ម៉ោង៥ល្ងាចនេះ កម្ពុជា ប៉ះ ឡាវ មិត្តភាពនៅថៃ ត្រៀមជម្រុះ World Cup ប្រចាំទ្វីបអាស៊ី

2015-08-29 15:20:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់ជម្រើសជាតិកម្ពុជា ត្រូវប្រកួតមិត្តភាពអន្តរជាតិជាមួយក្រុមជម្រើសជាតិឡាវ នៅលើទីលានកីឡដ្ឋាន Rajamangala stadium ក្នុងទីក្រុងបាងកក ប្រទេសថៃ នៅវេលាម៉ោង ៥ ល្ងាចថ្ងៃសៅរិ៍ ទី ២៩ ខែ សីហា ឆ្នាំ ២០១៥ នេះ ដើម្បីត្រៀមយុទ្ធនាការជម្រុះ 2018 FIFA World Cup Russia ជាមួយក្រុមយក្សប្រចាំតំបន់អាស៊ី ដូចគ្នា។

ក្រុមកម្ពុជា ត្រូវប្រកួតក្នុងវគ្គជម្រុះជើងទី១ ពូល E នៃពានរង្វាន់ 2018 FIFA World Cup Russia ប្រចាំទ្វីបអាស៊ី ជាមួយម្ចាស់ផ្ទះជប៉ុន នៅថ្ងៃទី ៣ ខែ កញ្ញា ឆ្នាំ ២០១៥ ខាងមុខនៅកីឡដ្ឋាន Saitama Stadium 2002 ក្នុងទីក្រុង Saitama។ ៥ ថ្ងៃបន្ទាប់ក្រុមដែលដឹកនាំដោយគ្រូបង្វឹកជនជាតិកូរ៉េខាងត្បូង មួយនេះនឹងត្រឡប់មកកាន់រាជធានីភ្នំពេញ វិញទទួលភ្ញៀវក្រុមជម្រើសជាតិស៊ីរី នៅថ្ងៃទី ៨ ខែ កញ្ញា ឆ្នាំ ២០១៥។ កម្ពុជា ស្ថិតក្នុងពូល E ជាមួយ ជប៉ុន, ស៊ីរី, សិង្ហបុរី និង អាហ្វហ្គានីស្ថាន។

ចំណែកក្រុមឡាវ ត្រូវធ្វើដំណើរទៅកាន់ទីក្រុងHwaseong ប្រទេសកូរ៉េខាងត្បូង ដើម្បីប្រកួតជាមួយក្រុមម្ចាស់ផ្ទះនៅថ្ងៃទី ៣ ខែ កញ្ញា ឆ្នាំ ២០១៥ ហើយនៅថ្ងៃទី ៨ ខែ កញ្ញា ក្រុមឡាវ ត្រូវបើកទ្វាកីឡដ្ឋាន New Laos National Stadium នៅទីក្រុងវៀងចន្ទន៍ ប្រទេសរបស់ខ្លួន ស្វាគមន៍ក្រុមគុយវ៉ែត ក្នុងវគ្គជម្រុះពូល G នៃពានរង្វាន់ 2018 FIFA World Cup Russia ប្រចាំទ្វីបអាស៊ី។ ឡាវ ស្ថិតក្នុងពូល G ជាមួយក្រុម កូរ៉េខាងត្បូង, លីបង់, គុយវ៉ែត និង មីយ៉ាន់ម៉ា។

ក្រុមជម្រើសជាតិឡាវ

មុនជួបគ្នានេះក្រុមជម្រើសជាតិកម្ពុជា បានយកឈ្នះក្រុមជម្រើសជាតិនៃប្រទេសប៊ូតាន់ដោយលទ្ធផល ២ ទល់ ០ នៅទីលានពហុកីឡដ្ឋានជាតិក្នុងរាជធានីភ្នំពេញ មុនប្រកួតស្មើគ្នាជាមួយក្លិប Army United ក្នុងលីកកំពូលរបស់ថៃ។ ចំណែកក្រុមជម្រើសជាតិឡាវ បានប្រមូលផ្ដុំកីឡាហ្វឹកហាត់នៅក្រៅប្រទេសដូចគ្នាដែរ ហើយបានប្រកួតចាញ់ក្រុមម្ចាស់ផ្ទះ Nakhon Ratchasima FC សមាជិកក្នុងលីកកំពូលថៃដែរ កាលពីថ្ងៃទី២៧ សីហា កន្លងដោយលទ្ធផល ៣ ទល់ ១ នៅកីឡដ្ឋាន 80th Birthday Stadium ក្នុងខេត្ត Nakhon Ratchasima ប្រទេសថៃ។

សម្រាប់ជំនួបមិត្តភាពចុងក្រោយរវាងក្រុមកម្ពុជា និងឡាវ ធ្វើឡើងនៅពហុកីឡដ្ឋានជាតិ ក្នុងរាជធានីភ្នំពេញ ប្រទេសកម្ពុជា កាលពីថ្ងៃទី ២ ខែមិថុនា កន្លងទៅដោយលទ្ធផលបញ្ចប់ទៅស្មើគ្នា ១ ទល់ ១។ កាលនោះខ្សែប្រយុទ្ធ ឃួន ឡាបូរ៉ាវី មកពីក្លិបបឹងកេតបានរកគ្រាប់ឱ្យកម្ពុជា នៅនាទី ៤៦ ស្របពេលកីឡាករ Sangvone Phimmasen របស់ឡាវរកគ្រាប់បាល់១គ្រាប់វិញនៅនាទី ៤៩ ក្នុងការប្រកួត៕