ពែកមី បកស្រាយរឿងពីក្រោយបទ "ទឹកភ្នែកបងថ្លៃ"

2015-08-06 13:21:53
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាកំប្លែងនាយ ពែកមី បានពោលកាលពីថ្ងៃសម្ពោធរឿង"2Fathers" ថាបទចម្រៀងថ្មី "ទឹកភ្នែកបងថ្លៃ"ដែលមានការចូលរួមសម្តែងទាំងប្រពន្ធកូន នោះគឺមិនមែនជារឿងពិតរបស់លោកទេ។

"បទហ្នឹងគឺជាការនិពន្ធដើម្បីជាភាពទាក់ទាញឲ្យទស្សនិកជនមានការចាប់អារម្មណ៍តែប៉ុណ្ណោះបើសិនជាការពិតធ្វើម៉េចប្រពន្ធខ្ញុំព្រមថត"។ ពាក់មី ថ្លែងដូច្នេះ កាលពីសម្ពោធរឿង "2Brothers" បន្ទាប់ពីប្រិយមិត្តលើបណ្ដាញសង្គម មន្ទិលថា "ទឹកភ្នែកបងថ្លៃ" ច្រៀងដោយនាយ ក្រាន់ នោះ ជាងរឿងពិតរបស់នាយ។

ទោះយ៉ាងណា តារាកំប្លែង ឈានមកធ្វើជាអ្នកនិពន្ធ និងដឹកនាំរឿងរូបនេះ បញ្ជាក់ថា អ្វីដែលលោកបានធ្វើ គឺដើម្បីប្លែក និងបើកឱកាសឲ្យសាច់ញាតិរបស់លោក មានឱកាសចូលសម្តែងនៅក្នុងវិស័យសិល្បៈដែរប៉ុណ្ណោះ។ លោក ថ្លែងថា "ខ្ញុំមានថ្ងៃនេះក៏ដោយសារសិល្បៈ អីចឹងខ្ញុំមានបំណងចង់ឲ្យប្រពន្ធកូនបងប្អូនខ្ញុំបានចូលសម្តែងជាមួយខ្ញុំដែរទើបបានទៅជាសាច់រឿងចឹងទៅ ព្រោះពួកគេមិនដែលបានសម្តែងទេ អីចឹងក៏ធ្វើទៅ និងជួយបើកទីផ្សារឲ្យអាក្រាន់ផងហ្នឹងណា"។ ដោយសារសុទ្ធជាលើកដំបូងទាំងអស់សម្រាប់ ភរិយា រួមទាំងកូន ពែកមី ថាមានការពិបាកខ្លះដែរក្នុងការដឹកនាំថត ក្នុងនោះទាល់តែរំលឹកឲ្យនឹកឃើញពីជីវិតកម្សត់កាលពីមុនទើបយំចេញ។ "ចំណែកកូន វាយំដែរតែដូចអត់ដល់ អីចឹងទាល់តែអាក្រាន់ចាប់ក្តិចបានយំដល់"។ ពែកមីបន្ថែម។

អតីតកម្មករសំណង់រូបនេះ បានបញ្ជាក់ជាថ្មីថា អត្ថន័យនៃបទចម្រៀងខាងលើ មិនមែនជាការពិតក្នុងការឆ្លុះបញ្ចាំងតថភាពជីវិតរបស់គ្រួសារនាយឡើយ។ មិនតែប៉ុណ្ណោះបទនេះចង់បង្ហាញជូនឬក៏ជាសារអប់រំមួយដើម្បីផ្ញើទៅដល់បងប្អូនប្រជាពលរដ្ឋខ្មែរផងដែរ។

នៅពីក្រោយបទនេះតារាកំប្លែងកំពុងពេញនិយមពីសំណាក់ទស្សនិកជននាពេលបច្ចុប្បន្នបានបន្តដោយលើកហេតុផលទៀតថាវាជារឿងពិតដែលនាយតែងតែសង្កេតឃើញនៅក្នុងសង្គមសព្វថ្ងៃជាក់ស្តែងតែម្តង។

យ៉ាងណាមិញតារាកំប្លែងមានស្រុកកំណើតមកពីខេត្តស្វាយរៀងរូបនេះបានរំលឹកទៅជីវប្រវត្តិកម្សត់មុនពេលចូលសិល្បៈថានាយធ្លាប់តែធ្វើការងារសំណង់ជីវិតក្រីក្រលំបាកមានព្រឹកខ្វះល្ងាចហើយពេលបានមកចូលសិល្បៈធ្វើឲ្យលោកមានមុខមាត់រហូតដល់មកសព្វថ្ងៃនេះ។ដូច្នេះបើក្រុមគ្រួសារនាយបានចូលក្នុងវិស័យសិល្បៈដែរលោករិតតែសប្បាយចិត្ត។ ជាមួយគ្នានេះ នាយ ពែកមី បង្កើតស្នាដៃផលិតបាន២រឿងទីមួយនោះគឺ" 2Brothers” និងថ្មីៗនេះទើបតែដាក់បញ្ចាំងគឺរឿង"2Fathers”៕