នេះ...! គឺភាពយន្តខ្មែរដំបូងគេ ដែលនិយាយអំពីទឹកភ្នែកឈើព្រៃ

2014-10-15 23:12:40
ចំនួនមតិ 0 | ចំនួនចែករំលែក 0

ចន្លោះមិនឃើញ

“វិញ្ញាណលោកម្ចាស់គ្រញូង" គឺជាភាពយន្តដំបូងគេ ក្នុងប្រវត្តិសាស្ត្រភាពយន្តខ្មែរ ដែលឆ្លុះបង្ហាញពីទុក្ខវេទនារបស់អំបូរឈើគ្រញូង ប្រភេទឈើមួយប្រភេទក្នុងព្រៃរបស់កម្ពុជា ដែលត្រូវបានរងការកាប់ជួញដូរយ៉ាងរង្គាលដោយមនុស្ស។ នេះបើតាមអ្នកស្រី ពាន់ ភួងបុប្ផា។

អ្នកស្រី នៅអះអាងទៀតថា អ្នកស្រីចំណាយពេលយ៉ាងយូរដើម្បីគិតច្នៃឲ្យចេញជាសាច់រឿងឡើង គឺចង់ធ្វើជាសារពញ្ញាក់អារម្មណ៍មួយដល់គ្រប់គ្នា ពិសេសអ្នកប្រព្រឹត្តផ្ទាល់លើសកម្មភាពកាប់ឈើគ្រញូង ឲ្យនឹកគិតដល់ថា ឈឺក៏ជាសភាវៈមានជីវិតដែរ។ "បើទោះវាជារុក្ខជាតិ អត់មានវិញ្ញាណ អត់ចេះនិយាយស្ដី ប៉ុន្តែវាក៏មានជីវិតដូចយើងដែរ យើងកាប់វាមួយដើម ដូចយើងសម្លាប់មនុស្សម្នាក់ដែរ ពួកគេនឹងត្រូវព្រាត់ប្រាស់គ្រួសារ បាត់ទីជម្រក រងទុក្ខខ្លោចផ្សាដូចគ្នា គ្រាន់តែយើងមិនដឹង"។

អ្នកនិពន្ធល្បីឈ្មោះរូបនេះ សង្កត់ធ្ងន់ថា សារជារួមនៃរឿងនេះ គឺបំផុសឲ្យគ្រប់គ្នាមានគំនិតស្រឡាញ់ព្រៃឈើទាំងមូលមិនមែនតែឈើគ្រញូងមួយប្រភេទទេ។ អ្នកស្រី ថា ព្រៃឈើ និងមនុស្សពិតជាមានទំនាក់ទំនងឲ្យប្រយោជន៍គ្នាទៅវិញទៅមក។ ដូច្នេះហើយ ទើបវគ្គមួយនៃសាច់រឿង អំបូរឈើគ្រញូងបានសុំអង្វរថា "សូមកុំកាប់បំផ្លាញពួកខ្ញុំទៀត បើអ្នករក្សាខ្ញុំ ពួកខ្ញុំនឹងរក្សាអ្នកវិញ"។

បើទោះនិយាយឆ្លុះបង្ហាញពីវិនាសកម្មរបស់ឈើគ្រញូង ប៉ុន្តែរឿងនេះ នៅមានលាយឡំ ឈុតឆាកស្នេហា បែបបុរាណ និងកំប្លុកកំប្លែង ជាច្រើនផងដែរ ដែលតួសម្ដែងសុទ្ធជាតារាល្បីៗមានដូចជាលោក អ៊ុន សិទ្ធា និង កញ្ញា តូតា ជាតួឯក លោក ស៊ឹម សុភ័ណ្ឌ លោក ដួង សុខគា អ្នកនាង ទូច ស្រីលក្ខណ៍ ឌីជេ ឃ្លាំង នេន ទុំ និងតារាកិត្តិយសជាច្រើនទៀត។

តាមសាច់រឿង "វិញ្ញាណលោកម្ចាស់គ្រញូង" ផ្ដើមចេញពីនាយ តំ ជាអ្នកស្រុកភូមិម្នាក់ដែលចូលចិត្តលេងល្បែងភ្នាល់អុក។ ថ្ងៃមួយគេបានលេងល្បែងអុកភ្នាល់ឈ្នះបានគ្រែគ្រញូងបុរាណមួយពីលោកដង្ខៅដន សម្ដែងដោយឌីជី ឃ្លាំង។ តាមហោរាបានទាយថា គ្រែគ្រញូងនោះមានដួងវិញ្ញាណថែរក្សា អ្នកដែលអាចដេកលើនោះបានមានតែស្រីក្រមុំ។

នាយ តំ និងប្រពន្ធក៏បានប្រគល់គ្រែនោះឲ្យទៅប្អូនថ្លៃរបស់គេ ឈ្មោះ "កែវ" ដែលជាស្រីក្រមុំ។ កែវបានគ្រែនោះ នាងសប្បាយចិត្តណាស់។ នាយ តំ តែងលួចគយគន់សម្រស់កែវជាប្អូនថ្លៃ ឃើញ នាងស្រស់ស្អាតធ្វើឲ្យគេត្រេកត្រអាល។ ទ្រាំមិនបាន យប់មួយគេបានលួចចូលបន្ទប់ចាប់បង្ខំនាង តែត្រូវដួងវិញ្ញាណថែរក្សាគ្រែ គឺលោកម្ចាស់គ្រញូងចេញមកជួយ។ ម្ដងជាពីរដង លោក ម្ចាស់គ្រញូង និងនាងកែវ ក៏បានស្រលាញ់គ្នា ប៉ុន្តែជាមួយគ្នានោះ ពួកបានរងការឈ្នានីសពីអ្នកស្រុក ធ្វើឲ្យពួកគេជួបឧបសគ្គជាច្រើន។

ចង់ដឹងច្បាស់ពីដំណើររឿងតទៅមុខទៀត កុំភ្លេចតាមដាន "វិញ្ញាណលោកម្ចាស់គ្រញូង" នឹងមានចាក់ផ្សាយជូនទស្សនានៅរោងភាពយន្តលំដាប់អន្តរជាតិ Major Cineplex By Cellcard នៅថ្ងៃទី ២៣ តុលា ២០១៤ខាងមុខនេះហើយ៕

អត្ថបទ៖ ទារិកា

ពាក្យទាក់ទង

ភាពយន្តជាតិ វិញ្ញាណលោកម្ចាស់គ្រញូង

អត្ថបទពេញនិយម

មកស្គាល់មិត្តពីកុមារភាពរបស់ Jungkook បច្ចុប្បន្នជា Idol ល្បីឈ្មោះម្នាក់ដែរប្រចាំវិស័យ

អ្នកជំនាញ កំពុងសាកល្បងផ្គុំថ្មទៅតាមលំនាំដើម នៅប្រាសាទជម

គម្រោងប្រព័ន្ធធារាសាស្រ្តថ្មី២នេះ នឹងបម្រើដល់វិស័យកសិកម្មក្នុងខេត្តកំពង់ធំ យ៉ាងធំធេង

គម្រោងស្ពានផ្សារចាស់-ជ្រោយចង្វារ-អរិយក្សត្រ កំពុងស្ថិតក្នុងដំណាក់កាលណាហើយ?

ត្រឹម៥ខែប៉ុណ្ណោះ! បដិមាបុរាណខ្មែរជាច្រើន ត្រូវបានជីកកំណាយរកឃើញ និងវិលត្រឡប់ពីបរទេស

រវល់ជាមួយការងារប៉ុណ្ណាក៏ដោយ Taylor ឆ្លៀតពេលសាកថ្មជីវិតជាមួយមិត្តប្រុសយ៉ាងផ្អែមល្ហែម

អត្ថបទថ្មី

បន្ទាយឈើ៖ ឈប់លេងបោកទៅ បោកអ៊ីចឹងវាអត់ល្អទេ

ឡានលោតសញ្ញាធុងសាំង! តើអាចបើកបានប៉ុន្មានគីឡូទៀតទើបឡានរលត់?

រដ្ឋលេខាធិការក្រសួងអប់រំ៖ អំពាវនាវដល់គ្រប់ផ្នែកពាក់ព័ន្ធឲ្យចែករំលែកព័ត៌មានពីការប្រកួតសិស្សឧត្ដមសិក្សា

លោកបណ្ឌិត អាំង សិរីពិសិដ្ឋ រំពឹងថ្ងៃណាមួយការលេងបាល់ទះខុសបច្ចេទេសនឹងត្រូវលុបបំបាត់ទាំងស្រុង

ដំណើរចេញពីបេះដូង៖ មិត្តហ្វូន និងកាកបាទក្រហមកម្ពុជា

ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ចុះទស្សនកិច្ចនៅរោងចក្រកែច្នៃផលិតផលអាហារ និងបំលែងសាច់មាន់ក្រុមហ៊ុន ស៊ី.ភី. ខេមបូឌា