ញាន ផល្លឹកឈានទៅបង្កើតរថយន្តប្រើថាមពលពន្លឺព្រះអាទិត្យ អនាគតនាំចេញទៅក្រៅប្រទេស

2015-09-01 16:40:00
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ញាន ផល្លឹក បានសហការជាមួយក្រុមហ៊ុនបច្ចេកវិទ្យាដ៏ធំមួយ ដែលមានមូលដ្ឋាននៅប្រទេសអូស្ត្រាលី Star 8 ក្នុងគម្រោងបង្កើតយានជំនិះប្រើប្រាស់ថាមពលពន្លឺព្រះអាទិត្យ ដែលគោលដៅបម្រើទីផ្សារក្នុងស្រុក និងអនាគតនាំចេញទៅលក់នៅក្រៅប្រទេស។

លោក ញាន ផល្លឹកបានប្រាប់ថា ដោយសម្លឹងឃើញឱកាសទីផ្សារការផលិតយានជំនិះពន្លឺព្រះអាទិត្យកំពុងទទួលបានគាំទ្រនិងការផុលផុសកាន់តែខ្លាំង លោកក៏បានសហការជាមួយក្រុមហ៊ុនបច្ចេកវិទ្យារបស់អូស្ត្រាលី Star 8 ដើម្បីឈានទៅបង្កើតគម្រោងផលិតយានជំនិះប្រើប្រាស់ពន្លឺព្រះអាទិត្យ ដើម្បីបម្រើសេចក្តីត្រូវការរបស់អ្នកប្រើប្រាស់។

លោកថា ការផលិតយានជំនិះប្រើពន្លឺព្រះអាទិត្យដែលជាប្រភពថាមពលស្អាត អាចកាត់បន្ថយការបញ្ចេញជាតិពុលនៅក្នុងបរិស្ថាន និងជួយលើកកម្ពស់ជីវភាពរស់នៅរបស់ពលរដ្ឋកាន់តែប្រសើរ។

ក្នុងតួនាទីជាប្រធានគ្រប់គ្រងទូទៅផ្នែកស្រាវជ្រាវ លោកញាន ផល្លឹកកំពុងបង្កើតរថយន្តដើរដោយថាមពលពន្លឺព្រះអាទិត្យដែលជាដំណាក់កាលដំបូង មុនឈានទៅផលិតយានជំនិះដទៃទៀតដោយទាញប្រភពថាមពលដែលមិនចេះរីងស្ងួតនេះ។

លោកញាន ផល្លឹកបានអះអាងថា ពលរដ្ឋជាច្រើនបារម្ភពីការការកើនឡើងតម្លៃប្រេងឥន្ធនៈ ដែលបានប៉ះពាល់ដល់ជីវភាពរស់នៅ និងនាំក្តីកង្វល់ចំពោះបរិស្ថាន។ ដូច្នេះគម្រោងបង្កើតយានជំនិះប្រើប្រាស់ថាមពលព្រះអាទិត្យ មិនត្រឹមតែជួយលើកស្ទូយដល់ជីវភាពរសន់ៅរបស់ពលរដ្ឋ ប៉ុន្តែក៏បានរួមចំណែកជួយលើកកម្ពស់ដល់ការពារបរិស្ថានកាន់តែប្រសើរ។

តាមស្ថាបនិករូបនេះថា លោកកំពុងជំរុញក្នុងការផលិតឡានប្រើពន្លឺព្រះអាទិត្យនេះ ដើម្បីបម្រើទីផ្សារប្រើប្រាស់ក្នុងស្រុក និងអនាគតនាំចេញទៅលក់នៅទីផ្សារខាងក្រៅដោយគោលដៅចម្បងលក់តាមប្រទេសនៅតំបន់អាស៊ី៕

បន្តអាន៖ ខ្លាំងផ្នែកបច្ចេកវិទ្យា មិនប្រាកដរៀនចេះចប់ជំនាញបច្ចេកវិទ្យា។

បន្តអាន៖ ការសាងសមិទ្ធផលដ៏អស្ចារ្យ ធ្វើឲ្យយុវជនខ្មែរលេចធ្លោក្នុងវិស័យបច្ចេកវិទ្យា។

អត្ថបទ៖ ប៊ុណ្ណារ៉ា

រូបថត៖ លោក ញាន ផល្លឹក