ម៉ារីណា ហុង៖ "ខ្ញុំរៀនតព្រោះចង់ឱ្យកូនៗឃើញថា ការសិក្សាធ្វើឱ្យជីវិតល្អប្រសើរ"

2015-09-08 16:59:39
ចំនួនមតិ 0 | ចំនួនចែករំលែក 0

ចន្លោះមិនឃើញ

"ខ្ញុំរៀនតព្រោះចង់ឱ្យកូនៗឃើញថា ការសិក្សាធ្វើឱ្យជីវិតល្អប្រសើរ" នេះជាចម្លើយរបស់ អ្នកស្រី ម៉ារីណា ហុង ស្ត្រីខ្មែរនៅអាមរិក ឆ្លើយតបទៅនឹងសំណួរថា ហេតុអ្វីបានជាអ្នកស្រីនៅតែបន្តការសិក្សា ទាំងមានបុត្រប្រាំនាក់ក្នុងបន្ទុក?

តើការសិក្សារបស់ម៉ារីណាជូបលំបាកយ៉ាងណាខ្លះ?

ដោយសារតែរវល់នឹងការងារឌីហ្សាញ និង មើលថែកូនចៅផងនោះ អ្នកស្រីត្រូវបានគេផ្ដល់ឱកាស ឱ្យរៀនបរិញ្ញាបត្រ តាមអនឡាញ ជំនាញវិទ្យាសាស្ត្ររចនាក្រាហ្វិក (Science for Graphic Design) នៃសាកលវិទ្យាល័យ Full Sail សហរដ្ឋអាមេរិក។ យ៉ាងណានិស្សិតដែលទើបតែបញ្ចប់ការសិក្សា (សិក្សា ៣ ឆ្នាំ) កាលពីថ្ងៃទី ១១ ខែសីហា ថ្មីៗនេះថ្លែងថា ការរៀនតាមអនឡាញ មិនមែនជារឿងងាយស្រួលឡើយ ដោយត្រូវយកចិត្តទុកដាក់ និង ប្រកួតប្រជែងជាមួយនិស្សិតខ្លាំងៗរាប់រយនាក់។ កូនខ្មែរកើតនៅឯនាយសមុទ្ររូបនេះបង្ហើបថា អ្នកស្រីត្រូវចំណាយពេលច្រើនលើកិច្ចការសាលា លើការអាន និង ការអនុវត្តស្រាវជ្រាវផ្សេងៗ ដើម្បីឱ្យទាន់គេ ហើយអ្វីកាន់តែពិបាកនោះ គឺអ្នកស្រីជាអ្នកធ្វើការមិនសូវមានពេលគ្រប់គ្រាន់ និង មានកូនតូចៗចំនួនប្រាំនាក់ ដែលចាំបាច់ត្រូវយកចិត្តទុកដាក់ មើលថែឱ្យបានល្អ។

អ្នកស្រីបន្ថែមយ៉ាងដូច្នេះថា ការសិក្សាជារឿងមួយមិនអាចមើលរំលង ចំណែកការខំប្រឹងប្រែង និង អនុវត្តការងារឱ្យបានខ្លាំងក៏សំខាន់ខ្លាំងផងដែរ ៖"...អ្វីទាំងនេះនឹងធ្វើឱ្យពួកគេ ទទួលបានជីវិតមួយប្រកបដោយភាពល្អប្រសើរ..."។

ហេតុអ្វីអ្នកស្រីជ្រើសរើសជំនាញនេះមកសិក្សា?

ម៉ារីណា បានពន្យល់ថា ព្រោះអ្នកស្រីចូលចិត្តខាងឌីហ្សាញ ហើយសព្វថ្ងៃអ្នកស្រីជា អ្នករចនាក្រាហ្វិកឯករាជ្យ (Freelance) ខាងឌីហ្សាញ និងបង្កើតយុទ្ធនាការផ្សព្វផ្សាយផលិតផល របស់បណ្ដាក្រុមហ៊ុនឯកជន។ មិនតែប៉ុណ្ណោះជំនាញរចនាក្រាហ្វិក នៅអាមេរិក ជាការងារដ៏ពេញនិយម ហើយក្រុមហ៊ុនតូចធំជាច្រើន ត្រូវបង្កើតឡើងជារៀងរាល់ឆ្នាំ។ ម៉ារីណា បញ្ជាក់បែបនេះថា ការធ្វើការជាអ្នកឌីហ្សាញ ប្រៀបដូចជាអ្នកស្រី បានជួយសេដ្ឋកិច្ចខ្លួន តាមរយៈការបបង្កើតមុខជំនួញដ៏ល្អប្រសើរ។

តើអ្នកស្រីកើតនៅទីណា? ទោះបីជាមានឪពុកម្ដាយជាជនជាតិខ្មែរ តែស្ត្រីរូបនេះមិនបានកើតនៅកម្ពុជាទេ ផ្ទុយទៅវិញអ្នកស្រីកើតនៅសហរដ្ឋអាមេរិក ដោយសព្វថ្ងៃ កំពុងរស់នៅទីក្រុង Columbus រដ្ឋ Ohio។ ម៉ារីណាបង្ហើបថា អាមេរិកមិនងាយស្រួលទេ ថ្វីបើអ្នកស្រីកើតនៅប្រទេសមហាអំណាចសេដ្ឋកិច្ចលំដាប់លេខពីរលើលោកមួយនេះក្ដី ប៉ុន្តែបើសិនអ្នកស្រីគ្មានឆន្ទៈ ខិតខំធ្វើការអ្នកស្រីក៏មិនត្រូវបានអាមេរិកអនុញ្ញាតឱ្យរៀនដូច្នេះដែរ។

ម៉ារីណា និយាយអ្វីខ្លះអំពីខ្លួនឯងនិងកូនខ្មែរកើតនៅអាមេរិក? ក្នុងរយៈពេល ២៩ ឆ្នាំ ម៉ារីណា កម្រមកកម្ពុជាណាស់ តែស្ត្រីជាម្ដាយដែលតស៊ូក្នុងការសិក្សារូបនេះរៀបរាប់ថា អ្នកស្រីបានរៀនសូត្រ និងទទួលបទពិសោធន៍ជាច្រើន តាមរយៈឪពុកម្ដាយ ដើម្បីឱ្យខ្លួនក្លាយជាកូនខ្មែរម្នាក់រឹងមាំលើទឹកដីអាមេរិក។ ម៉ារីណាថ្លែងថា ពលរដ្ឋខ្មែរពិតជាពិបាក ព្រោះធ្វើត្រូវរៀនអ្វីគ្រប់យ៉ាង ទាំងបរិយាកាស និង ទាំងវប្បធម៌ ជាពិសេសគឺការសិក្សា។ ស្ត្រីវ័យ ២៩ ឆ្នាំមើលឃើញកូនខ្មែរកើតនៅអាមេរិកភាគច្រើន បានខិតខំប្រឹងប្រែងសិក្សា រហូតអ្នកខ្លះបានបញ្ចប់ថ្នាក់បរិញ្ញាប័ត្រ អនុបណ្ឌិត បណ្ឌិត (វិស្វករ មេធាវីជាដើម) ប៉ុន្តែមានកូនខ្មែរមួយក្ដាប់តូច ក៏មិនបានយកចិត្តទុកដាក់ លើការសិក្សារៀនសូត្រ និងការងារបានល្អទេ ដោយពួកគេចូលចិត្តការកម្សាន្តជាង ជាហេតុនាំឱ្យជួបការលំបាកច្រើននៅទីនោះ។

ម៉ារីណា បានសម្ដែងការដឹងគុណដល់លោកអ្នកមានគុណទាំងពីរ ដែលបង្កើតអ្នកស្រី លើទឹកដីអាមេរិក [...] តែទោះបីជាយ៉ាងណា អ្នកស្រីក៏សូមឱ្យកូនខ្មែរទាំងអស់ ចេះតស៊ូព្យាយាមរៀនសូត្រ និងប្រឹងប្រែងធ្វើការ ដើម្បីអនាគត សុភម្គលគ្រួសារ និងប្រទេសជាតិ។

សព្វថ្ងៃអ្នកស្រី ម៉ារីណា រស់នៅជាមួយស្វាមីនៅអាមេរិក ដោយទទួលបានចំណងដៃកូនប្រាំនាក់ ប្រុសពីរ ស្រីបី។ កូនប្រុសទីមួយអាយុ ១១ ឆ្នាំ កូនប្រុសទីពីរអាយុ ៩ ឆ្នាំ កូនស្រីទីបី អាយុ ៤ ឆ្នាំ កូនស្រីទីបួនអាយុ ៣ឆ្នាំ និងស្រីពៅអាយុ ២ ខែ ហើយបច្ចុប្បន្នអ្នកស្រី កំពុងតែបន្តការសិក្សាថ្នាក់អនុបណ្ឌិត តាមអនឡាញ ជំនាញវិទ្យាសាស្ត្ររចនាក្រាហ្វិក របស់សាកលវិទ្យាល័យ Full Sail៕