ឱក សុគន្ធកញ្ញា និង ឆន សុវណ្ណរាជ ពិតជាមានឥទ្ធិពលខ្លាំងចំពោះ Fans មែន!

2015-08-21 16:12:46
ចំនួនមតិ 0 | ចំនួនចែករំលែក 0

ចន្លោះមិនឃើញ

រាល់តារាទាំងអស់តែងតែមានអ្នកគាំទ្ររៀងៗខ្លួន អ្នកខ្លះគាំទ្រធម្មតា អ្នកខ្លះទៀតគាំទ្រពេញទំហឹងតែម្តងរហូតដល់បង្កើត Page សម្រាប់ Post រាល់សកម្មភាពរបស់តារាក្នុងដួងចិត្តរបស់គេទៀតផង។ ជាក់ស្ដែងដូចជា Fans របស់ សុគន្ធកញ្ញា និងសុវណ្ណារាជ និយាយដូចគ្នាថា ពួកគេស្រឡាញ់គាំទ្រតារាចម្រៀងទាំងពីរគ្មានថ្ងៃប្រែ។

ជួបសម្ភាសន៍ជាមួយក្រុមការងារ Sabay អ្នកតំណាងក្រុម Page ស្នាមញញឹមឆន សុណ្ណរាជ សុំមិនបញ្ចេញឈ្មោះបានរៀបរាប់យ៉ាងច្រើនពីមូលហេតុដែលក្រុមពួកគេស្រលាញ់នឹងគាំទ្រលោក ឆន សុវណ្ណរាជ។ ទី១ ដោយសារលោកជាតារាម្នាក់ដែរមិនប្រកាន់ ឫកពា មិនប្រកាន់ខ្លួនថាជាតារាល្បី មានសំឡេងល្អ និងមានសមត្ថភាពខ្ពស់។ ទី២ ស្នាមញញឹម គឺលោកតែងតែញញឹមដាក់អ្នកគ្រប់គ្នា ស្នាមញញឹមលោកជាស្នាមញញឹមមួយដែលតារាផ្សេងៗ ពោលគឺពិតមិនសម្ដែង៊។ អ្នកតំណាងខាងលើបានគាំទ្រ និងស្រលាញ់សំឡេងលោកតាំងពីចូលសិល្បៈមកម្ល៉េះ។

អ្នកតំណាងដដែលនិយាយថា កាលពី ៥ ឆ្នាំមុនធ្លាប់បានបង្កើត Fan club page មួយដែរ តែជាគណនីផ្ទាល់របស់នាងដោយសារតែមានការគាំទ្រច្រើនទើបបង្កើត page ស្នាមញញឹម ឆន សុវណ្ណារាជ នេះ។ មូលហេតុចម្បងនោះគឺចង់ចែករំលែកអារម្មណ៍ស្រលាញ់ទៅកាន់មិត្តភក្តិដទៃទៀត ។ ម្ចាស់page នេះប្រាប់ថា ពិតជាសប្បាយចិត្តពេលបានឃើញប្រិយមិត្តជាច្រើនស្រលាញ់គាំទ្រតារាប្រុសរូបនេះដូចនាងដែរ។

ទោះបីជាពេលខ្លះ ឆន សុវណ្ណរាជ មានអារម្មណ៍មិនល្អមិនបានរាក់ទាក់ដល់ Fans ក៏ដោយ អ្នកតំណាង page ស្នាមញញឹមឆន សុវណ្ណរាជ នៅតែអះអាងថាស្រលាញ់និងបន្តការគាំទ្រជានិច្ច។

"ខ្ញុំគិតថាពេលខ្លះ គាត់អាចមានអាកប្បកិរិយាឆ្មើងឆ្មៃបែបនេះដែរ អាចមកពីគាត់ហត់ពីការងារ ឬក៏មានអារម្មណ៍អត់ល្អព្រោះមនុស្សម្នាក់ៗមិនអាចចេះតែមានអារម្មណ៍ល្អគ្រប់ពេលទេបង តែអ្វីដែលសំខាន់ ចរិតពិតគាត់មិនមែនជាមនុស្សបែបហ្នឹង។ ខ្ញុំជឿលើការស្រលាញ់របស់ខ្ញុំ ហើយនឹងយកការគាំទ្រជឿជាក់ រយៈពេលជាង ៥ឆ្នាំមកធានាណាបង ណាមួយខ្ញុំមិនមែនជាមនុស្សដើរតែគាំទ្រតារាគ្រប់តារាទេ មានតែគាត់ម្នាក់អាចធ្វើអោយខ្ញុំចេះស្រលាញ់នឹងគាំទ្រតារា ហើយខ្ញុំនឹងតែបន្តគាំទ្រគាត់រហូត"។

ងាកមក Fan មួយរូបតំណាងឲ្យ page Aok SokunKanha's fan វិញក៏មិនខុសអីពី Fans របស់ សុវណ្ណរាជ ប៉ុន្មានដែរ។ ពួកគេបាននិយាយថា សុគន្ធកញ្ញា គឺជាតារាម្នាក់ដែលមិនចេះឆ្មើងឆ្មៃឡើយ នាងតែងតែយកចិត្តទុកដាក់ជាមួយFansដូចអ្វីដែលពួកគេយកចិត្តទុកដាក់ជាមួយនាង។

ជាពិសេសទៅទៀតនោះ អ្នកតំណាងក្រុមខាងលើបន្តទៀតថា ឱក សុគន្ធកញ្ញា គឺជាមនុស្សតែម្នាក់ដែលស្ដាប់គ្រប់រឿងក្នុងបេះដូង Fans ហើយនាងក៏ជាអ្នកបង្ហាញអារម្មណ៍ទាំងរីករាយ និងកើតទុក្ខរបស់ Fans ទៅលើខ្លួននាងវិញផងដែរ។ លើសពីនេះ Fanស បន្តទៀតថា សុគន្ធ កញ្ញា តែងតែចុះធ្វើការងារសប្បុរសធម៌ជាច្រើនដោយមិនខ្លាចភាពនឿយហត់។

"អូបង...បង កញ្ញា មិនត្រឹមតែស្តាប់រឿងរ៉ាវរបស់ពួកខ្ញុំប៉ុណ្ណឹងទេ ថែមទាំងនៅជាមួយពួកខ្ញុំគ្រប់ពេលដែលត្រូវការគាត់ គាត់តែងតែលួងបំពេរពួកខ្ញុំមុនពេលចូលគេង តែងតែតែធ្វើអោយពួកខ្ញុំសប្បាយចិត្ត។ គាត់ជានារីដែលមានបេះដូងស្រស់ស្អាត ចេះយកអាសា និងយកចិត្តទុកដាក់ចំពោះអ្នកគ្រប់គ្នា"។ តំណាងFan សុគន្ធកញ្ញា ថ្លែង។

អ្នកតំណាង Pages ទាំងពីររបស់ ឆន សុវណ្ណរាជ និង ឱក សុគន្ធកញ្ញា និយាយដូចគ្នា ទោះបីជាតារាក្នុងដួងចិត្តរបស់ពួកគេទាំងពីរមិនសូវខ្វល់ខ្វាយជាមួយក៏ដោយ ក៏មិនមែនជាបញ្ហាសម្រាប់បណ្តាពួកដែរ ព្រោះពួកគេយល់ច្បាស់ពីទឹកចិត្តរបស់តារាទាំងពីរដួងនេះ៕

អត្ថបទ៖ ថា ម៉ាលីដា