ខ្លីៗជួយបង្កើនការយល់ដឹងចរាចរណ៍របស់អ្នកកាន់តែប្រសើរ

2015-09-04 18:01:44
ចំនួនមតិ 0 | ចំនួនចែករំលែក 0

ចន្លោះមិនឃើញ

សប្ដាហ៍មុន Sabay បានចែករំលែកចំណេះដឹងជុំវិញចរាចរណ៍ឲ្យប្រិយមិត្តបានដឹងច្រើនដែរហើយ។ ថ្ងៃនេះយើងបន្តស្វែងយល់ ១០ សំណួរ-ចម្លើយបន្ថែមទៀតជុំវិញបញ្ហាការធ្វើដំណើរលើដងផ្លូវនេះ។

១ តើនរណាខ្លះដែលអាចរាប់ជាអ្នកបើកបរ? អ្នកបើកបរគឺអ្នកបញ្ជាយានគិតទាំងអ្នកជិះសត្វ អ្នកដឹកសត្វ និងអ្នកបរសត្វនៅលើផ្លូវ

២ បើរថយន្តខូចកណ្ដាលទ្រូងផ្លូវសាធារណៈ តើអ្នកត្រូវធ្វើដូចម្ដេច? ត្រូវរុញរថយន្តទៅអែបខាងស្ដាំទើបធ្វើការជួសជុល បើគ្មានផ្លូវគ្រប់គ្រាន់ខ្ញុំត្រូវដាក់សញ្ញាឲ្យដឹង

៣ បើមានរថយន្តពីក្រោយសុំជែង តើអ្នកត្រូវធ្វើដូចម្ដេច? បើខាងមុខគ្មានឧបសគ្គ ខ្ញុំឲ្យសញ្ញាបត់ស្ដាំ បន្ថយល្បឿន និងអែបមកស្ដាំជាសញ្ញាអនុញ្ញាតឲ្យរថយន្តខាងក្រោយអាចជែងទៅបាន

៤ តើអ្នកបើកបរអាចប្រើស៊ីផ្លេនៅពេលណា? កន្លែងណា? ប្រើនៅពេលថ្ងៃ ពេលសុំជែង និងមិនត្រូវប្រើនៅជិតមន្ទីរពេទ្យ ឬកន្លែងណាដែលមានសញ្ញាហាមស៊ីផ្លេ

៥ ក្នុងទីក្រុង ឬទីប្រជុំជន នៅលើផ្លូវដែលមានទិសចរាចរណ៍ពីរផ្ទុយគ្នា តើអ្នកអាចចតរថយន្តបានជាពីរជួរឬទេ? មិនអាចចតបានទេ

៦ ក្រៅទីប្រជុំជន តើការកំណត់ល្បឿនអតិបរមាសម្រាប់រថយន្តធុនតូចប៉ុន្មានគីឡូម៉ែត្រក្នុងមួយម៉ោង? ៩០ គីឡូម៉ែត្រក្នុងមួយម៉ោង

៧ បើអ្នកបើកបរក្រៅក្រុងក្នុងល្បឿន ៩០ គីឡូម៉ែត្រក្នុងមួយម៉ោង តើរថយន្តអ្នកពេលជាន់ហ្វ្រាំងអាចឈប់ចម្ងាយប៉ុន្មានម៉ែត្រនៅលើផ្លូវស្ងួត និងប៉ុន្មានម៉ែត្រនៅលើផ្លូវសើម ឬរអិល? ៨១ ម៉ែត្រនៅលើផ្លូវស្ងួត និង ១២០ ម៉ែត្រនៅលើផ្លូវសើម

៨ ពេលចតរថយន្ត តើអ្នកត្រូវមានការប្រុងប្រយ័ត្នយ៉ាងដូចម្ដេច? ខ្ញុំត្រូវចតខាងស្ដាំដៃតាមទិសចរាចរ និងមិនឲ្យរំខានដល់អ្នកប្រើប្រាស់ផ្លូវ ឬចតនៅចំណតរថយន្ត រួចហើយត្រូវដាក់ហ្វ្រាំងដៃ។

៩ តើអ្នកបើកបរត្រូវចត ឬឈប់យានជំនិះចម្ងាយប៉ុន្មានម៉ែត្រពីផ្លូវបត់ ឬផ្លូវប្រសព្វ? យ៉ាងតិច ៥ ម៉ែត្រ និងយ៉ាងតិច ១០ ម៉ែត្រលើមហាវិថី

១០ តើរថយន្តមួយណាមានសិទ្ធិអាទិភាព បើរថយន្តមួយកំពុងធ្វើចរាចរណ៍លើផ្លូវក្រាលកៅស៊ូ និងរថយន្តមួយទៀតចេញពីផ្លូវដី? រថយន្តកំពុងធ្វើចរាចរនៅលើផ្លូវក្រាលកៅស៊ូ មានសិទ្ធិអាទិភាព

ប្រសិនបើអ្នកមានអត្ថបទចំណេះដឹងចរាចរណ៍ ឬច្បាប់នានាដែលចង់សរសេរ និងចែករំលែកជាមួយ Sabay លោកអ្នកអាចសរសេរហើយផ្ញើមកកាន់អាសយដ្ឋានខាងក្រោមបាន។

អ៊ីមែល៖ prak.chanseyha@cidc.com.kh ទូរសព្ទ៖ ០១៧ ៥៥ ៧៦ ៨៨