ម៉ូដែល គួច ចាន់ដានិច មានអារម្មណ៍ប្លែកពេលថតជាមួយតួយក្សល្ខោន
- 2015-09-05 15:52:08
- ចំនួនមតិ 0 | ចំនួនចែករំលែក 0
ម៉ូដែល គួច ចាន់ដានិច មានអារម្មណ៍ប្លែកពេលថតជាមួយតួយក្សល្ខោន
ចន្លោះមិនឃើញ
កាលពីម្សិលមិញក្នុងឱកាសខួបគម្រប់ ៤ ឆ្នាំរបស់ទស្សនាវដ្ដី SOVRIN នៅ ផ្លេនថិសិន កញ្ញា គួច ចាន់ដានិច បានរៀបរាប់អារម្មណ៍ពិតចំពោះការថត Cover ដាក់លើកនេះថា នាងពិតជាមានអារម្មណ៍ប្លែក និងរំភើបពេលបានថតជាមួយតួយក្សល្ខោន។
“នេះជាលើកទីពីរហើយដែរខ្ញុំបានថតឲ្យគម្របមុខរបស់ទស្សនាវដ្ដីនេះ តែលើកនេះខ្ញុំពិតជាភ្ញាក់ផ្អើល សប្បាយរីករាយ និងមានអារម្មណ៍ថាប្លែកមែនទែនដែលបានថតបែបនឹងជាមួយពួកគាត់។ ថ្វីត្បិតតែវាសប្បាយរីករាយក៏ពិតមែន តែការថតនេះវាមានជួបបញ្ហាខ្លះៗ ដោយបានទៅថតនៅខេត្តព្រៃវែង និងពេលថតៗ ស្រាប់តែភ្លៀង ព្រោះជារដូវវស្សា។” តារាម៉ូដែលដ៏ល្បីរូបនោះក៏បាននិយាយបន្ថែមទៀតថា ការរួមបញ្ចូលគ្នារវាងសិល្បៈបុរាណខ្មែរ និងសិល្បៈបែបបស្ចិមប្រទេសនេះ គឺធ្វើឲ្យយុវវ័យជំនាន់ក្រោយមិនបំភ្លេចទម្រង់សិល្បៈបែបបុរាណនេះបានឡើយ។
ចំណែកឯលោក ជ័យ រដ្ឋា នាយកផ្នែកច្នៃប្រឌិតរបស់ទស្សនាវដ្ដី SOVRIN ថាការយកតួល្ខោនបាសាក់មកថតរួមបញ្ចូលគ្នាជាមួយ Fashion នោះគឺជារឿងប្លែកមួយមិនធ្លាប់មានទស្សនាវដ្ដីណាធ្វើទេពីមុនមក។
"អរ៎ នេះជាលើកទីពីរដែរសម្រាប់ក្រុមពួកខ្ញុំ ដោយលើកមុនពួកខ្ញុំក៏បានលើកយកយីកេ ដែលជាសិល្បៈបុរាណខ្មែរមករួមបញ្ចូលម្ដងដែរ ហើយលើកនេះខ្ញុំយកល្ខោនបាសាក់វិញម្ដង។ មូលហេតុដែលធ្វើឲ្យខ្ញុំជ្រើសបែបនេះចង់បង្ហាញឲ្យពិភពខាងក្រៅស្គាល់ពីអត្តសញ្ញាណរបស់កម្ពុជាកាន់តែច្បាស់។ ជាពិសេសគឺចង់ឲ្យពុកម៉ែបងប្អូនជួយលើកទឹកចិត្តដល់ក្នុងល្ខោនបាសាក់ និងសិល្បៈបែបបុរាណដទៃទៀតឲ្យកាន់តែច្រើនជាងនេះ៕”
អត្ថបទ៖ទ្រី រ៉ាវី