កីឡាករ​ចំណូល​ថ្មី​ Memphis Depay ​​បាន​ស្នើសុំ​ក្រុម​បិសាច​ក្រហម​ Manchester United ពាក់​លេខ​៧ ​បន្ទាប់​ពី​ Angel Di Maria ​​ចាក​ចេញ​ទៅ​ក្លិប​ PSG របស់​បារាំង។

ទោះ​បី ​​ "លេខ​៧"​ នេះ ធ្លាប់​មាន​តារា​ឆ្នើម​ល្បីៗ​លំដាប់​ពិភពលោក​​ដូច​ជា Cristiano Ronaldo និង​ David Beckham ពាក់​ក្ដី ប៉ុន្តែ​តារា​វ័យ​ក្មេង​ជម្រើស​ជាតិ​ហុល្លង់​រូប​នេះ មាន​ភាព​​​ក្លាហាន​គ្រប់​គ្រាន់ ​ដោយ​មិន​ខ្លាច​មាន​សម្ពាធ​ឡើយ ក្នុង​ការ​ពាក់​លេខ​ល្បី​នេះ ហើយ​កន្លង​មក​រូប​គេ​ក៏​ធ្លាប់​និយាយ​​ផង​ដែរ​ថា នឹង​ធ្វើ​ឲ្យ​លេខ​៧ Man Utd ល្បី​ល្បាញ​ឡើង​​វិញ។

​តើ​ Depay ​​អាច​​នឹង​ល្បី​ដូច​​ជំនាន់​ Ronaldo និង​ Beckham ​ដែរ​ឬ​ទេ? ​​ប៉ុន្តែ​សូម​មើល​នូវ​​ស្ថិតិ​ និង​ស្នាដៃ​​របស់​អតីត​តារា​ឆ្នើម​ក្រុម​ Man Utd ទាំង​២​​ថា​​អស្ចារ្យ​យ៉ាង​ណា ដូច​ខាង​ក្រោម៖

​១. David Beckham (១៩៩២-២០០៣)

Beckham ចូល​លេង​ឈុត​ធំ​ក្រុម​ Man Utd នៅ​ឆ្នាំ​១៩៩២ ​​រហូត​ដល់​ឆ្នាំ​២០០៣ ដោយ​បាន​បង្ហាញ​ខ្លួន​ចូល​​លេង​ឲ្យ​បិសាច​ក្រហម​សរុប​ ៣៩៤​​ប្រកួត និង​ស៊ុត​ទី​៨៥​គ្រាប់​​ ក្នុង​​តំណែង​​ជា​ខ្សែ​បម្រើ។ ​អតីត​ប្រធាន​ក្រុម​ជម្រើស​ជាតិ​អង់គ្លេស មាន​ប្រជាប្រិយភាព​យ៉ាង​ខ្លាំង​ពី​អ្នកគាំទ្រ​នៅ​ជុំ​វិញ​ពិភពលោក។ Beckham ធ្លាប់​ជួយ​ឲ្យ​ Man Utd ឈ្នះ​ពាន​​ជា​ច្រើន​ដូច​ជា Premier League ៦​ដង, FA Cup ២​ដង, FA Community Shield ២​ដង, UEFA Champions League ​១ដង និង​ International Cup ១​ដង​ផង​ដែរ មុន​នឹង​ចាក​ចេញ​​ទៅ​ Real Madrid។

២. Cristiano Ronaldo (២០០៣-២០០៩)

Ronaldo បាន​ផ្ទេរ​ពី​ក្លិប​ Sporting ​ទៅ​ Man Utd កាល​ឆ្នាំ​២០០៣ ក្នុង​ជំនាន់​អ្នកចាត់ការ​ល្បី​លោក​ Sir Alex Ferguson ហើយ​តារា​សំណព្វ​ចិត្ត​ក្រុម​បិសាច​ក្រហម​រូប​នេះ បាន​ពាក់​​លេខ​៧ បន្ទាប់​ពី​ Beckham។ ​ប្រធាន​ក្រុម​ជម្រើស​ជាតិ​ព័រទុយហ្គាល់​រូប​នេះ បាន​ចូល​លេង​ឲ្យ​ Man Utd សរុប​​២៩២​​ប្រកួត និង​ស៊ុត​ចូល​ទី​បាន​​១១៨​គ្រាប់។ Ronaldo ក៏​បាន​ជួយ​ឲ្យ​បិសាច​ក្រហម លើក​​ពាន​ច្រើន​ដែរ​ដូច​ជា Premier League ​៣​ដង, FA Cup ១​ដង, Football League Cup ២​ដង,  FA Community Shield ១​ដង,  UEFA Champions League ​១ដង និង​ FIFA Club World Cup ១​ដង​ទៀត។

យ៉ាងណាមិញ ខ្សែ​ប្រយុទ្ធ​វ័យ​២១​ឆ្នាំ Depay ដែល​ផ្ទេរ​ពី​ PSV តម្លៃ​ជិត​៣២​លាន​ដុល្លារ ​កាល​ពី​ខែ​មិថុនា​រូប​នេះ ​ត្រូវ​បាន​គេ​ជឿ​ថា​មាន​សមត្ថភាព​គ្រប់គ្រាន់ ​និង​ជា​បេក្ខភាព​ស័ក្ដិសម​បំផុត ដើម្បី​សាង​ស្នាដៃ​ និង​ភាព​ល្បីល្បាញ​​​ ក្នុង​នាម​កីឡាករ​លេខ​៧​របស់​ក្លិប​បិសាច​ក្រហម​​​ដូច​គ្នា៕

-ចុចអាន៖ Depay ​មាន​ទំនុក​ចិត្ត​អាច​សាង​កេរ្តិ៍​ឈ្មោះ​ល្បី​ជាមួយ​អាវ​លេខ​៧

​​ប្រែ​សម្រួល៖ វិន ជីវ័ន្ត ប្រភព៖ mirror