រកឃើញ "កន្ធាយក្បាលកង្កែប" ដែលជិតដាច់ពូជ នៅវត្តសសរ ១០០ ខេត្តក្រចេះ
- 2015-08-21 18:31:12
- ចំនួនមតិ 0 | ចំនួនចែករំលែក 0
រកឃើញ "កន្ធាយក្បាលកង្កែប" ដែលជិតដាច់ពូជ នៅវត្តសសរ ១០០ ខេត្តក្រចេះ
ចន្លោះមិនឃើញ
"កន្ធាយក្បាលកង្កែប" ជាល្មូនដែលជិតផុតពូជទៅហើយនោះ ត្រូវបានមជ្ឈមណ្ឌលអភិរក្សអណ្ដើក-កន្ធាយទន្លេមេគង្គ នៃអង្គការអភិរក្សអន្តរជាតិ កំពុងធ្វើការថែរក្សាយ៉ាងយកចិត្តទុកដាក់ នៅក្នុងបរិវេណវត្តសសរ ១០០ ស្រុកសំបូរ ទឹកដីខេត្តក្រចេះ។
បច្ចុប្បន្ន "កន្ធាយក្បាលកង្កែប" ដែលកំពុងប្រឈមនឹងការដាច់ពូជនេះ ត្រូវបានគេរកឃើញថា មាននៅបីខេត្តក្នុងប្រទេសកម្ពុជា ពោលគឺ ខេត្តស្ទឹងត្រែង ក្រចេះ និងកំពង់ចាម ប៉ុន្តែគេមិនទាន់ច្បាស់នៅឡើយទេថា ខេត្តកំពង់ចាមមានកម្រិតណានោះ។ នេះបើយោងតាមលោក ស៊ុន យឿង ប្រធានគម្រោងទន្លេមេគង្គប្រាប់ Sabay នៅព្រឹកមិញនេះ។
លោក ស៊ុន យឿង បន្ថែមថា លោកបានរកឃើញកន្ធាយក្បាលកង្កែប តាំងពីឆ្នាំ ២០០៧ មកម្ល៉េះ ហើយសត្វរស់ក្នុងទន្លេមេគង្គនេះ មាន ១១ ប្រទេសប៉ុណ្ណោះក្នុងទ្វីបអាស៊ីដូចជា កម្ពុជា ឡាវ វៀតណាម និងថៃជាដើម។
យ៉ាងណាការបង្កើតមជ្ឈមណ្ឌល អភិរក្សអណ្ដើក-កន្ធាយទន្លេមេគង្គ ដើម្បីអភិរក្សកន្ធាយរមិច (កន្ធាយក្បាលកង្កែប) កន្ធាយធម្មតា អណ្ដើក និង សត្វផ្សេងៗទៀតឱ្យរស់រានមានជីវិត ទុកឱ្យក្មេងជំនាន់ក្រោយបានស្គាល់។
លោក ស៊ុន យឿង បញ្ជាក់ថា៖ “មជ្ឈមណ្ឌលនេះបង្កើតឡើង ដោយមានការសហការជាមួយមន្ត្រីជលផល គណៈកម្មការ និងព្រះសង្ឃវត្តសសរ ១០០ ក្នុងគោលបំណងផ្សព្វផ្សាយ និងការពារកន្ធាយក្បាលកង្កែប, បង្កើនជីវភាពប្រជាពលរដ្ឋក្នុងសហគមន៍ តាមរយៈការងារ ក្នុងវិស័យទេសចរណ៍ និងជួយលើកកម្ពស់ព្រះពុទ្ធសាសនា [តាមរយៈការលែងសត្វ]"។
លោក ស៊ុន យឿង ប្រធានគម្រោងទន្លេមេគង្គ រកឃើញកន្ធាយក្នុង ឆ្នាំ ២០០៧
កន្ធាយក្បាលកង្កែប ចាប់ផ្ដើមឡើងកាច់សំបុកពងក្នុងដីខ្សាច់ ចាប់ពីខែវិច្ឆិកាដល់ខែមិថុនារាល់ឆ្នាំ ហើយពងរបស់វា នឹងចាប់ញាស់ នៅពេលមានអាយុចន្លោះ ៥២ ថ្ងៃ ទៅ ៦០ ថ្ងៃ។
ជុំវិញការអភិរក្ស ប្រធានគម្រោងទន្លេមេគង្គខាងលើរៀបថា មិនងាយស្រួលឡើយ ព្រោះប្រជាជនមួយចំនួន មិនទាន់យល់ដឹងពីការថែរក្សា ដោយពួកគេតែងលួចយកទៅលក់ឱ្យឈ្មួញ ធ្វើជាថ្នាំសង្កូវ និងធ្វើម្ហួបជាដើម។ ទោះបីជាយ៉ាងណាលោកថា មជ្ឈមណ្ឌល និងភាគីពាក់ព័ន្ធ នៅតែខិតខំប្រឹងប្រែង និងព្យាយាមចុះណែនាំដល់ពួកគេ។
លោកបញ្ជាក់ថា ក្រោយពីមានការណែនាំជម្រុញលើកទឹកចិត្ត និងមានផ្ដល់ជាថវិកា ប្រជាជនមួយចំនួន ក៏បានចុះធ្វើការស្វែងរក និងការពារ តាមរយៈយកសំណាញ់ហ៊ុំព័ន្ធសំបុកកន្ធាយពងឱ្យមជ្ឈមណ្ឌល ហើយផ្នែកបច្ចេកទេស ក៏មជ្ឈមណ្ឌលជាអ្នកផ្ដល់ឱ្យ។
បច្ចុប្បន្នមជ្ឈមណ្ឌល អភិរក្សអណ្ដើក-កន្ធាយទន្លេមេគង្គអាយុកាល ៤ ឆ្នាំ ក្នុងវត្តសសរ ១០០ នេះ បានក្លាយជាកន្លែងទេសចរណ៍ដ៏ទាក់ទាញ សម្រាប់ភ្ញៀវជាតិ និងអន្តរជាតិ។ ចំពោះពេលវេលាចូលទស្សនាមជ្ឈមណ្ឌលនេះ បើកចាប់ពីម៉ោង ៨ កន្លះព្រឹកដល់ម៉ោង ៤ កន្លះល្ងាច ដោយមានតម្លៃទស្សនា ៤ ដុល្លារ និង ២ ដុល្លារ សម្រាប់ភ្ញៀងអន្តរជាតិជាយុវវ័យ និងកុមារ ចំណែកប្រជាជនខ្មែរ មានតម្លៃ ១៥០០ រៀល និង ៥០០ រៀល៕
បើចង់ Trekking គួរយករបស់អ្វីតាមខ្លួនខ្លះហ្ន៎?
អត្ថបទ៖ អ៊ុំ សុភក្តិ
រូបភាព៖ ផ្ដល់ឱ្យ