ចំនួនអ្នកស្លាប់ដោយការផ្ទុះនៅចិនកើនដល់៤៤នាក់ ឯអ្នករបួសមានជាង៥០០នាក់

2015-08-13 21:19:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ចំនួនអ្នកស្លាប់នៅក្នុងគ្រោះថ្នាក់ផ្ទុះដ៏ធំមួយនៅកំពង់ផែក្រុង Tianjin ភាគឦសានប្រទេសចិន បានកើនឡើងដល់៤៤នាក់ហើយ ឯ ៥២០នាក់ផ្សេងទៀតកំពុងសម្រាកព្យាបាលរបួសនៅមន្ទីរពេទ្យ ដែលក្នុងនោះមាន៦៦នាក់ស្ថិតក្នុងស្ថានភាពធ្ងន់ធ្ងរខ្លាំង។ នេះបើយោងតាមការរាយការណ៍ចុងក្រោយរបស់ទីភ្នាក់ងារសារព័ត៌មានចិន Xinhua។

ប្រតិបត្តិការជួយសង្គ្រោះត្រូវបានផ្អាកបណ្ដោះអាសន្ន ខណៈក្រុមជំនាញខាងសារធាតុគីមីកំពុងស្គែនមើលតំបន់នោះ ដើម្បីដឹងពីផលប៉ះពាល់។ ចំណែកប៉ូលិសបានដាក់កន្លែងត្រួតពិនិត្យចម្ងាយ៣គីឡូម៉ែត្រពីកន្លែងកើតហេតុ ដោយមិនអនុញ្ញាតឲ្យអ្នកណាម្នាក់ចូលនោះឡើយ។

ហេតុការណ៍ដ៏រន្ធត់នេះកើតឡើងនៅឃ្លាំងផ្ទុកសារជាតិគីមី និងទំនិញមានគ្រោះថ្នាក់ នៃតំបន់កំពង់ផែក្រុង Tianjin ដែលមានចម្ងាយ១៥០គីឡូម៉ែត្រពីរដ្ឋធានីប៉េកាំង។ ឥទ្ធិពលនៃគ្រឿងផ្ទុះបានជះដល់ចម្ងាយច្រើនគីឡូម៉ែត្រ ទើបបណ្ដាលឲ្យមនុស្សជាច្រើនត្រូវស្លាប់ និងរបួសបែបនេះ។ យ៉ាងណាក្ដី មិនមានការបញ្ជាក់ថាសារជាតិផ្ទុះទាំងនោះមានអ្វីខ្លះនៅឡើយទេ៕