យុវជនមួយក្រុមរួមគ្នាលើកស្ទួយវិស័យ Robot នៅកម្ពុជា

2015-09-09 17:30:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារការស្រលាញ់លើវិស័យបង្កើត Robot យុវជនខ្មែរមួយក្រុមមានគ្នា ៥ នាក់ រួមគ្នាលើកស្ទួយវិស័យនេះទោះបីពួកគេរៀនសាលាខុសគ្នាក៏ដោយ។

លោក ជី សុថារិទ្ធ ប្រធានក្រុម The Khmer Nerd បានឲ្យដឹងថា ក្រុមលោកទើបតែបង្កើតឡើងបានមួយរយៈពេលក្នុងគោលបំណងចែករំលែកចំណេះដឹងទាំងឡាយទាក់ទងនឹង Robot ដល់បងប្អូនដែលមានចិត្តស្រលាញ់លើវិស័យមួយនេះ។ សុថារិទ្ធបន្តថា ដំបូងឡើយក្រុមមួយនេះគ្រាន់តែជាការសិក្សានិងចែករំលែកបទពិសោធន៍គ្នាទៅវិញទៅមកនាថ្ងៃចុងសប្ដាហ៍តែប៉ុណ្ណោះ ព្រោះសមាជិកក្រុមគឺមកពីបណ្ដាសាកលវិទ្យាល័យផ្សេងៗ។

ការសិក្សាជាមួយគ្នា គឺមានរយៈពេលជាងមួយឆ្នាំមុនការប្រកួត Robot របស់ទូរទស្សន៍ជាតិ មកពីបណ្ដាសាកលវិទ្យាល័យផ្សេងៗ។ សមាជិកក្រុមទាំងអស់ គឺតំណាងឲ្យសាកលវិទ្យាល័យរៀងៗខ្លួនដូចនេះ ការប្រកួតប្រជែងទោះបីឈ្នះ ឬ ចាញ់ក៏ក្រុមមួយនេះមិនយកគ្នាធ្វើសត្រូវ ដោយសារចង់ស្វែងយល់ពីគ្នា និង នៅមានចន្លោះខ្វះខាតច្រើនលើចំណេះដឹងទាំង Hardware និង Software។ មានតែធ្វើបែបនេះទើបធ្វើឲ្យចំណេះដឹងខាងបច្ចេកវិទ្យា Robot មួយនេះរីកចម្រើនខ្លាំង។

Robot ក្រុមលោកបានចូលរួមកម្មវិធីវិទ្យាសាស្ត្រ និង ពិព័រណ៍វិទ្យាសាស្ត្រលើកទី ១ នៅក្នុងប្រទេសកម្ពុជាដោយបានដាក់បង្ហាញ Robot Line Following ដែលអាចបញ្ជាតាមប្លូធូ។ ការបង្ហាញ Robot មានការចាប់អារម្មណ៍ព្រោះកាលនោះ Robot ក្រុមលោកធ្វើឡើងដោយដៃសុទ្ធសាធរាល់គូរសៀគ្វី ឬ សីមាផ្សេងៗ។ ការបង្កើតវាឡើងអាចប្រើរយៈពេលលឿនបំផុត ១ ថ្ងៃ តែបើរវល់អាចដល់ ១ សប្ដាហ៍។

សុថារិទ្ធបញ្ជាក់ថា អ្វីដែលជាបញ្ហាប្រឈមការសិក្សានិងបង្កើត Robot គឺមានការខ្វះខាតច្រើនដូចជាសម្ភារៈផ្សេងៗក្នុងការបង្កើតទើបក្រុមលោកត្រូវការជំនួយខ្លះៗដើម្បីជួយទប់ក្នុងការបង្កើត Robot។ ហើយការសិក្សាត្រូវតែថ្មីរួមនឹងការស្រាវជ្រាវលើគម្រោងមួយៗឲ្យបានច្បាស់ជៀសវាងមានបញ្ហាខូចខាត ឬការឆ្លងចរន្តបណ្តាលឲ្យខូច Board Chip ជាដើម។

The Khmer Nerd មានសមាជិកក្រុម ៥ នាក់រួមមាន លោក ជី សុថារិទ្ធ (ប្រធាន) Coordinator/Technical , ហេង គីមឈាង (សមាជិក) Software/Technical , ស៊ុន ហានឃៀង (សមាជិក) Software/Technical, ឈាន ផាណា (សមាជិក) Software, ពេជ្រ ភារុណ (សមាជិក) Design/Technical៕