ក្រោយបរាជ័យ Cambodian Idol មុត សាវ៉ៃ ត្រៀមចេញបទចម្រៀងហើយ

2015-09-02 12:55:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយជ្រុះពីកម្មវិធី Cambodian Idol អតីតបេក្ខនារី មុត សាវ៉ៃ ពេលនេះកំពុងត្រៀមចេញបទចម្រៀងក្នុងផលិតកម្ម The Best Media ដោយកំពុងហ្វឹកហាត់ប្រើប្រាស់សំឡេងនៅឡើយ។

ចាងហ្វាងផលិតកម្ម ធី វន្ថា បានបញ្ជាក់ថា៖" ដោយសារខ្ញុំឃើញការស្រលាញ់ ការខិតខំរបស់គាត់ ដូចអ្វីដែលខ្ញុំជួយអ្នកដទៃដែរ ខ្ញុំចង់ឱ្យពួកគាត់បានសម្រេចក្ដីស្រមៃរបស់គាត់"។ យុវជនវ័យ ២៣ ឆ្នាំរូបនេះបន្ថែមថា អ្វីដែលរូបគេអាចធ្វើបាន គឺផ្ដល់ឱកាសឱ្យនាងក្លាយជាអ្នកចម្រៀងម្នាក់ ដែលអាចដើរដល់គោលដៅចង់បាននាពេលណាមួយ ក្រោយពីមានការចាប់អារម្មណ៍ពីទស្សនិកជន និងអ្នកគាំទ្ររបស់នាងផងដែរ។

ធី វន្ថា បន្ថែមថា បច្ចុប្បន្ន មុត សាវ៉ៃ កំពុងហាត់សមបទចម្រៀងនៅឡើយ មិនទាន់បានថតជាសំឡេងនោះទេ។ ចាងហ្វាងផលិតកម្មវ័យក្មេងដដែលបញ្ជាក់ថា បទដំបូងរបស់នាង ត្រូវច្រៀងរួមគ្នាជាមួយតារាចម្រៀងផ្សេងទៀតនៅក្នុងផលិតកម្ម។ ចំពោះបទបន្ទាប់ទៀត សាវ៉ៃ នឹងច្រៀងទោលម្នាក់ឯង ហើយរៀបរាប់ពីជីវិតផ្ទាល់ខ្លួន។

ទោះបីជាយ៉ាងណា អ្នកនិពន្ធទំនុកច្រៀង និងបទភ្លេងខាងលើបន្ថែមទៀតថា សំឡេងរបស់អតីតបេក្ខភាព Cambodian Idol ខាងលើនៅមានកម្រិតនៅឡើយ ដែលទាមទារការកែតម្រូវបន្ថែមទៀតដើម្បីបំពេញចំណុចខ្វះខាត។ ប៉ុន្តែយោងតាមការខិតខំ និងក្ដីស្រលាញ់ លោកជឿជាក់ថា ស្ត្រីអ្នកថតរូបមកពីខេត្តកំពង់ចាមខាងលើ អាចមានការវិវត្តន៍ខ្លួនទៅមុខបានឆាប់មិនខាន។

ដោយឡែកចំពោះអ្នកចម្រៀងផ្សេងទៀតនៅក្នុងផលិតកម្ម ក៏ធ្លាប់មានចំណុចខ្វះខាតដូចគ្នាដែរ ប៉ុន្តែដោយសារការខិតខំប្រឹងប្រែងរបស់ពួកគេ ទើបអ្នកគ្រប់គ្រងរូបនេះ សម្រេចជ្រើសរើសយក។

The Best Media ជាផលិតកម្មថ្មីមួយបង្កើតឡើងដោយយុវវ័យ ១ ក្រុម ដែលមាននិន្នាការផលិតបទចម្រៀងដោយខ្លួនឯងមិនចម្លងបរទេស។ បច្ចុប្បន្ននេះផលិតកម្មមួយនេះមានតារាចម្រៀង ៦ រូបប៉ុណ្ណោះ ហើយកំពុងដំណើរជាជំហានបណ្ដើរៗ ក្នុងការផលិតបទចម្រៀងថ្មីបន្តបន្ទាប់ រួមទាំងការផលិតកម្មវិធីទូរទស្សន៍ផងដែរ៕

អានអត្ថបទ៖ ភិន សុដាលីស ឆ្លើយតបថា មិនបានចេញពីផ្ទះទេ និង សំណូមពរលោកឪពុក…

អានអត្ថបទ៖ ប៉ែន តុលា ជម្រះបញ្ជីជាមួយ ភិន សុដាលីស

អត្ថបទ៖ សំ ជំនាញ