បាល់ទាត់ធ្វើឲ្យ ឈិន ឈឿន ឃ្លាតឆ្ងាយពីគ្រួសារតាំងពីអាយុ១៣ឆ្នាំ

2015-08-27 16:33:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ឈិន ឈឿន ជាកីឡាករខ្សែបម្រើស្លាបដ៏ឆ្នើមរបស់ការពារជាតិ និងជម្រើសជាតិតាំងក្រុមអាយុ១៣ឆ្នាំរហូតដល់ក្រុមធំពោលគឺរយៈពេលប្រហែលជា១៥ឆ្នាំហើយ។ តាំងពីយុវជនរហូតដល់ក្រុមធំរបស់ជម្រើសជាតិ កីឡាកររូបនេះឆ្លងកាត់ការប្រកួតក្នុងក្នុងព្រឹត្តិការណ៍ជាតិ និងអន្តរជាតិជាច្រើនស្ទើររាប់មិនអស់។ និយាយពីឈ្មោះ ឈិន ឈឿន អ្នកគាំទ្របាល់ទាត់ខ្មែរស្ទើរគ្រប់គ្នាហើយ ស្គាល់កីឡាកររូបនេះ ប៉ុន្តែអ្នកខ្លះប្រហែលជាមិនស្គាល់ប្រវត្តិរបស់កីឡាកររូបនេះច្បាស់នោះទេ។

ឈិន ឈឿន កើតនៅថ្ងៃទី ១០ កញ្ញា ១៩៩២ មានកម្ពស់ ១,៦៦ ម៉ែត្រ ទម្ងន់ ៥៧ គីឡូក្រាម។ ស្រុកកំណើតនៅភូមិព្នៅទី២ ឃុំព្នៅទី២ ស្រុកស៊ីធកណ្ដាល ខេត្តព្រៃវែងដែលមានឪពុកឈ្មោះ បៀន ឈិន និង អ្នកម្ដាយឈ្មោះ ម៉ីន សុខន ជាកសិករ។ រូបគេជាកូនពៅក្នុងចំណោមបងប្អូនបង្កើត៣នាក់។ បងស្រីឈ្មោះ មួន យុទ្ធា និង បងប្រុសទី២ ឈ្មោះ ឈិន ឈៀង។

កាលពីកុមារភាពក្នុងវ័យ១៣ឆ្នាំឈិន ឈឿន ត្រូវឃ្លាតឆ្ងាយពីគ្រួសារដើម្បីហ្វឹកហាត់បាល់ទាត់។ ទោះបីជាមានកំណើតនៅឯខេត្តព្រៃវែងយ ក៏កីឡាកររូបនេះធំពេញវ័យនៅរាជធានីភ្នំពេញ។ កីឡាកររូបនេះជាអតីតសិស្សវិទ្យាល័យព្រះយុគន្ធរ និងជាកីឡាករបាល់ទាត់ប្រចាំវិទ្យាល័យមួយនេះ។

ជីវិតបាល់ទាត់ ឆ្នាំ ២០០២ ជាជំហានដំបូងដែល ឈិន ឈឿន ចូលប្រឡូកក្នុងវិស័យកីឡាបាល់ទាត់ និងបានជាប់ជម្រើសជាតិយុវជនក្រោមអាយុ១៣ ឆ្នាំ (U13)។ ឆ្នាំនោះ រូបគេបានឃ្លាតឆ្ងាយពីគ្រួសារត្រឹមវ័យ១៣ ឆ្នាំ មករស់នៅរាជធានីភ្នំពេញ ដោយស្នាក់នៅជាមួយអ៉ុំដើម្បីបន្តជីវិតជាអ្នកកីឡាករ និងការសិក្សា។ឆ្នាំ ២០០៥ ឈិន ឈឿនលេងឲ្យក្លិបយុវជននៃក្ដីសង្ឃឹម និងបានជួយក្រុមឲ្យលើកពានរង្វាន់ MILO ២០០៥។

២ឆ្នាំបន្ទាប់បាន កីឡាករដែលមានកម្ពស់១,៦៦ម៉ែត្ររូបនេះបានជាប់ជម្រើសជាតិយុវជនក្រោមអាយុ១៧ ឆ្នាំ(U-17) ពោលគឺឆ្នាំ២០០៧ ចូលរួមក្នុងព្រឹត្តិការណ៍ AFC U-17 Championship 2008 ដែលកម្ពុជាស្ថិតនៅក្នុងពូល E ប្រកួតនៅប្រទេសឥណ្ឌូណេស៊ី។ អីរ៉ង ជាម្ចាស់ជើងឯកពានរង្វាន់ AFC U17 Championship 2008 នេះ។

ជីវិតនៅក្លិបក្រសួងការពារជាតិ ឆ្នាំ២០០៧ ឈិន ឈឿន បានចូលរួមជាមួយក្លិបក្រសួងការពារជាតិ និងមិនបានជាប់ជាជម្រើស១១នាក់ដំបូងនោះទេដោយភាគច្រើនបានចូលលេងនៅចុងម៉ោង។ ឆ្នាំ ២០០៨ ទើបកីឡាកររូបនេះមានមុខ១១នាក់ដំបូងជាញឹកញាប់។ រូបគេបានស៊ុតគ្រាប់បាល់ឲ្យក្រសួងការពារជាតិបាន២គ្រាប់នៅឆ្នាំ២០០៩។ ឆ្នាំបន្ទាប់មករូបគេបង្ហាញខ្លួនឲ្យការពារជាតិស្ទើរគ្រប់ការប្រកួត ដោយរកគ្រាប់បាល់បានជាញឹកញាប់ ហើយជាប់ជម្រើស១១នាក់ដំបូងរបស់ការពារជាតិរហូតដល់សព្វថ្ងៃ។

ជាប់ឈ្មោះក្នុងបញ្ជីជម្រើសជាតិ អ្វីៗ ដែលខិតខំប្រឹងប្រែងកាលពីវ័យក្មេងរបស់ ឈិន ឈឿន ពិតជាមិនខកបំណងឡើយ។ បន្ទាប់ពីបង្ហាញទម្រង់លេងល្អនៅក្លិបក្រសួងការពារជាតិ មានភាពរហ័ស ល្បឿន សហការក្រុម និង ភាពបំណិនប្រសប់ក្នុងការគ្រប់គ្រង បាល់ ធ្វើឲ្យលោកគ្រូបង្វឹកជនជាតិកូរ៉េខាងត្បូង Lee Tae Hoon ពេញ ចិត្ត និងជ្រើសរើសឲ្យចូលក្នុងក្រុមជម្រើសជាតិក្រុមធំ។ ដើមឡើយនៅក្នុងក្រុមជម្រើសជាតិ លោកគ្រូបង្វឹកឲ្យពាក់អាវលេខ៨ ពេលចូលប្រកួតម្ដងៗ ប៉ុន្តែក្រោមមកប្ដូរទៅពាក់លេខ១៧វិញ។

ពានរង្វាន់ AFC Challenge Cup ជំហានដំបូងនៅក្នុងក្រុមជម្រើសជាតិគឺ ឈិន ឈឿនលេងជាមួយកមិត្តរួមជាតិនៅក្នុងវគ្គជម្រុះក្នុងពូលនៃកម្មវិធីពានរង្វាន់ AFC Challenge Cup ដែលប្រទេសម៉ាល់ឌីវជាម្ចាស់ផ្ទះ និងមាន កម្ពុជា តាហ្ស៊ីគីស្ថាន កៀរហ្សីគីស្ថាន និង ម៉ាល់ឌីវ នៅពូលជាមួយគ្នា។ នៅទីនោះ រូបគេបានចូលលេងបានតែ២ប្រកួតនោះទេ(ប្ដូរចូល) ពោលគឺជំនួបជាមួយម្ចាស់ផ្ទះ ម៉ាល់ឌីវ និង កៀរហ្សីគីស្ថាន។ លទ្ធផលនៅពេលនោះ កម្ពុជា ចាញ់ម្ចាស់ផ្ទះម៉ាល់ឌីវ ៤-០ ចាញ់តាហ្ស៊ីគីស្ថាន ៣-០ និងចាញ់ កៀរហ្ស៊ីគីស្ថាន ៤-៣។ ៣គ្រាប់របស់កម្ពុជាបានមកពីការស៊ុត២គ្រាប់របស់គួច សុកុម្ភៈ និង មួយគ្រាប់របស់ខ្សែការពារសុក រិទ្ធី។

ជម្រុះ World Cup 2014 ការប្រកួតជម្រុះពានរង្វាន់ World Cup ឆ្ពោះទៅកាន់ប្រទេសប្រេស៊ីល២០១៤ កម្ពុជាត្រូវប៉ះជាមួយឡាវ។ ជំនួបជើងទី១ នៅថ្ងៃទី ២៩ខែមិថុនា ឆ្នាំ២០១១ ឈិន ឈឿនជាប់ឈ្មោះជាជម្រើស១១នាក់ដំបូងរបស់លោក Lee ។ ជាលទ្ធផល កម្ពុជាឈ្នះ ឡាវ ៤-២។ កាន់តែមានទំនុកចិត្តបន្ថែមពីលោកគ្រូបង្វឹក នៅក្នុងការប្រកួតក្នុងជើងទី២ ថ្ងៃទី១ កក្កដាឆ្នាំដដែល រូបគេជាប់ឈ្មោះជាជម្រើស១១នាក់ដំបូង ដោយអាចលេងបានរហូត ១២០ នាទីពេញ(ថែមម៉ោង១៥នាទី២ដង) ថែមទាំងជួយរកគ្រាប់បាល់បំប៉ោងសំណាញ់ទីឡាវបាន១គ្រាប់ដែរនៅនាទី៤៥។ សរុបលទ្ធផលទាំង២ជើងកម្ពុជាចាញ់ឡាវ ៨-៦ នៅក្នុងវគ្គជម្រុះពានរង្វាន់បាល់ទាត់ពិភពលោកឆ្នាំ២០១៤ប្រចាំ ទ្វីបអាស៊ី។

ជម្រុះ World Cup 2018 ការប្រកួតជម្រុះបាល់ទាត់ពិភពលោក World Cup 2018 ឈិន ឈឿនជាប់ជម្រើសជាតិកម្ពុជាទាំងវគ្គជម្រុះជុំទី១ និងជុំទី២។ ថ្វីត្បិតមិនអាចរកគ្រាប់បាល់បាន ប៉ុន្តែឈិន ឈឿនក៏បានជួយក្រុមជម្រើសជាតិឲ្យឈ្នះម៉ាកាវ៣-០ នៅក្នុងផ្ទះ និង១-១ នៅទឹកដីម៉ាកាវ។ សម្រាប់ជម្រុះជុំទីពីរប្រចាំទ្វីបអាស៊ី រូបគេជាប់ជម្រើសជាតិទៀតដោយបានចូលរួមប្រកួតជាមួយមិត្តរួមជាតិទាំងក្នុងដី និងក្រៅដីនៅក្នុងពូល E។

កីឡាស៊ីហ្គេម Sea Games ឈិន ឈឿន បានបង្ហាញខ្លួនក្នុងព្រឹត្តិការណ៍កីឡាស៊ីហ្គេមបាន៣លើកហើយរហូតដល់ឆ្នាំ២០១៥នេះគឺស៊ីហ្គេមឆ្នាំ២០១១ នៅប្រទេសឥណ្ឌូណេស៊ី ស៊ីហ្គេមឆ្នាំ២០១៣នៅប្រទេសមីយ៉ាន់ម៉ា និងចុងក្រោយនេះស៊ីហ្គេមឆ្នាំ២០១៥នៅប្រទេសសិង្ហបុរី។

នៅក្រុមជម្រើសជាតិអាយុក្រោម២៣ឆ្នាំនៅព្រឹត្តិការណ៍កីឡាស៊ីហ្គេមនេះ ឈិន ឈឿនបានបង្ហាញខ្លួនស្ទើរគ្រប់ការប្រកួត។ នៅស៊ីហ្គេមឆ្នាំ២០១១ ឈិន ឈឿនបានរកគ្រាប់បាល់បាន២គ្រាប់ឲ្យកម្ពុជាគឺពេលកម្ពុជាចាញ់សិង្ហបុរី ២-១ និងកម្ពុជាចាញ់ឥណ្ឌូណេស៊ី ៤-១។ មួយគ្រាប់ ឈិន ឈឿនពេលស៊ុតចូលសិង្ហបុរីគឺជាការស៊ុតដ៏អស្ចារ្យបំផុត។

ការប្រកួតដែលពេញចិត្តបំផុត ការ ប្រកួតដែលធ្វើឲ្យកីឡាកររូបនេះ សប្បាយចិត្តជាងគេ គឺ នៅវគ្គជម្រុះពានរង្វាន់ World Cup ក្នុងតំបន់ទ្វីបអាស៊ី កាលដែលក្រុមកម្ពុជាប៉ះជាមួយប្រទេសឡាវ។ មិនថានៅជើងទី១ ឬជើងទី២ រូបគេនឹងមិត្តរួមជាតិបានខិតខំប្រឹងប្រែងលេងអស់ពីកម្លាំងចិត្ត កាយ។ បើទោះជាលទ្ធផលចុងក្រោយកម្ពុជាចាញ់ឡាវក្នុងលទ្ធផលទាំង២ជើង៨ – ៦។ លើសពីនេះក្នុងព្រឹត្តិការណ៍ជម្រុះបាល់ទាត់ពិភពលោកឆ្នាំ២០១៨ដែលកម្ពុជាឈ្នះម៉ាកាវ៣-០ នៅស្តាតចាស់ដែលមានអ្នកគាំទ្រមើលច្រើនបំផុតក្នុងវិស័យបាល់ទាត់កម្ពុជា។

ស្នាដៃកន្លងមក -ជួយឲ្យក្លិបយុវជននៃក្ដីសង្ឃឹមលើកពានរង្វាន់ MILO ២០០៥ -ជួយឲ្យ ក្លិបក្រសួងការពារជាតិ លើកពានរង្វាន់ សម្ដេច ហ៊ុន សែន ឆ្នាំ ២០១០ -ជួយឲ្យ វិទ្យាល័យ ព្រះយុគន្ធរ លើកពានជើងឯកវិទ្យាល័យទូទាំងប្រទេសប្រចាំឆ្នាំ២០១២

បំណងប្រាថ្នាទៅអនាគត ទោះជា ត្រូវចំណាយពេលចាប់ពីកុមារភាព រហូតមកដល់ពេលនេះក៏ដោយ តែខ្សែបម្រើនៅក្លិបក្រសួងការពារជាតិរូបនេះប្រាថ្នាចង់ក្លាយជាអ្នករកស៊ីជួញដូរទៅវិញនាថ្ងៃអនាគត។ មិនគិតចង់ក្លាយជាគ្រូបង្វឹកបាល់ទាត់ ឬ កិច្ចការនានាក្នុងវិស័យបាល់ទាត់នោះទេ ដោយបញ្ជាក់ថា មិនសូវមានចំណង់ចំណូលចិត្តការងារខាងផ្នែកកីឡានេះទេ គ្រាន់តែចូលចិត្តលេងបាល់តែប៉ុណ្ណោះ។

អត្ថបទ៖ ម៉ឺន រស្មី