Rooney៖ ជារឿងអស្ចារ្យសម្រាប់កូនខ្ញុំ ដែលឃើញខ្ញុំពាក់អាវ Everton

2015-08-03 22:27:14
ចំនួនមតិ 0 | ចំនួនចែករំលែក 0

ចន្លោះមិនឃើញ

Wayne Rooney ប្រធានក្រុមបិសាចក្រហម Manchester United បានលើកឡើងថា វាជារឿងដ៏អស្ចារ្យមួយ ដែលកូនប្រុស និងប្រពន្ធរបស់ខ្លួន បានមើលលោកពាក់អាវក្រុម Everton ដែលជាក្រុមនៅស្រុកកំណើតរបស់ខ្លួន នាទីក្រុង Liverpool ម្ដងទៀត ក្នុងការប្រកួតមិត្តភាពកាលពីយប់មិញ។

Kai កូនប្រុសច្បងរបស់ Rooney

Rooney ដែលកើតនៅទីក្រុង Liverpool បានចាកចេញពីក្លិបនៅកីឡដ្ឋាន Goodison Park នេះ អស់ពេល១១ឆ្នាំមកហើយ ប៉ុន្តែខ្សែប្រយុទ្ធរូបនេះ បានត្រឡប់ទៅលេងឲ្យក្រុម Everon ១ប្រកួតកាលពីម្សិលមិញ ក្នុងការប្រកួតសប្បុរសធម៌របស់វីរបុរសក្លិបលោក Duncan Ferguson ខណៈដែលលទ្ធផលគឺEverton បានចាញ់ក្រុម Villarreal ២-១ ហើយប្រធានក្រុមអង់គ្លេសរូបនេះ ពុំអាចស៊ុតបញ្ចូលទីបានទេ។

កីឡាករវ័យ២៩ឆ្នាំរូបនេះ បានស្គាល់ភរិយាបច្ចុប្បន្ន Coleen តាំងពីនៅវ័យជំទង់ នៅទីក្រុងកំណើត Liverpool ប៉ុន្តែកូនៗប្រុសរបស់គេ Kai វ័យ៥ឆ្នាំ និង Klay វ័យ២ឆ្នាំ បានឃើញខ្សែប្រយុទ្ធរូបនេះ ជាវីរបុរសរបស់ក្រុម Man Utd តែម្ដង តាំងពីកើតមក។

យ៉ាងណាក្ដី Rooney បានប្រាប់ដល់ Everton TV ថា៖ "វាហាក់ដូចជាចម្លែកបន្តិចសម្រាប់រូបខ្ញុំនៅថ្ងៃនេះ ប៉ុន្តែខ្ញុំពិតជារីករាយជាមួយនឹងអ្នកគាំទ្រ។ នេះក៏ជារឿងដ៏អស្ចារ្យមួយ សម្រាប់រូបខ្ញុំ កូនរបស់ខ្ញុំ និងភរិយារបស់ខ្ញុំដែរ ដែលពួកគេបានឃើញខ្ញុំពាក់អាវឲ្យក្រុម Everton ម្ដងទៀត"។

Rooney ដែលចាកចេញពីក្លិបនៅស្រុកកំណើតតាំងពីវ័យ១៨ឆ្នាំ នឹងត្រូវដឹកនាំក្រុមបិសាចក្រហម Man Utd ប៉ះក្រុម Tottenham Hotspur ក្នុងការប្រកួតបើកឆាករដូវកាលថ្មី Premier League នាថ្ងៃសៅរ៍ ទី០៨ ខែសីហា ចុងសប្ដាហ៍ខាងមុខនេះជាបន្តទៀត៕