Lamborghini ស៊េរី២០១៦ចេញជាផ្លូវការហើយ តម្លៃកន្លះលាន

2015-08-17 19:07:07
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ ក្រុមហ៊ុន Lamborghini បានធ្វើការបង្ហាញជាផ្លូវការនូវរថយន្តស៊េរីថ្មីរបស់ខ្លួននៅក្នុងកម្មវិធី The Quail ដែលជាកម្មវិធីប្រមូលផ្ដុំរថយន្តដ៏ធំមួយ។

រថយន្តដែលក្រុមហ៊ុនបានធ្វើការបង្ហាញនោះគឺជាម៉ូដែល Lamborghini Aventador SV Roadster ឆ្នាំ ២០១៦ ជាប្រភេទរថយន្តបើកដំបូល ដែលមានការរចនារូបរាងយ៉ាងស្រស់ស្អាត។ ក្រៅពីមានរូបរាងដ៏ទាក់ទាញហើយ រថយន្តនេះក៏មានបំពាក់នូវម៉ាស៊ីន V12 ទំហំ ៦,៥លីត្រ និងមានកម្លាំងម៉ាស៊ីនដល់ទៅ៧៤០សេះ។

សម្រាប់ Aventador SV Roadster២០១៦ នេះអាចបង្កើតសន្ទុះល្បឿនពី០ទៅ១០០គម/ម៉ ក្នុងរយៈពេល២,៩វិនាទី ហើយអាចរត់ក្នុងល្បឿនលឿនបំផុតដល់ទៅ៣៥០គម/ម៉។ ចំណែកឯទម្ងន់របស់វាគឺត្រឹមតែ១៥៧៥គីឡូក្រាមតែប៉ុណ្ណោះ ដែលស្រាលជាងពីមុន ៥០គីឡូក្រាម។

ក្រុមហ៊ុនបានឲ្យដឹងថារថយន្តស៊េរីនេះនឹងផលិតត្រឹមតែ ៥០០គ្រឿងប៉ុណ្ណោះ ហើយក្នុងមួយគ្រឿងគឺមានតម្លៃប្រមាណ ៥៣០ ០៧៥ ដុល្លារ៕