Memphis Depay ​មាន​ទំនុក​ចិត្ត​ខ្ពស់​លើ​ខ្លួន​ឯង​ដោយ​បាន​ពាក់​អាវ​លេខ​៧​របស់​បិសាច​ក្រហម Manchester Unitd ​ហើយ​សង្ឃឹម​ថា​អាវ​នេះ​នឹង​អាច​ជួយ​រូប​គេ​ឱ្យ​មាន​ឈ្មោះ​ល្បី​ល្បាញ​បាន។

Angel di Maria ​បាន​ចាកចេញ​ពី Man Utd ​ទៅ PSG ​កាល​ពី​សប្ដាហ៍​មុន​នេះ​ដោយ​បន្សល់​ទុក​នូវ​អាវ​លេខ​៧​ឱ្យ​នៅ​ទំនេរ។ ភ្លាម​នោះ Depay ​បាន​សុំ​លោក​ Van Gaal ​រ៉ាប់រង​អាវ​មួយ​នេះ ដោយ​សន្យា​ថា​នឹង​ប្រឹងប្រែង​ឱ្យ​អស់​ពី​សមត្ថភាព។

ខ្សែ​បម្រើ​ប្រយុទ្ធ​វ័យ​២១​ឆ្នាំ​រូប​នេះ​បាន​និយាយ​ថា៖ "បាទ ពិត​ណាស់​ខ្ញុំ​កំពុង​ពាក់​អាវ​ដែល​មាន​សម្ពាធ​មួយ។ វា​ជា​អាវ​ប្រវត្តិសាស្ត្រ​របស់​ក្លិប ហើយ​ខ្ញុំ​ក៏​ចង់​បង្កើត​ស្នាដៃ​ដោយ​ខ្លួន​ឯង​ដែរ។ ឆ្នាំ​មុន ខ្ញុំ​ពាក់​អាវ​ដែល​មាន​លេខ​៧​នៅ​ពី​ក្រោយ​ខ្នង ហើយ​ខ្ញុំ​អាច​រក​គ្រាប់​បាល់​បាន​ច្រើន ដូច្នេះ​ខ្ញុំ​មាន​ទំនុក​ចិត្ត​ជាមួយ​លេខ​នេះ”។

Depay ​កាល​លេង​នៅ PSV ​រដូវ​កាល​មុន​រក​គ្រាប់​បាល់​បាន​២២​គ្រាប់​និង​ជា​កំពូល​អ្នក​ទាត់​ហ្វ្រីឃីត​ម្នាក់។ ខណៈ​ដែល​ផ្លាស់​មក Man Utd ​នេះ​វិញ រូប​គេ​ក៏​បាន​បង្ហាញ​ទម្រង់​លេង​ពេញ​ចិត្ត​ចំពោះ​អ្នក​ចាត់​ការ​សញ្ជាតិ​ហុល្លង់​ផង​ដែរ។ ចាំ​មើល​​ទៅ​មុខ​ទៀត តើ​វាសនា​របស់​រូប​គេ​អាច​ដូច​នឹង Di Maria ​ឬ​យ៉ាង​ណា?

ចុចអាន៖បើក​ឆាក Premier League បិសាច​ក្រហម​រក​បាន៣​ពិន្ទុ ដោយ​សារ​មាន់​ខ្នាយ​មាស​ភ្លាត់​ស្នៀត

ប្រែ​សម្រួល៖ មុន្នី រម្យ ប្រភព៖ skysports