លី ច័ន្ទសីហា អវត្តមានគូស្នេហ៍ដែលជាកូនមន្ត្រីធំក្នុងថ្ងៃពិសេស

2015-08-25 17:40:25
ចំនួនមតិ 0 | ចំនួនចែករំលែក 0

ចន្លោះមិនឃើញ

លី ច័ន្ទសីហា បានបើកចំហពីទំនាក់ទំនងនាង និងគូស្នេហ៍ដែលជាកូនមន្ត្រីធំម្នាក់ថ្មីៗនេះ ប៉ុន្តែនៅក្នុងពិធីខួបកំណើតរបស់ខ្លួនយប់មិញ បុគ្គលសំខាន់រូបនេះ មិនមានវត្តមានក្នុងថ្ងៃពិសេសរបស់នាង ឡើយ។

ការអាក់ខាននេះ សាមីខ្លួនខាងស្រីអះអាងថា ព្រោះតែគូស្នេហ៍មិនបានស្ថិតនៅក្នុងស្រុកឡើយ ដោយជាប់កាតព្វកិច្ចសិក្សានៅក្រៅប្រទេស។ លីហា លើកឡើងថា គូស្នេហ៍របស់នាង បានមកលេងស្រុក និងទើបតែទៅវិញថ្មីៗជាហេតុធ្វើឲ្យពិបាកក្នុងការសុំច្បាប់សាលា។ "គាត់ចង់មកណាស់ តែអត់បានមកទេ ដោយសារតែពិបាកសុំច្បាប់ ព្រោះទើបនឹងមកដែរ ស្រុកគេច្បាប់តឹងរឹងណាស់"។

គូស្នេហ៍របស់តួកុមារីក្នុងរឿង "កតញ្ញូ" គឺជាកូនមន្ត្រីធំមួយរូប បច្ចុប្បន្នកំពុងសិក្សាជំនាញហិរញ្ញវត្ថុ ក្នុងក្របខណ្ឌយោធានៅប្រទេសវៀតណាម។ សីហា សុំលាក់ឈ្មោះ តែបានប្រាប់ថា សង្សាររបស់នាងមានវ័យ ២៥ឆ្នាំ និងថា ពួកគេបានស្គាល់គ្នាប្រមាណជា ២ឆ្នាំហើយ ហើយចាស់ៗទាំងសងខាង ក៏ដឹងលឺពីទំនាក់ទំនងមួយនេះ ព្រមទាំងមិនបានបដិសេធន៍ដែរ។

តារាទឹកភ្នែករូបនេះ បានអះអាងទៀតថា គូស្នេហ៍របស់នាងជាមនុស្សមានអធ្យាស្រ័យល្អ ដោយក្នុងរង្វង់២ឆ្នាំមកនេះ គេមិនដែលធ្វើឲ្យនាងពិបាកចិត្តម្ដងណាឡើយ។ ឯក្រុមគ្រួសាររបស់គេ ក៏ល្អគ្រប់យ៉ាង និងគួរឲ្យគោរពទៀតផង។ទោះយ៉ាងនេះក្ដី មិនទាន់មានកាលបរិច្ឆេទច្បាស់លាស់សម្រាប់ថ្ងៃមង្គលនៅឡើយ ដោយហេតុថា ទាំងសងខាងរវល់ដូចគ្នា និងកំពុងសម្លឹងមើលគ្នារៀងខ្លួនផង។

ម្យ៉ាងទៀត ចាស់ទុំ គឺជារៀបចំពិធីនេះ ខណៈពួកគាត់គន់គូរទៅ ឃើញថានាងឆុងឆ្នាំ ប្រសិនបើរៀបការក្នុងរង្វង់២ឆ្នាំក្រោយនេះ។ សីហា ថ្លែងថា "ឥឡូវគាត់នៅរៀននៅឡើយ ហើយទម្រាំដល់គាត់រៀនចប់ គឺចូលឆ្នាំរកាហ្មង អីចឹងគឺជាន់ឆ្នាំជាមួយខ្ញុំ ខ្ញុំឆ្នាំរកា រៀបអត់កើតទេ។ ការងារហ្នឹងចាស់ៗ ពួកគាត់អ្នករៀបចំ អីចឹងពួកគាត់ក៏ជឿលើរឿងអប្បិយជំនឿដែរ"។

នៅក្នុងពិធីខួបកំណើត ២២ឆ្នាំឈានចូល២៣ឆ្នាំយប់មិញនេះ សីហា ទទួលបានអំណោយតុក្កតាខ្លាឃ្មុំដ៏ធំមួយ។ សីហា ប្រាប់ថា នោះជាអំណោយរបស់បងប្រុសរបស់នាង មិនមែនជាអំណោយគូស្នេហ៍ឡើយ តែគេក៏ត្រៀមជាពិសេសសម្រាប់នាងដែរ។ " គាត់ក៏មានអំណោយសម្រាប់ខ្ញុំដែរ ប៉ុន្តែគាត់ថា ចាំពេលគាត់មក បានឲ្យព្រោះមិនចង់ផ្ញើ គឺគាត់ចង់ឲ្យផ្ទាល់ដៃតែម្ដង" លី ច័ន្ទសីហា ថ្លែង៕

ខួបកំណើតរបស់ លី ច័ន្ទសីហា យប់មិញ មានសិល្បករវ័យក្មេងស្អាតៗ ជាច្រើនបានចូលរួម។ នរណាខ្លះ តោះ...ទស្សនាទាំងអស់គ្នា!!!