អ្នកនិពន្ធ ជួន សុជា ឱ្យម្ដាយស្រោចទឹកជាប្រចាំព្រោះ...

2015-09-04 15:12:02
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកដឹកនាំសម្ដែង និង និពន្ធទំនុកច្រៀងប្រចាំផលិតកម្មសាន់ដេ ជួន សុជា បានបង្ហើបប្រាប់ថា លោកតែងទៅឱ្យម្ដាយស្រោចទឹកនៅស្រុកកំណើត នាខេត្តតាកែវ ជាប្រចាំ ព្រោះជាអ្នកផ្ដល់កំណើត គួរគប្បីទទួលបានការគោរពមុនអ្នកផ្សេងទៀត។

“មានប្រសិទ្ធភាព ឬមិនមានប្រសិទ្ធភាព ខ្ញុំមិនបានដឹងទេ គឺគ្រាន់តែដឹងថា គាត់ជាព្រះរស់ដែលខ្ញុំគប្បីគោរពឱ្យបានមុនគេបង្អស់"។ លោកបញ្ជាក់មកកាន់ Sabay មុននេះបន្តិច។ អ្នកដឹកនាំសម្ដែងខារ៉ាអូខេដដែលបន្ថែមថា រាល់ពេលធ្វើដំណើរទៅស្រុកកំណើតម្ដងៗ តែងឱ្យម្ដាយស្រោចទឹកជានិច្ចមិនដែលដាច់នោះឡើ ទោះបីជាមិនបានដឹងច្បាស់ថា មានប្រសិទ្ធភាពកម្រិតណាក្ដី។ ប៉ុន្តែហាក់មានអារម្មណ៍ជ្រះស្រឡះជាងពីមុន។

អ្នកនិពន្ធរូបនេះបន្ថែមម្យ៉ាងទៀតថា ដោយសារឪពុកជាមន្ត្រីរាជការ ហើយមានការមមាញឹកជាប្រចាំរាល់ពេលទៅលេងស្រុកកំណើតម្ដងៗ និងមិនសូវមានពេលជួបគ្នា ទើបភាពស្និទ្ធស្នាលបានធ្លាក់ទៅលើម្ដាយទាំងស្រុង។ ទម្លាប់នេះកើតឡើងបន្ទាប់ពីបានមករស់នៅ និង ប្រកបអាជីពជាអ្នកនិពន្ធនៅភ្នំពេញប៉ុន្មានឆ្នាំចុងក្រោយនេះ។

អ្នកនិពន្ធវ័យ ២៥ ឆ្នាំរូបនេះស្នើឱ្យយុវវ័យទាំងអស់ធ្វើយ៉ាងណាចេះផ្ដល់ការគោរពចំពោះឪពុកម្ដាយ ដែលជាអ្នកផ្ដល់កំណើត ចិញ្ចឹមបីបាច់ថែរក្សា និងជាគ្រូដើមដែលបង្រៀនកូនសព្វបែបយ៉ាងទម្រាំដឹងក្ដីអាចរស់នៅដោយខ្លួនឯងបាន។ កូនប្រុសអ្នកតាកែវដដែលបញ្ជាក់ថា កូនគ្រប់រូបមិនគួរធ្វើឱ្យឪពុកម្ដាយពិបាកចិត្ត ឬស្រក់ទឹកភ្នែកដោយសារទង្វើខុសឆ្គងរបស់កូននោះទេ៕

អានអត្ថបទ៖ កវី កែវ សាស្ត្រា និង DJ អាចារ្យធំ ចាប់ដៃគ្នាជួយលោកគ្រូ ជ័យ ប៊ុនឈឿ

អានអត្ថបទ៖ ដែលស្ដាប់ទេរឿងកំប្លែងពី ម៉ាដូណា “ខ្ទើយនៅសៀមរាប”