Land Cruiser 2016 ចេញរូបរាងហើយ ផ្នែកមុខ ក្រោយ និងក្នុងមានការផ្លាស់ប្ដូរខ្លះៗ

2015-08-18 17:35:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Toyota បានប្រកាសនូវវត្តមានរបស់ Land Cruiser ស៊េរី ២០១៦ ដែលមានការផ្លាស់ប្ដូរទាំងរូបរាងខាងក្រៅ និងខាងក្នុងមើលទៅគួរឲ្យចាប់ចិត្ត។

កាងផ្នែកខាងមុខមានការផ្លាស់ប្ដូរខុសពីស៊េរីមុន គឺមានជាដុំរបារចំនួនបី ដែលមើលទៅមានលក្ខណៈស្រដៀងគ្នានឹងកាងខាងមុខរបស់រថយន្ត Toyota Tacoma ជំនាន់ថ្មីដែរ។ ឯអំពូលភ្លើង LED របស់វាក៏មានការផ្លាស់ប្ដូរ ដោយអំពូលផ្នែកខាងក្រោមផ្លាស់ប្ដូរពីរាងមូលទៅជាជ្រុង។ ចំណែកផ្នែកខាងក្រោយ ក៏មានការផ្លាស់ប្ដូររូបរាងមួយចំនួនផងដែរ ជាពិសេសអំពូលភ្លើង LED ដែលមានការរចនាថ្មីយ៉ាងស្រស់ស្អាត។

ផ្នែកខាងក្នុងនៃរថយន្តមានបំពាក់នូវអេក្រង់ Touchscreen ទំហំ ៤,២ អ៊ីញ ដែលអេក្រង់នេះសម្រាប់ធ្វើការបង្ហាញនូវទិន្នន័យ ដូចជាមើលរូបភាពខាងក្រោយដែលកាមេរ៉ាបានចាប់យក។ ក្រៅពីនេះរថយន្តនេះក៏មានបំបាក់នូវប្រព័ន្ធសុវត្ថិភាពពិសេសៗមួយចំនួនផ្សេងទៀតផងដែរ។ រថយន្ត Land Cruiser ស៊េរីថ្មីក៏មានបន្ថែមនូវពណ៌ថ្មីចំនួនពីរទៀត ឲ្យជ្រើសរើសផងដែរ គឺពណ៌ត្នោតចាស់ និងពណ៌ខៀវក្រមៅ។ រថយន្ត Land Cruiser ស៊េរីនេះមានបំពាក់ម៉ាស៊ីនប្រភេទ V8 ទំហំ ៤,៥លីត្រ ព្រមទាំងមានកម្លាំង ២៦៨សេះ។

ការផ្លាស់ប្ដូរនៃរថយន្ត Land Cruiser ស៊េរីនេះគឺធ្វើឡើងសម្រាប់លក់នៅលើទីផ្សារប្រទេសជប៉ុន និង អូស្ត្រាលីតែប៉ុណ្ណោះ ហើយចំពោះតម្លៃនៃរថយន្ត ក្រុមហ៊ុនមិនបានធ្វើការបញ្ជាក់នោះទេ៕

-ចុចអាន៖ Lamborghini ស៊េរី២០១៦ចេញជាផ្លូវការហើយ តម្លៃកន្លះលាន

ប្រែសម្រួល៖ ហៃ សុខហេង ប្រភព៖ automobilemag