តួ Stunt ហូលីវូដដើមកំណើតខ្មែរ Jean-Paul Ly ត្រៀមមកថតរឿងលើកដំបូងនៅប្រទេសកម្ពុជា

2015-09-02 16:28:01
ចំនួនមតិ 0 | ចំនួនចែករំលែក 0

ចន្លោះមិនឃើញ

តួ Stunt ហូលីវូដមានដើមកំណើតខ្មែរ Jean-Paul Ly នឹងធ្វើដំណើរមកប្រទេសកម្ពុជាម្ដងទៀត ដើម្បីចូលរួមសម្ដែងភាពយន្តជាលើកដំបូងសម្រាប់ទឹកដីកំណើតរបស់ឪពុក-ម្ដាយ អំឡុងចុង ២០១៥ ខាងមុខនេះ។

តាមរយៈសារឆ្លងឆ្លើយជាមួយ Sabay តារាសម្ដែងក្នុងឈុតគ្រោះថ្នាក់របស់ហូលីវូដរូបនេះ បញ្ជាក់ថា បច្ចុប្បន្នរូបគេកំពុងរស់នៅក្នុងទីក្រុងឡុងដ៍ប្រទេសអង់គ្លេសនៅឡើយ ដើម្បីបន្តការសិក្សានៅក្នុងសាលាកុន ហើយចំពោះដំណឹងនោះជាការពិតមែន។ Jean Paul Ly បន្ថែមថា៖ "បាទ! ខ្ញុំជាតួសំខាន់ម្នាក់នៅក្នុងរឿងហ្នឹង ហើយជាសម្ដែងភាពយន្តលើកដំបូងហើយនៅប្រទេសកម្ពុជា តាមរយៈផលិតកម្មធំមួយ”។

តារាហូលីវូដកូនកាត់ខ្មែរ-បារាំងវ័យ ៣១ ឆ្នាំរូបនេះបន្ថែមទៀតថា រូបគេនឹងសម្ដែងជាតួសំខាន់រួមគ្នាជាមួយតារាសម្ដែង សាវីន ហ្វីលីព និង លោក អ៊ូ ណារ៉ា ដែលចាប់ផ្ដើមដំណើរការថតអំឡុងចុងឆ្នាំ ២០១៥ ជារយៈពេលដែលរូបគេកំពុងទន្ទឹងរង់ចាំ។ តារាសម្ដែងក្នុងឈុតគ្រោះថ្នាក់ដដែលអះអាងកន្លងថា ពិតជាមោទនភាពប្រសិនបើបានសម្ដែងលើទឹកដីប្រទេសកម្ពុជា ជាកន្លែងកំណើតឪពុក-ម្ដាយរបស់គេ។

តារាសម្ដែង Jean -Paul Ly បានធ្វើដំណើរ ៣ លើកហើយ មកកាន់ប្រទេសកម្ពុជា ទីកំណើតឪពុក-ម្ដាយ ដើម្បីស្វែងរកដៃគូសហការផលិតខ្សែភាពយន្តវាយតប់លំដាប់អន្តរជាតិ ខណៈមើលឃើញថា វិស័យនេះចាប់ផ្ដើមមានការរីកចម្រើនបណ្ដើរៗ ទោះមិនទាន់ដល់ប្រទេសជឿនលឿនក៏ដោយ។ ប៉ុន្តែភាពយន្តទាំងនោះផ្ដោតលើកំប្លែង និង មនោសញ្ចេតនាប៉ុណ្ណោះ ខណៈភាពយន្តបែបវាយប្រហារមានគុណភាពនៅតិចតួចនៅឡើយ។

អ្នកលេងគុនចម្រុះរូបនេះចាត់ទុកថា ជាជ្រុងមួយថ្មីសម្រាប់ទស្សនិកជន ប្រសិនបើរូបគេអាចបានសហការផលិតភាពយន្តបែបវាយប្រហារមានគុណភាពលក្ខណៈអន្តរជាតិនៅប្រទេសកម្ពុជា៕

អានអត្ថបទ៖ ក្រោយបរាជ័យ Cambodian Idol មុត សាវ៉ៃ ត្រៀមចេញបទចម្រៀងហើយ

អានអត្ថបទ៖ ប្លែកៗច្នៃរបស់របរប្រើប្រាស់ប្រចាំថ្ងៃទៅជាម៉ូតសម្លៀកបំពាក់គួរឲ្យទាក់ទាញ