គ្រូ ៣ រូបទទួលការគោរពស្រលាញ់ខ្លាំង ពីប្រជាជនខ្មែរក្នុងវិស័យអប់រំ

2015-09-10 13:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

វីរជនវិស័យអប់រំបីរូបមានឈ្មោះអ្នកគ្រូ ណាក់ សុខុម លោកគ្រូ សុខ ច័ន្ទ និង អ្នកគ្រូ ចាប ចាន់ឌី បានទទួលការគោរពស្រលាញ់ យ៉ាងពេញទំហឹងពីសំណាក់ប្រជាជនខ្មែរ និង ភ្នាក់ងាររបស់អង្គការសហប្រជាជាតិ UNICEF ប្រចាំនៅកម្ពុជា ក្រោយមានការបង្ហោះលើ Page ហ្វេសប៊ុកក្នុងពេលថ្មីៗនេះ។

អ្នកគ្រូ ណាក់ សុខុម

១. អ្នកគ្រូ ណាក់ សុខុម

បើតាមការឱ្យដឹងពី Page ផ្លូវការ UNICEF ឈ្មោះ UNICEF Cambodia អ្នកគ្រូ ណាក់ សុខុម បានបរិច្ចាគដីផ្ទាល់ខ្លួនមួយកន្លែង ដើម្បីសាងសង់សាលាមត្តេយ្យសហគមន៍បេង ស្ថិតក្នុងភូមិបេង ខេត្តព្រៃវែង។ អ្នកគ្រូរូបនេះថ្លែងថា ៖“ខ្ញុំរីករាយខ្លាំងណាស់ ក្នុងការផ្ដល់ដីធ្លីរបស់ខ្ញុំ ដោយសារខ្ញុំដឹងថាការអភិវឌ្ឍន៍កុមារតូចៗមានសារៈសំខាន់ណាស់"។

សាលាដែលផ្ដល់ដីដោយពលរដ្ឋសាមញ្ញមួយនេះ ត្រូវបានសង់ឡើងក្នុងឆ្នាំ ២០០៥ ដោយមានមូលនិធិគាំទ្រ ពីអង្គការ UNICEF និងក្រុមហ៊ុនអាយគា (IKEA) ហើយបច្ចុប្បន្ន វាក្លាយជាទីកន្លែងផ្ដល់ចំណេះដឹង និងលេងកម្សាន្តដ៏សប្បាយរីករាយ។

លោកគ្រូ សុខ ច័ន្ទ

២. លោកគ្រូ សុខ ច័ន្ទ

មិនខុសគ្នាឡើយ អ្នកមានចិត្តស្រលាញ់វិស័យអប់រំ និងចង់ជួយក្មេងៗដូចគ្នា លោកគ្រូ សុខ ច័ន្ទ បានលះបង់ពេលវេលា ១៨ ឆ្នាំ ដើម្បីបង្រៀនកុមាររស់ក្នុងភូមិដាច់ស្រយាល ឧបសម្ព័ន្ធអូរថ្ម ទឹកដីខេត្តបាត់ដំបង ដោយមិនយកប្រាក់កម្រៃ សូម្បីមួយកាក់មួយសេន ហើយលោកថែមទាំងបានចំណាយថវិកាផ្ទាល់ខ្លួនទិញសៀវភៅពុម្ព ឱ្យពួកគេទៀតផង ។

លោកគ្រូចិត្តធម៌រូបនេះបញ្ជាក់ថា ៖“កាលនោះគ្មានសាលារៀនទេនៅក្នុងភូមិទេ(សព្វថ្ងៃសាលានេះឈ្មោះបឋមសិក្សាអូរថ្ម) ដូច្នេះខ្ញុំក៏សម្រេចចិត្តបង្រៀនកុមារ”។ បើផ្អែមតាមប្រភព លោកគ្រូបានបើកបង្រៀនក្មេងៗនៅពេលថ្ងៃ ចំណែកពេលយប់ធ្វើការសម្រាប់ខ្លួនឯង។

ការខំប្រឹងរបស់លោក សុខ ច័ន្ទ មិនអត់ប្រយោជន៍ឡើយ ដោយបានធ្វើឱ្យមន្ត្រីអង្គការយូនីសែហ្វ ភ្ញាក់ផ្អើលកាលពីឆ្នាំ ២០១៤។ បច្ចុប្បន្នសាលារៀនដែលលោកបង្រៀន ត្រូវបានទទួលស្គាល់ជាសាលាបឋមសិក្សាផ្លូវការ ហើយលោកគ្រូ ក៏បន្តការបង្រៀនក្នុងនាមជាគ្រូជាប់កិច្ចសន្យាជាមួយមន្ទីរអប់រំខេត្ត។

អ្នកគ្រូ ចាប ចាន់ឌី

៣. អ្នកគ្រូ ចាប ចាន់ឌី

ដោយឡែកដើម្បីអបអរទិវាអក្ខរកម្មពិភពលោកម្សិលមិញ អង្គការ UNICEF បានបង្ហាញនូវវីរជនវិស័យអប់រំមួយចំនួនរួមទាំង អ្នកគ្រូ ចាប ចាន់ឌី ផងដែរ។ ចាប ចាន់ឌី ជាអ្នកគ្រូមួយរូបនៅសាលាមត្តេយ្យសហគមន៍ភូមិខ្វាន ក្នុងខេត្តកំពង់ស្ពឺ ដោយឆ្នាំដំបូងអ្នកគ្រូ បានដើរពន្យល់ឪពុកម្តាយតាមផ្ទះដោយផ្ទាល់ នៅគ្រប់គ្រួសារអំពីសារៈសំខាន់ នៃការអប់រំរបស់កុមារតូចៗ ហើយអ្នកគ្រូនៅតែមានការប្ដេជ្ញាចិត្តយ៉ាងមុតមាំដដែល រហូតមកដល់បច្ចុប្បន្ន។ មិនតែប៉ុណ្ណោះអ្នកគ្រូ ក៍បានបើកបង្រៀនសិស្សមួយចំនួនផងដែរ រាល់ថ្ងៃអាទិត្យ។ នេះបើតាមការឱ្យដឹងរបស់ Page ផ្លូវការ UNICEF Cambodia៕

ចុចអាន៖ ម៉ារីណា ហុង៖ “ខ្ញុំរៀនតព្រោះចង់ឱ្យកូនៗឃើញថា ការសិក្សាធ្វើឱ្យជីវិតល្អប្រសើរ”

ចុចអាន៖ អត់ចេះអីុតាលីមួយម៉ាត់តែជាប់ទៅរៀនថែមទាំងគ្រូសរសើរ និង ឈ្នះអស់សិស្សនៅទីនោះទៀត

អត្ថបទ៖ អ៊ុំ សុភក្តិ ប្រភព & រូបភាព៖ UNICEF Cambodia