រឿងគួរធុញទ្រាន់៧យ៉ាង គូស្នេហ៍តែងយកមកសាងភាពរីករាយជាមួយគ្នា

2015-08-04 19:07:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ការចម្អិនអាហារ ឬដើរផ្សារទិញឥវ៉ាន់ អាចជារឿងគួរឲ្យធុញទ្រាន់សម្រាប់មនុស្សជាច្រើន ជាពិសេសគឺសុភាពបុរសតែម្ដង។ យ៉ាងណាមិញ គូស្នេហ៍ដែលស្រលាញ់គ្នាដោយស្មោះចេញពីចិត្តពិត បែរជាអាចយករឿងទាំងនេះមករីករាយជាមួយគ្នា ដោយគ្មានការទើសទាល់។

១. ដើរផ្សារទិញឥវ៉ាន់

សុភាពបុរសជាច្រើនធុញទ្រាន់បំផុតរឿងដើរផ្សារក្នុងហ្វូងមនុស្ស ដែលពោរពេញដោយសំឡេងអឺងកង និងចំណាយពេលអត់ប្រយោជន៍។ ទោះយ៉ាងណា នៅពេលបានដើរជាមួយនារីដែលខ្លួនស្រលាញ់ គេបែរជាគិតថារីករាយ និងគ្មានភាពនឿយហត់ឡើយ។

២. មើលទូរទស្សន៍ទាំងថ្ងៃ

ទូរទស្សន៍អាចធ្វើឲ្យអ្នកស្រស់ស្រាយ នៅពេលមើលចំកម្មវិធីគួរឲ្យចាប់អារម្មណ៍ប៉ុណ្ណោះ ប៉ុន្តែបើខុសពេល ខុសកម្មវិធី វាប្រាកដជាគួរឲ្យធុញទ្រាន់។ យ៉ាងណាមិញ គូស្នេហ៍ជាច្រើនបែរជាអាចរីករាយជាមួយគ្នា តាមរយៈការមើលទូរទស្សន៍ទាំងថ្ងៃ ព្រោះអាចលើកប្រធានបទពីទូរទស្សន៍នោះ មកនិយាយគ្នាលេង ហើយបើចំរឿងស្នេហាលន្លង់លន្លោចទៀត រឹតតែធ្វើឲ្យមានអារម្មណ៍កក់ក្ដៅ។

៣. ចម្អិនអាហារ

ចម្អិនអាហារជាមួយមនុស្សដែលខ្លួនស្រលាញ់ ពិតជារឿងរីករាយបំផុត ព្រោះអាចស្វែងយល់ពីគ្នាទៅវិញទៅមក និងបង្ហាញពីទឹកចិត្តជួយគ្នា។ នារីភាគច្រើនរំភើបចិត្តខ្លាំង ពេលបុរសក្នុងបេះដូងពាក់អាវចុងភៅ ជួយកិច្ចការយ៉ាងរីករាយ។

៤. រង់ចាំនៅកន្លែងណាមួយ

មនុស្សគ្រប់រូបពិតជាស្អប់ពាក្យថារង់ចាំណាស់ ប៉ុន្តែសម្រាប់គូស្នេហ៍វិញមិនធុញទ្រាន់ឡើយ ហើយអាចយកពេលនេះមករីករាយជាមួយគ្នាទៀតផង។ នៅធនាគារ កន្លែងចាំឡានក្រុង គូស្នេហ៍អាចឃើញមនុស្សជាច្រើនដើរកាត់ រួចបង្កើតសាច់រឿងនិយាយគ្នាមិនចេះចប់។

៥. អាន

អានកាសែត ទស្សនាវដ្ដី ឬសៀវភៅប្រលោមលោកសម្រាប់មនុស្សដែលខ្លួនស្រលាញ់ ក៏អាចបង្កើតភាពរីករាយបានដែរ។ ការអានជារឿងធុញទ្រាន់ពេលនៅម្នាក់ឯង ប៉ុន្តែពេលនៅជាមួយគូស្នេហ៍ អ្នកប្រាកដជាយល់អារម្មណ៍រំភើបមិនធ្លាប់ជួប។

៦. ធ្វើកិច្ចការផ្ទះ

ប្រសិនបើមិត្តប្រុសអ្នកត្រូវសរសេរកិច្ចការស្រាវជ្រាវ ឬបញ្ចប់ការងារដែលពីកន្លែងធ្វើការ អ្នកប្រាកដជាចង់ទៅអង្គុយក្បែរ បើទោះបីរឿងនោះគួរឲ្យធុញទ្រាន់សម្រាប់អ្នកដទៃយ៉ាងណាក្ដី។ ចង់ស្ដាប់ការរអ៊ូរទាំដ៏យ៉ាប់ៗរបស់គេ និងប្រាប់គេថានេះជារឿងធម្មតា នរណាក៏ជួបដែរ។

៧. អង្គុយដោយស្ងៀមស្ងាត់

ស្ងៀមស្ងាត់អាចជារឿងគួរឲ្យធុញបំផុត សម្រាប់មនុស្សជាច្រើន ប៉ុន្តែសម្រាប់គូស្នេហ៍ទើបស្រលាញ់គ្នាដំបូង បែរជាអាចទ្រាំទ្រស្ថានភាពនេះបាន។ មនុស្សទើបធ្លាក់ក្នុងអន្លង់ស្នេហ៍គ្រាដំបូង ច្រើនប្រើភាសាបេះដូង និងក្រសែភ្នែកជាងការនិយាយស្ដី៕

ធ្លាប់ធ្វើបានប៉ុន្មានចំណុចដែរ?

ចុចអាន៖ ប៉ុន្មានចំណុចនេះមែនទេដែលជាការចងចាំនៃស្នេហ៍គ្រាដំបូង?

ចុចអាន៖ គូស្នេហ៍ថ្មីថ្មោងគួរឆ្លើយសំនួរ៧ មុនសម្រេចចិត្តយកកូន

ប្រែសម្រួល៖ គង់ វិសាល ប្រភព៖ allwomenstalk