កវី កែវ សាស្ត្រា និង DJ អាចារ្យធំ ចាប់ដៃគ្នាជួយលោកគ្រូ ជ័យ ប៊ុនឈឿ

2015-09-03 20:33:56
ចំនួនមតិ 0 | ចំនួនចែករំលែក 0

ចន្លោះមិនឃើញ

កែវ សាស្ត្រា មានងារជាអ្នកកវីម្ចាស់ទន្លេបាសាក់ បានចាប់ដៃគ្នាជាមួយ DJ អាចារ្យធំ ដើម្បីស្វែងរកថវិកាជួយដល់លោកគ្រូ ជ័យ ប៊ុនឈឿ អាជ្ញាកណ្ដាលប្រដាល់គុនខ្មែរ កំពុងមានជំងឺ ហើយជួបការលំបាក។

លោកថា យុទ្ធនាការនេះ នឹងចាប់ផ្ដើមនៅថ្ងៃទី ៨ កញ្ញាខាងមុខ ជាឱកាសការប្រកួតរវាងជម្រើសជាតិកម្ពុជា ជាមួយប្រទេស ស៊ីរី។ កវីដដែលបញ្ជាក់ថា គ្រោងនឹងយកកន្សែងសប្បុរសធម៌ចំនួន ១ ០០០ និង មួកអ្នកចម្បាំងអង្គរចំនួន ១ ០០០ ដើម្បីលក់ក្នុងឱកាសនោះ ហើយយកប្រាក់ចំណេញ ៤០%បរិច្ចាគដល់អាជ្ញាកណ្ដាលវ័យចំណាស់ខាងលើសម្រួលដល់ការព្យាបាលជំងឺ និងកំពុងត្រៀមចូលបន្ទប់វះកាត់ និង១០%ទៀតជួយទៅសហព័ន្ធកីឡា ខណៈថវិកានៅសល់នឹងត្រូវបែងចែកទៅជួយកុមារក្រីក្រតាមបណ្ដាខេត្ត។

កែវ សាស្ត្រា បន្ថែមថា៖ "យើងចង់ធ្វើម៉េចរកមុខរបរមួយឱ្យកូនគាត់រកស៊ីបាន ដើម្បីមានលំនឹងជីវភាពរស់នៅ អាចដោះស្រាយរហូតតទៅមុខទៀត"។ អ្នកនិពន្ធរូបនេះបន្តដោយយល់ឃើញថា ប្រសិនបើគ្មាន លោក ជ័យ ប៊ុនឈឿ នោះទេវិស័យកីឡាប្រដាល់ខ្មែរ ក៏មិនមានថ្ងៃនេះដែរ ព្រោះលោកជាអាជ្ញាកណ្ដាលម្នាក់មិនមានបក្សពួក និង តែងមានមុខនៅក្នុងការប្រកួតគូពិសេសៗ។ លោក និងគ្នីគ្នាផ្សេងទៀតត្រូវធ្វើអ្វីម្យ៉ាងសម្រាប់អតីតអាជ្ញាកណ្ដាលរូបនេះ។

កវី កែវ សាស្ត្រា

ស្ថាបនិកក្រុមគោព្រៃ បានចាត់ទុកសកម្មភាពនេះថា ជាគំរូមួយសម្រាប់យុវជនជំនាន់ក្រោយផ្សេងទៀតក្នុងការជួយដល់មរតកមនុស្សរស់បាត់បង់សមត្ថភាពការងារ។ កន្លងមកក្រុមនេះក៏បានសហការគ្នាជាច្រើនលើកមកហើយ ក្នុងគោលដៅសប្បុរសធម៌ដូច្នេះដែរ។ ជាក់ស្ដែងថ្មីៗនេះ ពួកគេបាននាំយកថវិកាមួយចំនួនជួយដល់មន្ទីរពេទ្យគន្ធបុប្ផាផងដែរ។

ចំពោះសកម្មភាពលើកនេះកវីរំពឹងថា នឹងមានការគាំទ្រច្រើនជាងការប្រកួតលើកមុន។ លោកបញ្ជាក់ទៀតថា៖ ហើយថវិកាទទួលបាន ពួកខ្ញុំនឹងយកទៅប្រើឱ្យមានប្រយោជន៍បំផុត សម្រាប់សង្គមយើងដោយជួយដល់អ្នកមានស្នាដៃអភិរក្សវិស័យកីឡា ឬវិស័យសិល្បៈវប្បធម៌ជាដើម"។ កែវ សាស្ត្រា បន្ថែមថា ប្រសិនបើទិញកន្សែង និង មួកកាន់តែច្រើន មានន័យថា បានជួយលោកគ្រូ ជ័យ ប៊ុនឈឿ កាន់តែច្រើនដូចគ្នាដែរ៕

អានអត្ថបទ៖ ឧកញ៉ា ឃ្លោក ឡើងជំនួសតំណែង អៀង ស៊ីធុល

អានអត្ថបទ៖ តារាស្រីល្បីឈ្មោះច្រើនដួង ការហើយតាមស្វាមីទៅរស់នៅបរទេស

អត្ថបទ៖ សំ ជំនាញ