភព៖ womanitely