ហាងមួយជប់លៀងឱ្យចោរស្រីម្នាក់ដែលក្លាយជាចោរលួចអីវ៉ាន់ទី១ម៉ឺន

2015-08-16 21:37:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ការចាប់ចោរដែលលួចរបស់ក្នុងហាងគឺជារឿងធម្មតាទៅហើយ តែមានរឿងមួយដែលកម្របានឮ គឺនៅហាងមួយនេះបានរៀបចំការភ្ញាក់ផ្អើលមួយសម្រាប់ចោរស្រីដែលពួកគេទើបតែចាប់បាន។ វីដេអូខ្លីមួយនេះបង្ហាញពីបុគ្គលិកជាច្រើននាក់បាននាំគ្នាអបអរចោរលួចអីវ៉ាន់ទី១ម៉ឺនពីក្នុងហាងរបស់ពួកគេ ដោយមានទាំងភ្លេង បាច់ផ្កា និងនំខេកទៀតផង។

វីដេអូដ៏ចម្លែកនេះចាប់ផ្ដើមដោយមានអ្នកគ្រប់គ្រងហាងម្នាក់រកឃើញចោរស្រីម្នាក់តាមកាមេរ៉ាសុវត្ថិភាពក្នុងហាង ហើយគាត់ក៏បានរត់ចុះទៅក្រោមទៅរកនាង ដោយមានបុគ្គលិកប៉ុន្មាននាក់ផ្សេងទៀតកាន់ផ្ទាំងក្រដាសធំមួយផង។

បុរសអ្នកគ្រប់គ្រងហាងនោះបានប្រាប់សន្តិសុខម្នាក់ឱ្យឃាត់នារីសង្ស័យនោះទុក ដើម្បីឱ្យពួកគេអាចដំណើរការផែនការធ្វើឱ្យនារីនោះភ្ញាក់ផ្អើល។ នៅពេលពួកគេចុះទៅដល់នារីនោះ ពួកគេក៏បានហុចបាច់ផ្កា និងមាននំខេកមួយចំណិតផង ដោយមានភ្លេងអមផង ហើយពាក់មួកជប់លៀងឱ្យនាង។

ទំនងជាខ្មាសផង នារីសង្ស័យជាចោរនោះក៏បានដើរចេញយ៉ាងលឿនពីក្រុមបុគ្គលិក និងពិធីជប់លៀងដ៏លក់មុខនោះទៅ។ ទោះបីនារីនោះបានចេញទៅផុតហើយក៏ដោយ គេនៅតែឃើញក្រុមបុគ្គលិកទាំងនោះបន្តពិធីរបស់ពួកគេយ៉ាងសប្បាយបន្តទៀត៕