ភាពយន្តហុងកុងខ្នាតធំដែលគ្រោងមកថតនៅស្រុកខ្មែរ ឥឡូវដកខ្លួនវិញ

2015-08-27 18:20:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែភាពយន្តហុងកុងរឿង "បេសកកម្មទន្លេមេគង្គ" ដែលដំបូងឡើយបានដាក់ផែនការយកប្រទេសកម្ពុជាធ្វើជាទីតាំងថតឈុតខ្លះនៃសាច់រឿងនោះ ឥឡូវព័ត៌មានចុងក្រោយ បានឲ្យដឹងថា ពួកគេបានដកថយវិញហើយ។

ព័ត៌មាននេះ បញ្ចេញដោយនាយកដ្ឋានភាពយន្ត និងផ្សព្វផ្សាយវប្បធម៌នៃក្រសួងវប្បធម៌ និងវិចិត្រសិល្បៈ។ ស៊ិន ចន្ទសាយ៉ា ថ្នាក់ដឹកនាំនាយកដ្ឋានមួយនេះ ថ្លែងប្រាប់ Sabay ថា "ខ្ញុំអាចនិយាយបានថា ភាពយន្តហុងកុងរឿង "បេសកកម្មមេគង្គ" ដែលគ្រោងថតនៅព្រះរាជាណាចក្រកម្ពុជា ឥឡូវគេបានដកថយទៅវិញហើយ ហើយនេះការសម្រេចចិត្តរបស់ផលិតកម្ម Firework ដែលពួកគេបានសម្រេចចិត្តដូច្នេះ"។

រូបតំណាង

និយាយពីមូលហេតុនៃការដកថយនេះ ប្រធាននាយកដ្ឋានដដែល មិនបានបង្ហើបឲ្យច្បាស់លាស់ឡើយ។ លោកគ្រាន់តែនិយាយថា ការដកថយនោះ ដោយសារមានបញ្ហាតិចតួចមួយចំនួន ក្នុងនោះមានដូចជា ពេលវេលា អាកាសធាតុ និងទីតាំងថតជាដើម។ ក្រៅពីនេះ នៅមានជាប់ទាក់ទងជាមួយស្ថាប័នរដ្ឋ និងឯកជនជាច្រើនទៀត។ បន្ថែមពីលើនេះ លោកទទួលស្គាល់ថា ប្រទេសយើងនៅមានការពិបាកខ្លះៗក្នុងការទំនាក់ទំនងផ្សេងៗ។

លោក បន្តថា "ក្រៅពីនេះ ខ្ញុំអាចនិយាយបានថា ទាំងសង្ខាងមានចំណុចខ្វះខាតដូចគ្នា ហើយបើតាមខ្ញុំគិតនោះ គេយកយើងគ្រាន់តែជាជម្រើសទី២ជាមួយនឹងប្រទេសផ្សេងមានន័យថា បើគេសុំប្រទេសផ្សេងដូចជាថៃជាដើមមិនបាន គេមកយើង។ តាមខ្ញុំដឹងគេបារម្ភថា Scene ខ្លះថៃគេអត់អនុញ្ញាត អីចឹងគេមកស្រុកយើង តែឥឡូវថៃគេអនុញ្ញាតហើយ គេ(ផលិតកម្ម)ក៏ Move ទៅវិញ។ អីចឹងខ្ញុំថា គេទុកយើងជាជម្រើសទី២ទេ"។

តាមព័ត៌មាន ភាពយន្តហុងកុងរឿង "បេសកកម្មមេគង្គ" គឺនិយាយអំពីការចរាចរណ៍ និងបង្ក្រាបគ្រឿងញៀនឆ្លងដែន។ សាច់រឿង គឺកើតឡើងនៅតំបន់ត្រីកោណមាស ដែលមានពាក់ព័ន្ធនឹងប្រទេសភូមា ថៃ និងចិន។ លោក សាយ៉ា បញ្ជាក់ថា សាច់រឿងមិនជាប់ពាក់ព័ន្ធនឹងប្រទេសយើងទេ ប៉ុន្តែដំបូងឡើយគេដាក់គម្រោងមកថតនៅស្រុកយើង ព្រោះតែគេមើលឃើញតំបន់ខ្លះអាចថតជំនួសតំបន់ត្រីកោណមាសបានប៉ុណ្ណោះ។

ព័ត៌មានពីភាពយន្តហុងកុងចង់មកថតនៅស្រុកខ្មែរ មិនសូវមានការភ្ញាក់ផ្អើលជាសាធារណៈ ដោយសារមិនមានការចុះផ្សាយព័ត៌មានផ្លូវការ ខណៈកន្លងមកអ្វីៗស្ថិតនៅដំណើរការទំនាក់ទំនងគ្នានៅឡើយ។

លោក ស៊ិន ចន្ទសាយ៉ា ប្រធាននាយកដ្ឋានភាពយន្ត និងផ្សព្វផ្សាយវប្បធម៌នៃក្រសួងវប្បធម៌ និងវិចិត្រសិល្បៈ

យ៉ាងណាដំណឹងនេះ បានសាយភាយខ្លាំងនៅក្នុងសង្គមសិល្បៈខ្មែរ ពិសេសសិល្បករយើងដូចជាសុខ សុវណ្ណាដែន ដែលត្រៀមសម្ដែងជាតួវាយតប់ក្នុងរឿងនេះ ប្រាប់ថា លោកសប្បាយចិត្ត និងមានមោទនភាពដែលបានមានវត្តមានក្នុងភាពយន្តអន្តរជាតិ។ ប៉ុន្តែក្រោយសម្រេចដកថយពីកម្ពុជា ក៏ធ្វើឲ្យលោកមានការសោកស្ដាយខ្លាំងដែរ ព្រោះមិនត្រឹមបាត់ចំណូល ថែមទាំងបាត់ឱកាសលេចមុខនៅឆាកអន្តរជាតិតាមរយៈខ្សែភាពយន្តនេះទៀត។

"បេសកកម្មមេគង្គ" គឺជាភាពយន្តបរទេសទី២ដែលបានសម្រេចដកខ្លួនមិនថតនៅកម្ពុជា ក្នុងពេលដែលអ្វីៗស្ថិតក្នុងដំណើរការទំនាក់ទំនងផ្សេងៗនៅឡើយ គឺបន្ទាប់ពីភាពយន្តហូលីវូដរឿង "មហាបុរសខ្មែរ" ដែលធ្លាប់បានប្រកាសពីគម្រោងមកថតភាពយន្តប្រវត្តិសាស្ត្ររបស់ខ្មែរ ដោយយកសុទ្ធតែតួលំដាប់ពិភពលោកដូចជា Angelina Jolie កីឡាកាសល្បីឈ្មោះ ចន ស៊ីណា និងតារាស្រីកូរ៉េ ហាន់ជីអ៊ុន ជាដើមមកថត ជាមួយទុនវិនិយោគជាង ៧០លានដុល្លារ។

បន្ទាប់ពីធ្វើឲ្យពលរដ្ឋជាទូទៅមោទននឹងដំណឹងនេះ ភាពយន្តហូលីវូដខាងលើ ក៏បានដកខ្លួនទៅវិញ ជាមួយហេតុផលមិនច្បាស់លាស់មួយចំនួន។ វិលមក "បេសកកម្មមេគង្គ" បន្ទាប់ពីសម្រេចមិនឈប់សំចតថតនៅកម្ពុជា ផលិតកម្ម Firework បានសម្រេចយកប្រទេសថៃ និងម៉ាឡេស៊ីជាទីតាំងថតជំនួសវិញ។ លោក ស៊ិន ចន្ទសាយ៉ា បានហៅការនេះថា ជាការខាតបង់ធំមួយទៀតរបស់កម្ពុជា៕

អត្ថបទ៖ ទារិកា