បងប្អួនគាំទ្រ! U-19 កម្ពុជាអាចបង្កើតប្រវត្តិសាស្ត្របានទេ ប៉ះថៃល្ងាចនេះ?
- 2015-08-30 16:28:58
- ចំនួនមតិ 0 | ចំនួនចែករំលែក 0
បងប្អួនគាំទ្រ! U-19 កម្ពុជាអាចបង្កើតប្រវត្តិសាស្ត្របានទេ ប៉ះថៃល្ងាចនេះ?
ចន្លោះមិនឃើញ
ក្រុមបាល់ទាត់ជម្រើសជាតិកម្ពុជាអាយុ១៩ឆ្នាំ(U-19)នឹងបំណែកកំណត់ត្រារយៈពេលជាង៤០ឆ្នាំក្នុងការឡើងទៅវគ្គពាក់កណ្តាលផ្តាច់ព្រ័ត្រ ប្រសិនបើ U-19 កម្ពុជាអាចយកឈ្នះ ឬស្មើក្រុមខ្លាំងថៃវេលាម៉ោង៤ល្ងាចនេះនៅកីឡដ្ឋាន Laos National Stadium នៃពានរង្វាន់ 2015 AFF U-19 Championship នៅប្រទេសឡាវ។ ការប្រកួតនេះផ្សាយបន្តផ្ទាល់ដោយ PNN។
រយៈពេល៤៣ឆ្នាំហើយពោលគឺនៅឆ្នាំ១៩៧២ក្រុមបាល់ទាត់កម្ពុជាបានឡើងដល់វគ្គពាក់កណ្តាលផ្តាច់ព្រ័ត្រ និងទទួលបានចំណាត់ថ្នាក់លេខ៤នៃពានរង្វាន់បាល់ទាត់ទ្វីបអាស៊ី (Asian Cup)។ បន្ទាប់មកកម្ពុជាធ្លាក់ចូលភ្លើងសង្គ្រាម និងមិនដែលបានឡើងវគ្គពាក់កណ្តាលផ្តាច់ព្រ័ត្រម្តងឡើយទាំងតំបន់អាស៊ី និងអាស៊ាន ចាប់តាំងពីពេលនោះរហូតដល់បច្ចុប្បន្ននេះ។
ក្រុម U-19 កម្ពុជា (រូបថត៖ Viphoup Phea)
ពេលវេលាដែលអ្នកគាំទ្រកម្ពុជាទាំងមូលកំពុងទន្ទឹងរង់ចាំបានមកដល់ហើយនៅពេល U-19 កម្ពុជាត្រូវប្រកួតកាត់សេចក្តីជាមួយជើងខ្លាំងថៃវេលាម៉ោង៤ល្ងាចនេះដើម្បីកំណត់វាសនាថាតើកម្ពុជាឡើងទៅវគ្គពាក់កណ្តាលផ្តាច់ព្រ័ត្រឬយ៉ាងណា។
ឆ្លងកាត់៣ប្រកួតកន្លងមក U-19 កម្ពុជាមិនទាន់ចាញ់ម្តងណាឡើយពោលគឺឈ្នះប៊្រុយណេ ៥-១, ឈ្នះហ្វីលីពីន១-០ និងស្មើម្ចាស់ផ្ទះឡាវ០-០ ដែលមាន៧ពិន្ទុក្នុងដៃ ឈរលេខ២ក្នុងតារាងពូលA។ ចំពោះថៃវិញបានឡើងទៅវគ្គពាក់កណ្តាលផ្តាច់ព្រ័ត្រដោយស្វ័យប្រវត្តិហើយ បន្ទាប់ពីឈ្នះទាំង៣ប្រកួត ហើយការប៉ះជាមួយកម្ពុជានេះជាការប្រកួតបង្គ្រប់កិច្ចក្នុងពូល។
លក្ខណសម្រាប់កម្ពុជាគឺត្រូវការត្រឹមស្មើ ឬឈ្នះក៏បានដើម្បីឡើងទៅវគ្គបន្ទាប់ ប៉ុន្តែថៃនឹងមិនបណ្តោយឲ្យកម្ពុជាយកឈ្នះបានឡើយ ពីព្រោះប្រសិនកម្ពុជាឈ្នះ ថៃនឹងឈរលេខ២ក្នុងពូល ហើយកម្ពុជាឈរលេខ១ ដូច្នេះថៃទប់ជើងត្រឹមតែស្មើក៏ឈរលេខ១ឡើងទៅវគ្គខ្វែងដែរ។
កាន់តែពិសេសទៀតនោះ ប្រសិនបើកម្ពុជាស្មើ ឬឈ្នះថៃវេលាម៉ោង៤ល្ងាចនេះនោះ នឹងធ្វើឲ្យម្ចាស់ផ្ទះឡាវខកបំណងយ៉ាងខ្លាំង និងគ្មានន័យអ្វីទេសម្រាប់ការប្រកួតជាមួយហ្វីលីពីនវេលាម៉ោង៧យប់នេះ។ ផ្ទុយទៅវិញ ប្រសិនបើកម្ពុជាចាញ់ថៃនោះ កម្ពុជា និង ឡាវត្រូវចាំអ៊ុតមើលគ្រាប់បាល់ចំណេញ ថាតើក្រុមណាមានគ្រាប់បាល់ចំណេញច្រើនជាងនឹងឡើងទៅវគ្គពាក់កណ្តាលផ្តាច់ព្រ័ត្រ ពីព្រោះមានពិន្ទុស្មើគ្នា។
ក្រុមU-19 ថៃ (រូបថត៖ សហព័ន្ធបាល់ទាត់ឡាវ)
សម្រាប់អ្នកជំនាញបាល់ទាត់កម្ពុជាសុទ្ធតែរំពឹងខ្ពស់ថា កម្ពុជានឹងឡើងទៅវគ្គពាក់កណ្តាលផ្តាច់ព្រ័ត្រជាក់ជាមិនខានឡើយ។ មុនការប្រកួតជាមួយហ្វីលីពីនកាលពីពីរថ្ងៃមុនលោកគ្រូ ប្រាក់ សុវណ្ណារ៉ា លោកគ្រូមាស ចាន់ណា និងលោកគ្រូ សំ វ៉ាន់ដេត សុទ្ធតែអះអាងថា កម្ពុជានឹងឡើង។ កាលពីយប់មិញបុរសដែលត្រូវបានគេដឹងថា ពូកែវិភាគសាច់បាល់លោគ្រូ ភា សុភក្ត្រា បានបញ្ចេញយោបល់ក្នុង Facebook ថា ៖«ខ្ញុំមានជំនឿចិត្តខ្លាំងសម្រាប់ឳកាសឡើងខ្វែងពាក់កណ្តាលផ្តាច់ព្រ័ត្រដោយសំអាងលើហេតុផលពីរចំបង ទីមួយយើងមិនត្រូវការគ្រាប់ឈ្នះ (ការពារជាចំបង) ទីពីរថៃទម្លាក់ជើងទំរង់ ឬកម្រិតនៃការលេងនៃការប្រកួតចុងក្រោយរបស់គេពេលប៉ះយើង ខណៈដែលពិន្ទុគេឈរលេខ១ក្នុងពូលរួចស្រេចទៅហើយ»។
ចំពោះកីឡាករវិញ ចិន វណ្ណៈ ខ្សែការពារដែលរកបាល់បាន១គ្រាប់ឲ្យកម្ពុជានៅពេលឈ្នះប៊្រយណេ ៥-១ នោះមិនបាននៅជួយមិត្តរួមក្រុមឡើយគឺបានវិលត្រឡប់មកផ្ទះវិញដោយសារមានបញ្ហាសុខភាព។ ចំពោះ ច្រឹង ពលរដ្ឋ ដែលជួយឲ្យកម្ពុជាឈ្នះហ្វីលីពីន១-០ ក៏មិនទាន់ច្បាស់ចូលលេងឬយ៉ាងណានោះដែរដោយសារមានបញ្ហាប៉ះទង្គិច និងបានសែងចេញពីទីលានពេលប្រកួតជាមួយហ្វីលីពីន។ ក្រៅពីនោះ គ្មានកីឡាករណាម្នាក់មានបញ្ហាគួរឲ្យកត់សំគាល់ឡើយ។
កម្ពុជាអាចបំបែកកំណត់ត្រាឡើងទៅវគ្គពាក់កណ្តាលផ្តាច់ព្រ័ត្រ? កម្ពុជាអាចធ្វើឲ្យម្ចាស់ផ្ទះខកបំណងសម្រាប់ការប្រកួតចុងក្រោយ ឬយ៉ាងណា?
អត្ថបទ៖ ជាន ចាន់រ៉ា